भांगरभूंय | प्रतिनिधी
गोंयची लोकसंख्या सादारण 16 लाख आसतली. हांगा गाडयोय तितल्योच. येरादारी खात्या कडेन ताचो नेमको आंकडो आसतलो. येरादारी नेम पाळिनाशिल्ले ड्रायव्हर हांगां हजारांनी आसात. येरादारी खात्यान अंदूं एकठांय केल्ल्या तालांवाचे आंकडे पळयत जाल्यार जायत्या जाणांचे दोळे घुंवतले. ल्हान उद्देगां कडल्यान करांच्या रुपांत मेळचोना इतलो पयसो तालांवां वरवीं मेळटा. फाटल्या 10 म्हयन्यांत 25 कोटी 65 लाख रुपयांचो तालांव मेळ्ळा. अजून दोन म्हयने उरल्यात. नोव्हेंबर, डिसेंबर हे दोनूय म्हयने पर्यटनाचे. म्हणटकच हो आंकडो 30 कोटींक तेंकतलो. गोंयांत येरादारी नेम माड्डुपी सरासरी 1444 लोकां कडल्यान 8 लाख रुपया सरकाराक मेळटात….. म्हयन्याक न्हय, दिसाक!! सरकारा खातीर ही बऱ्याची गजाल. कारण कोट्यांनी रुपया दर म्हयन्याक तिजोरेंत येवन पडटात. ते उदरगतीच्या कामां खातीर वापरूंक मेळटात. मात, बारीकसाणेन पळयल्यार आमकां कायद्याचें कांय पडून वचूंक ना. ताका आमी मात्तूय भियेनात, असो अर्थ जाता. आमी आमकां जाय तशे गाडयो चलयतले, आमकां तालांव घालात. येरादारीचे नेम घेवन बसपाचे नात. आडयलो जाल्यार पयशे भरपाचे. कोण कांय करीना… ही वृत्ती देशाचे नागरीक म्हूण आमकां सोबना. परत- परत नेम मोडपी शेंकड्यांनी वाहन चालक गोंयांत आसात. फाटीं बाणस्तारी अपघात जाल्लो. ताच्या लायसन्साची आॅनलायन म्हायती जाहीर जाल्ली. तातूंत सात फावटी तालांव पडूनय तो भरूंक नाशिल्ल्याचें दिसून आयिल्लें.
वयले 25 कोटी रुपया 4 लाख 38 हजार 989 वाहन चालकां कडल्यान जमल्यात. लक्षांत घेवपाची गजाल म्हणल्यार पोरूंचे तुळेन अंदूं तालांव दिवप आनी घेवप वाडलां. नेम मोडप्यांचो आंकडो 2.87 टक्के वाडला तर तालांवाची रक्कम सादारण 60.73 टक्के वाडल्या. गोंयांत गाडयो वाडत आसात. नेम मोडपी वाडल्यात, तालांव घेवप्यांचो आंकडो वाडटा आनी सगल्यांत हुस्क्याची गजाल म्हणल्यार अपघात जावन मरपी, अपंगूळ जावपीय वाडल्यात. येरादारीच्या मळाचेर खंय व्हरून दवरला गोंय आमी!! सोरो पियेवपी 1462 सांपडले. अल्कोमिटर दिसपट्टो वापरीत जाल्यार हो आंकडो दुपेटीन वाडटलो. 18 वर्सां सकयल्या 12 वाहन चालकांक धरल्यात. पालकांनी आपल्या भुरग्यांचे नियंत्रण दवरपाक जाय. 12 जाणां कडल्यान 85,500 रुपया म्हणल्यार प्रत्येकाक व्हडलो तालांव पडला. ही रक्कम वाडोवपाक मेळटा जाल्यार पळोवचें. खास करून भुरगे आनी बेबद्यांक 10 हजार रुपयां वयर तालांव जाय!
आनीक एक प्रकार हालींच्या कांय वर्सांनी जावपाक जाय. तो म्हणल्यार मोबायल फोनाचेर अदीं मदीं नदर मारीत वा 10 – 15 सेकंद तो पळयत गाडी चलोवप. ही गजाल सामकी धोक्याची. वरभर खंयच्याय रस्त्यार उबे रावन पळयल्यार कोणाकूय पांच जाण तरी मोबायल फोनाचेर नदर मारतना दिसतले. उलयतना न्हय! अपघात जातात, ताका मोबायलूय जापसालदार आसतलो. पुलिसांनी ह्या वेसनाचेर उपाय काडपाक जाय. काळ्या हारश्याचो गाडयो घेवन भोंवपी कांय धाडशी ड्रायव्हर अजून दिसतात. धोक्याचें पार्किंग केल्ल्या 74,530 गाडयांक तालांव घाला. 3 कोटी 75 हजार 4100 रुपया जमल्यात. हाचो अर्थ आमी गोंयांत मेळत थंय गाडयो लायतात. दुसऱ्यांक त्रास करतात. कांय कडेन पालिका पार्किंगाचे पयशे घेता. पूण बरेच थंय गाडयो पार्क करीनासतना रस्त्यां कुशीक त्यो दवरतात. रस्तो रुंद केलो काय थंय पार्किंग हें जाताच. गोंयांतल्या सगल्या स्वराज संस्थांनी पार्किंगेची समस्या सोडोवपाक वावरुंक जाय. सगल्यांक वेवस्थित जागो मेळ्ळो जाल्यार ही बेशिस्त पार्किंगाची समस्या सुटावी जातली. कांय जाग्यांचेर तात्पुरती पार्किंगेची सुविधा जाय. अर्द वराभितर बाजार केलो आनी गेलो घरा. मात बरेच उणीच 12 वरां फुकट पार्किंगेचे जागे आडयतात. मागीर हेरांक जागो मेळना आनी ते मेळत थंय गाडयो उबे करून कामाक वतात.
हालींच एआय तंत्रज्ञानाचेर चलपी सिग्नलां सुरु जाल्यांत. ती मात पसून हेवटेन तेवटेन जाल्यार सरळ तालांव धाडटात. घडये ताकाच लागून तालांवान कोटीच्या कोटी उड्डाणां घेवंक नात मूं? बरेच कडेन हीं सिग्नलां येरादारीचे कोंयडेचें कारण थारल्यांत. ताकाच लागून घडये हालीं अदी मदीं सिग्नलां बंद दवरून पुलीस येरादारी नियंत्रीत करतात आसतले. काय सिग्नलां बंद बी पडटात??
येरादारीचे समस्येचेर उपाय काडपाक जाय. तालांव मेळटा म्हूण येरादारी तशीच चलपाक दिवप चुकीचें. लोकांनीय नेम पाळप मनार घेवचें. पयसो आसा म्हूण दर म्हयन्याक तालांव घेवप आनी फारीक करप बरोबर न्हय.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
