भांगरभूंय | प्रतिनिधी
गोंयांत दिसा उजवाडेच न्हय, अचकीत मध्यानराती, सकाळीं राजकी घडणुको घडप नवें न्ही. सत्तेर आशिल्ल्या भाजपा
सरकाराक तेंको दिवपाक काँग्रेसीक धपको दिवन भायर सरिल्ल्या आमदार आलेक्स सिकेरा हांकां मंत्रीपद मेळ्ळें ताचें अजाप दिसलें ना. मजगतच्या काळांत तांकां मतदारांनी विसव घेवपाक लायलो तरी ते अणभवी राजकारणी, तांचें शिक्षण पदवी मेरेन. तांकां मंत्रीपद दिवपा पासत आमदार नीलेश काब्राल हांकां राजीनामो दिवचो, त्याग करचो पडलो. तो दुसऱ्याक कोणाक करुंक येवचो नाशिल्लो व्हय? काब्राल हांचेर जे आरोप जाल्ले ते खरे न्हय अशें सांगप आनी दुसरे वटेन तांकां मंत्रिपदा वेल्यान देंवोवप हाचे फाटल्यान हेर कारणां आसूं येतात. मुख्यमंत्री डाॅ. प्रमोद सावंत हांकां राजकारण केन्ना, कशें करप तें कळपाक लागलां. तांचो राजकी खेळ बराबर की चूक हें फुडारांत कळटलेंच, एकादरे काब्राल हांकां उप मुख्यमंत्रीपद वा प्रदेशाध्यक्षपद मेळूं येता.
काँग्रेसीक सोडचिट दिवन आयिल्ल्या आमदारांक कितेंय तरी उतर दिले बगर ते मूळ पक्षांतल्यान भायर सरल्या आसतले व्हय? पर्यावरणमंत्री आलेक्स सिकेर एका तेंपार काँग्रेस पक्षनिश्ठ, प्रदेश काँग्रेसचे आदले सरचिटणीस. ते ओपिनियन पोला कडेन नातें सांगपी गोंय विधानसभेचे आदले विरोधी पक्ष फुडारी जॅक सिकेर हांच्या घराब्यांतले. लोकसभा वेंचणुकेंत साश्टींतल्यान भाजपाक चड मतां मेळोवपा पासत ते जैतवंत जातलेच अशें न्हय. उद्येग, वेवसायांतल्यांक, उंचेलें शिक्षण घेतिल्ल्या गोंयकार भावांक ते भाजपा वटेन ओडून हाडपाक शकतात तशेच काब्राल हांचे कडेनूय ती तांक आसा. सिकेरा हांचे परस काब्राल सासष्टींतल्या लोकांक चड लागींचे, तांची लोकां कडली लागणूक, वागणूक मंत्रीपदार पावतकीचय आदले वरी आसा.
समाजीक गणितां पळोवन अचूक उमेदवार दक्षीण गोंयांतल्यान भाजपान लोकसभा वेंचणुकेंत देंवयल्यार भाजपाक येस मेळटलें हातूंत दुबाव ना. समाजाचीं गणितां मांडपाक, सोडोवपाकय मुखेलमंत्री डाॅ. सावंत शिकल्यात. सत्तेर आशिल्ल्यान आनी विरोधी पक्ष अजूनय विखुरिल्ले आशिल्ल्यान लोकसभा वेंचणुकेंत गोंयांत भाजपा वाटेन तिडकल्ले मतदारय आसतले, हातूंत दुबाव ना. उमेदवार आमदारां इतलोच लोकांक भावपी, लोकां कडेन वचपी आसतलो ही जतनाय घेवची पडटली. प्रदेश भाजपा कडेन शिकिल्ले कार्यकर्ते आसात. भितल्ले तंटे जाग्यार घाल्यार, एकवट आसल्यार आदले मंत्री प्रकाश वेळीप, पयलींचे खासदार नरेंद्र सावयकार, आदले आमदार दामोदर नायक वा भाजपांतलो एकादरो नवो तरणाटो कार्यकर्तो तांची इत्सा आसल्यार दिल्लींत लोकसभेर पावतलो. मंत्रीपद सोडचें पडिल्ल्यान आमदार काब्राल मात्शे दुखावल्यात, तांचे दुखीचेर वेळार उपाय करप गरजेचें. काब्राल हे पुराय गोंयच्या, दक्षीण गोंयांतल्या मतदारांचेर परिणाम करपी व्यक्तीमत्व नासले तरी तांचो समाज, कांय मतदारसंघांक ते लागीं आसात. सिकेरा हांचे परस भाजपच्या मतदारां मदीं तांची प्रतिमा उजू आसा, काँग्रेसीच्या आमदार, मतदारां कडेनय तांचो बरो संबंद आसा. फाटलीं धा वर्सां भाजपाचे ते आमदार आशिल्ल्यान पक्षांतल्या ल्हान, व्हड फुडाऱ्यांच्या मनातलें ते वळखुपी. पिरायेन ते सिकेरा हांचे परस ल्हान, भौशीक बांदकाम खात्याक मार्गार हाडपाक ताणीं फाटलें देड वर्स वावर केला. मागीर तांकां परतून मंत्रीपद कित्याक मेळचें न्हय?
मंत्रीमंडळांत बदल करपाक आरंब जाला, भौशीक बांदकाम खातें मुख्यमंत्र्यांनी आपले कडेन दवरलां. फुडल्या आठ धा दिसां भितर ते सगल्या मंत्र्यांच्या खात्याचो नियाळ करुंक शकतात. 2024 वर्साचो अर्थसंकल्प मांडपाची तयारी करतना आपसूक सगल्या खात्याच्या कामकाजाची म्हायती तांचे कडेन पावतली. प्रधानमंत्री नरेंद्र मोदी हाणी पसून फाटल्या साडेचार वर्सांत मंत्र्यांच्या खात्यांत बदल घडोवन हाडले. त्या बदलांचो लावय जाला, कांय येवजणी शिस्तीन मार्गाक लागल्यात. गोंयांतय मंत्र्यांच्या खात्यांच्या वावराचो अभ्यास तशेंच मंत्र्यां कडेन भासाभास करुन खातीं बदलल्यार आडखळिल्ल्यो येवजण्यो फुडें वतल्यो.
कांय मंत्र्यां कडेन खूब खातीं आसात, सगल्या खात्यांक न्याय दिवपाक तांकां वेळ पावना. मागीर तांचें खात्याचें वजें कित्याक उणे करचें न्ही? ज्या मंत्र्यांनी खात्यांच्या कामकाजांत लक्ष घालून खातीं सुदारल्यांत, त्या मंत्र्यां कडल्यान लोकांच्यो अपेक्षा वाडटात. लोकसंख्या वाडिल्ल्यान खात्यांचो व्याप वाडला, नवीं खातीं जाल्यांत, जावपाचे वाटेर आसात, नवें मनीसबळ बांदपाचो वावरय चलला. रिटायरमेंटाचे वाटेर आशिल्ले खात्याचे मुखेली, अधिकारी आसतले तांकां पर्याय दिवपय सोपें नासता. अधिकाऱ्यांक रिटायर जातकीच कायद्यान सेवावाढ दिली तरी खात्यांत निर्शेणी वाडटा, अधिकारीय पयलींचे उमेदीन कामकाज पळेनात हेंय तितलेंच खरें.
लोकसभा वेंचणूक लागीं आयिल्ली आसतना सिकेरा हांकां मंत्रीपद दिवपाची धिटाय मुख्यमंत्र्यांनी दाखयली, काब्राल हांकां त्यागय करपाक लायलो. तशें करतना लोकां भितर, पक्ष कार्यकर्त्यां मदीं अस्वस्थताय आयल्या ती कित्याक? खासदार सदानंद शेट तानावडे हांकां केंद्रीय पावंड्यार जापसालदारकी घेवची पडटा तेन्ना प्रदेश कार्यकर्त्यां खातीर तांचे कडेन वगतय आसचोना. बळिश्ट पक्ष संघटनेन भाजपाक गोंयांत जैता कडेन आयज मेरेन व्हेलां, संघटनेचें बळगें वाडोवपाक, कार्यकर्त्यां भिरली निर्शेणी पयसावप तानावडे हांकां शक्य जातलें? पयलींचे खासदार विनय तेंडुलकार आपल्याचेर नवी जापसालदारकी घालपाची वाट पळयता आसतलेच. राज्यसभेचो अणभव घेतल्या उपरांत तांकां लोकसभेर वचपाची इत्सा आसा? दक्षीण गोंयचे मतदार तांकां वेंचून दित? उत्तर गोंयांतल्यान केंद्रीय मंत्री श्रीपाद नायक हांकांच लोकसभेर धाडटले हें मुख्यमंत्र्यांनी जाहीर केलां, निमाणे कडेन त्या निर्णयांत बदल जावपाची शक्यताय ना. मंत्री, आमदार, कार्यकर्त्यांनी उत्तर गोंयांतल्यान श्रीपादभाऊं आड उलोवचें न्हय ही शिटकावणी दिवचीच पडटली.
पयले सुवातेर मंत्र्यां कडेन आशिल्ल्या खात्यांचो नियाळ करप, कार्यकर्त्यां मदीं लोकसभेच्या जैतापासत सकारात्मकता निर्माण करप गरजेचें. राजकी अस्वस्थतायेचे परिणाम प्रशासनाचेर जातात, कामाय आडखळतात. अशे वेळार प्रशासनातली अस्वस्थताय समजून घेवप, ती वेळार पयसावप गरजेची. राष्ट्रीय खेळां सर्ती, इफ्फींतल्यान मेकळे जाल्ले मुख्यमंत्री डाॅ. सावंत ते खातीर पावल मारतले अशी आस्त बाळगूया.
मंत्र्यांच्या खात्यांत बदल जाल्यार तांकांय नवें शिकपाक मेळटलें.
सुहासिनी प्रभुगांवकार
9881099260
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
