भांगरभूंय | प्रतिनिधी
शाळेची वर्सुकी कार्यावळ आशिल्ली शाळेंतल्या निवृत्त शिक्षकांक कार्यावळीक आपोवणें आशिल्लें. एके शाळेंतल्यान शिक्षिकेन भुरग्यां कडल्यान नाटकुले सादर करून घेतिल्ले. भुरग्यां कडल्यान तर बरो अभिनय करून घेतलोच, इतलेंच न्हय तर माचयेची मांडावळ, आवाज येवजण, भेसवण खूब खूब बरी जाल्ली. लोकांनी उबें रावन ताळयो मारून भुरग्यांची तशेंच शिक्षकेची उर्बा वाडयल्ली.
निवृत्त शिक्षिका मुद्दाम ते शिक्षिकेक मेळपाक गेली तिणें म्हणलें, फेमी, तुका हांवें केन्नाच नाटकुल्यांत वाटो घेतिल्लो पळोंवक ना. तुवें खूब बरे तरेन भुरग्यां कडल्यान नाटकुलें सादर करून घेतलें. खरेंच तुका मना सावन परबीं. फेमी तें शिक्षिकेक दोन मिनटां पळयत रावलें. शाळेंतले दीस याद जावन तिचे दोळे भरून आयलें. दोळे पुसत तिणें शिक्षिकेक देव बरें करूं म्हणलें.
शिक्षिकेन विचारलें फेमी कित्याक रडटा? टिचर फेमीन जाप दिली. शिक्षिकेन म्हणलें, सगले लोक तुमी तुस्त करतात आनी तुज्या दोळ्यांत दुकां? फेमीचो गळो भरून आयलो. जड उतरांनी ताणें सांगलें. टिचर म्हाका नाटकुल्यांत वांटो घेवपाक खूब आवडटालें. म्हाका नाटकुल्यांत वांटो घेवपाक संद दियात. खूप हांव विनवणी करताले. तूं काळे आसा तुका तो पार्ट सोबचो ना म्हणून म्हाका ते टिचरीन सदांच कुशीक बसयलें.
बाय, आमचे कातीचो रंग कसो आसचो हे आमच्या हातांत नासता. आपूण जावन तुवें तुज्या आंगातल्या कलेचें प्रदर्शन करप तूं एक बरे कलाकार आसा हें दाखोवन दिलें, हेंच खूब जालें. म्हणून ताका तिणे परत शाबासकी दिली. दर खेपे ती टीचर म्हाका न्हयकारतात तेन्ना म्हाका खूब वायट दिसतालें. म्हाका जाल्लो मानसीक त्रास दुसऱ्या भुरग्याक जावचो न्हय देखून जांका वांटो घेवपाक जाय. तांका सगळ्यांक हांव संद दितां. थोड्याशा मार्गदर्शनान भुरगें आंगातल्या कलेचें बरें तरेन प्रदर्शन करताय बी. तांकां सादरीकरण जमलेना जाल्यार मागीर तीं आपूण जावन भायर सरतात.
भुरग्यांच्या पालकांची म्हाका तुस्त करीनशी दिसता. पालक भुरग्यां फाटल्यान सावळी कशें रावतात. खूब बरी गजाल पूण अशें करतना तांचेर जबरदस्ती जायना मूं हाची जबाबदारी घेवपाक जाय. तांच्या आवडीचें शिक्षण घेवपाक तांकां मेकळीक दिवपांक जाय. हेंच वय आसता तांचेर संस्कार करपाचे, तांकां बऱ्या- वायटाची जाण करून दिवपाची. तुमी घेतिल्ल्लाय कश्टांची, काडिल्ल्या त्रासांची तांकां जाणीव करून दिवपाची. एकदा भुरग्याक परिस्थितीची जाणीव जाली की पालकां बदद्दल ताच्या मनांत खेरीत आदर निर्माण जातलो. तांच्या तोंडांतल्यान उतरां भायर सरतलीं. ‘डॅडी- मम्मी तुमकां शक्य नासतनाय तुमी म्हाका योग्य वेळार जाय तें दिलें. आतां म्हजी पाळीं तुमकां मजत करपाची. तुमची काळजी घेवपाची.’ वाऱ्यावयली गजाल न्हय. हो आसा एक गोड अणभव.
आपल्या भुरग्यांचेर विस्वास दवरून ताच्या आवडीच्या शिक्षणाचो वा छंदाचो आदर करपाक जाय. तो ल्हान आसा वा ताका ताचो फुडार थारोवपाचो समाज वा अशें चिंतपाक जायना. शालेय शिक्षणाच्या पांवड्याचेरूच तो आपल्या फुडाराच्या सपनांची बुन्याद घालता.
संगीतचो बादशाह पॉप गायक रेमो फेर्नांडीस हांणी आपल्या आवाजान लोकांची काळजां जिखलीं. आज लेगीत ताच्या गोड आवाजाच्या तालार लोक धुंद जावन नाच करतात. तो रेमो फर्नांडीस म्हणटा, म्हज्या आवय बापायन म्हज्या संगिताच्या आवडी बाबत आडनदर केल्ली जाल्यार हो रेमो तुमकां मेळचोच नाशिल्लो. म्हज्या बापायन म्हजी आवड पारखिल्ली, इतलेंच न्हय तर म्हजे आवडीक सारें उदक घालें. जेन्ना जेन्ना म्हाका संगिताचो शिक्षक आवडलो ना तेन्ना त्याच शिक्षका कडेन वचून शीक म्हणून म्हाका फोर्स केलो. म्हजी आवड पारखून म्हाका म्हजे परीन शिकपाची मेकळीक दिली.
भुरग्यांक योग्य संस्काराची तशेंच योग्य मार्गदर्शनाची गरज आसा. अती मेकळीक वा अती लाड केले जाल्यार भुरगो वायट मार्गार वचपाची शक्यताय आसता. सरभोंवतणचें वातावरण पळयत जाल्यार पालकांक तशेंच शिक्षकांक जागरूक रावपाची गरज आसा. दोगांयनी भुरग्याक समजून घेतले जाल्यार, पालकांनी आपल्यो इत्सा तांचेर लादल्यो ना जाल्यार तांच्या विचारांक पोसवण दिली जाल्यार आनी शिक्षकान तांकां फाटबळ दिलें जाल्यार तांचें ध्येय पूर्ण जावपाक वेळ लागचोना. एकदां तांच्या पाखाट्यांत बळ आयलें की आपल्या अस्तित्वाची, संस्काराची, मार्गदर्शनाची जाण दवरुन ती ध्येयाच्या दिकेन उडत वतलीं. ताचें सपन पूर्ण जातलेंच तेच बराबर तांणी आपलीं अशी खेरीत सुवात निर्माण केल्या म्हूण पालकांक तशेंच शिक्षकांक तांचो अभिमान दिसतलो.(उत्तरार्ध)
कुसुम अग्रवाल
शिवोले- बार्देस
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
