भांगरभूंय | प्रतिनिधी
संकल्प थिएटर्स कुडचडें, गोंय कला आनी संस्कृती संचालनालय आनी रवींद्र भवन कुडचडें हांच्या जोड पालवान जावपी 21 व्या कोंकणी नाटक महोत्सवाच्या अध्यक्षपदार कुडचडेंचे आमदार नीलेश काब्राल, तर कार्याध्यक्ष म्हूण संदेश काकोडकार हांची निवड जाल्या.
हालींच जाल्ले बसकेंत नाटक महोत्सवा खातीर समिती वेंचून काडली. संकल्प थिएटर्साची समिती, अध्यक्ष- नवीन खांडेकार, सचीव मंगलदास भट, खजिनदार सुनील नायक, नाटक महोत्सवा खातीर वांगडी: केशव नायक, वसंत सावंत, नंदेश वस्त, बिना नायक, राजस काकोडकार, रूबिया काकोडकार, अवधुत देसाय, हनुमंत वस्त ,राखी खांडेकार, शशिकांत वंडावकार, तानाजी गांवकार, सतीश लोटलीकार, नारायण शेट्ये, गुरूदास नायक, प्रमोद नायक, पृथ्वीराज बोरकार, मारीओ बार्रेटो, दुर्गानंद परब, नागेश नायक, सतीश नायक, निकिता नायक, सोनल सगलानी, प्रकाश नायक, गोकुळदास नायक, मुकुंद नायक.
ह्या वर्साचो नाटक महोत्सव 11 तें 17 डिसेंबर मेरेन चलतलो आनी 19 डिसेंबराक समारोप सुवाळ्याक नाट्य कलाकारांचो भोवमान आनी चेतना स्कुलाच्या खाशेल्या भुरग्यांची सांस्कृतीक कार्यावळ जातली.
ह्या वर्साच्या नाटक महोत्सवांत वट्ट सात नाटकां सादर जातलीं. तीं अशीं आसात- 11 डिसेंबर गौरी तनय कला संघ हांचें ‘शेजारी आमी शेजारी’, 12 डिसेंबर ॐकार कलाबहार करमळी हांचें ‘आवयचो पूत सुनेचेर भूत’,13 डिसेंबराक अंत्रूज घुडयो बादोडें हांचें ‘हिडिंबा’ 14 डिसेंबर विठ्ठल मंच सांगाती, कारापूर सांखळी हांचें ‘धनया देवचारा’, 15 डिसेंबर श्री नागेश महारूद्र नागेशीं हांचे ‘अं बा नी’, 16 डिसेंबर श्री सरस्वती मंडळ दाग हांचें ‘रथोत्सव’ तर 17 डिसेंबराक कलाचेतना हांचे ‘होम मिनिस्टर’ हीं नाटकां सादर जातलीं. सगळीं नाटकां सांजेच्या 7 वरांचेर सुरू जातली, तशेंच नाटकाच्यो प्रवेशीका रविंद्र भवन कुडचडें हांगां नाटकां दिसा सकाळी 9 ते 11 मेरेन मेळटल्यो. प्रवेशिके खातीर कार्याध्यक्ष संदेश काकोडकार,नवीन खांडेकार आनी मुकूंद नायक हांचे कडेन संपर्क सादचो, अशें आयोजकांनी कळयलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
