भांगरभूंय | प्रतिनिधी
भांगरभूंय । खबरां मेज
पणजीः लोटलीच्या बीग फूटांतल्या सांस्कृतीक केंद्रांत बीग फूट ट्रस्टा वतीन 20वो वर्सुकी बाल मेळावो फाटल्या आयताराक जालो. मडगांव, फातोड्डें, नावेली,वास्को, कोलवा, फोंडें आनी पेडण्यांतल्या मेळून 13 केंद्रांतल्या वंचीत भुरग्यां खातीर व्हो मेळावो आयोजीत केल्लो. 720 भुरगीं, 135 आपवावुरपी आनी सुमार शंबर सोयऱ्यांनी तातूंत वांटो घेतिल्लो.
मेळाव्यांत भुरग्यां खातीर तरेकवार सर्ती आयोजीत केल्ल्यो. गुजराती समाज शाळा, व्हेलेन्टायन लिटल हॅवन स्टॉल घातिल्ले. जेवणा उपरांत मनरिजवणेच्या कार्यावळी जाल्यो. साचिका आनी प्रिया आल्मेदा हाणी खासा भुरग्यां खातीर लाफ्टर थॅरेपी आनी झुम्बा डान्स कार्यावळ आयोजीत केल्ली. नावेली रोझरी कॉलेज, नुवें कार्मेल कॉलेज, लायला हायस्कूल, साळगांवकार उच्च माध्यमीक विद्यालयांतल्या आपवावुरप्यांनी भुरग्यांची वेवस्था सांबाळली. गोंय राज्य भुरग्यां हक्क राखण आयोगाचो अध्यक्ष पीटर बॉर्जिस आनी कुडतरेचो आमदार रेजिनाल्ड लॉरेन्स
बाल मेळाव्या खातीर खासा हाजीर आशिल्ले. बीग फूटाचो मुखेल कार्यकारी अधिकारी महेंद्र आल्वारीस हाणे तांकां येवकार दिवन भुरग्यां संबंदीच्या वेगवेगळ्या विशयांचेर भासाभास केली.
सर्तींत जैतिवंत थारल्ल्या भुरग्यांक बॉर्जिस, रेजिनाल्ड, आर्रेलिना रॉड्रिग्ज हाचें हस्तुकी इनामां भेटयलीं. बीग फूटांत जालो तसलो बाल मेळावो आपणे खंय पळोवंक ना अशे बॉर्जिस हाणे सांगलें. रेजिनाल्ड लॉरेन्सान भुरग्यां कडेन बऱ्योच गजाली केल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
