भांगरभूंय | प्रतिनिधी
भांगरभूंय । प्रतिनिधी
दिवचलः विश्वकर्मा च्यारी समाज कश्टकरी समाज आसा. कश्ट आनी मेहनत करतात पूण मोठेंपण मिरयनात. समाजांत उच्च शिक्षण घेतिल्ले जायते जाण आसात. तांच्या गिनानाचो लाब मेळचो हे खातीर समाजांतल्यां सगल्यांनी एकठांय येवपाक जाय. आमचे कलेचेर समाजा भायल्या लोकांनी अतिक्रमण केलां. तेंच आमचें खच्चीकरण करता. फुडाराक आमच्या समाजान आपली प्रगती करून घेवपाचो विचार करून ते दिकेन फुडें वचपाक जाय अशें कुर्टीची जिल्हो पंचायत वांगडी प्रिया च्यारी हिणे सांगलें.
श्री विश्वकर्मा च्यारी/मेस्त ब्राह्मण समाज गोंय हे संस्थे वतीन “शिल्पवेद” ह्या त्रैम्हयन्याळ्याची प्रकाशन कार्यावळ गिमोणे – पिळगांव हागा रामचंद्र ऊर्फ रघुनाथ संस्थान सभाघरांत जाली. त्या वेळार प्रिया च्यारी उलयताली. ह्या वेळार कवी आनी साहित्यिक डॉ. पूर्णानंद च्यारी, समाज संस्थेचो अध्यक्ष विनायक च्यारी, पंच वांगडी बाबू च्यारी, प्रवीण च्यारी, भविश्य मार्गदर्शक रघुवीर च्यारी, रघुनाथ संस्थानाचो अध्यक्ष प्रकाश च्यारी, सचीव दिनेश च्यारी, समाज इतिहास संशोधक विवेक च्यारी हाजीर आशिल्ले.
च्यारी समाज आजूय आपल्या पारंपारिकतेक न्याय दिवंन कष्ट करीत आसा. ह्या समाजाक कारागिरी आनी कामाचो वेवसाय लेगीत करपाक येता असो नवो चेरो तयार करपाक जाय. ते खातीर मार्गदर्शख लिखाण शिल्पवेद त्रैम्हयनाळ्यांत येतलें. आमच्या रगतांत जल्मजात, कलात्मक कलाकारी आसा. ती विकसीत करपा खातीर मार्गदर्शन शिल्पवेदांतल्यान करतले अशें मुखेल संपादक डॉ पूर्णानंद च्यारीन सांगलें. छत्रपती शिवाजी म्हाराजांच्या पदस्पर्शान पावन जाल्ल्या गोंयचे भुंयेंत आमचो जल्म जातां हें आमचें भाग्य आसा. हे भुंयेंत आमच्या पूर्वजांचो इतिहसाचो आलेख आसा. कलाकारी आमचे फुडले पिळगे मेरेन पावोवपा खातीर शिल्पवेद त्रैम्हयन्याळ्यची संकल्पना तयार केल्या अशें विनायक च्यारी हाणे आपल्या येवकाराच्या भाशणात सांगलें.
ह्या वेळार रघुवीर च्यारी, प्रकाश च्यारी, दिनेश च्यारी, बाबू च्यारी हांणी आपले विचार मांडले. विवेक च्यारीन प्रास्तावीक केलें. सूत्रसंचालन विजय च्यारीन केलें आनी भूषण च्यारीन उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
