भांगरभूंय | प्रतिनिधी
सर्वोच्च न्यायालयाचें FASTER 2.0 पोर्टल सुरू
नवी दिल्ली, खबरां संस्था: न्यायालयीन काम बेगीन करपा खातीर मुखेल न्यायाधीश डी वाय चंद्रचूड हांणी FASTER 2.0 पोर्टल सुरू केलां. नव्या पोर्टला वरवीं बंदखणींतल्या अधिकार्यांक, निवाडो दिवपी न्यायालयांक आनी उच्च न्यायालयाक कैद्यांक सोडपा संबंदी न्यायालयीन आदेशांची म्हायती रोखडीच धाडटले. देखून कैद्यांची सुटका रोखडीच जातली. सध्याचे वेवस्थे प्रमाण बंदखणींतल्यान भायर सरपाक बरोच वेळ लागता.
न्यायालयीन कामाक वेग दिवपा खातीर न्या. चंद्रचूड हांणी हें पोर्टल सुरू केलां. कैद्यांचे सुटके विशीं न्यायालयाच्या आदेशांची म्हायती बंदखण प्राधिकरण, ट्रायल कोर्ट आनी उच्च न्यायालयाक बेगीन धाडटले. सध्याचे वेवस्थे प्रमाण बंदखणींतल्यान भायर सरपाक बरोच कळाव लागता. नवे पोर्टल सुरू जाले उपरांत कैद्यांची रोखडीच सुटका शक्य जातली.
संविधान दिसा निमतान सर्वोच्च न्यायालयांत एक कार्यावळ घडोवन हाडली. मुखेल न्यायाधीशान हे कार्यावळींत हें पोर्टल सुरू केलें. न्या. चंद्रचूड हांणी म्हणलें, आमी एक पोर्टल सुरू करतात. जंय एके व्यक्तीच्या सुटके खातीर न्यायालयीन आदेश रोखडेच अंमलबजावणी खातीर बंदखण, ट्रायल कोर्ट आनी उच्च न्यायालयांत हस्तांतरीत करतले. सध्याच्या नेमा प्रमाण अधिकृत न्यायालयीन आदेशाची भौतीक प्रत जायत्या सरकारी खात्यांतल्यान वता. हाचे उपरांत न्यायालयीन आदेश जेल प्राधिकरणा मेरेन पावता. जेल प्रशासन आदेशाची प्रत मेळ्ळ्या उपरांतूच कैद्यांची सुटका करता. हाचो अर्थ न्यायालयान सुटकेचो आदेश दिल्या उपरांत लेगीत कैद्यांची बंदखणींतल्यान सुटका जावपाक बरोच कळाव लागता.
FASTER 2.0 पोर्टल लायव्ह जालां. हाका लागून संबंदीत अधिकार्यां मदीं रोखडोच संवाद वाडटलो, जाका लागून देशाची न्यायवेवस्था सुदारपाक मजत जातली. न्या. चंद्रचूडान ई- एससीआर पोर्टलाची हिंदी आवृत्तीय सुरू केली. ह्या पोर्टलाचेर सर्वोच्च न्यायालयाचे आदेश हिंदींतल्यान पळोवपाची सुविधा आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
