भांगरभूंय | प्रतिनिधी
एका खाजगी आस्थापनांत काम करपी कर्मचारी हालींच मेळ्ळो. तो सांगतालो, आमकां पगार वेळार मेळना, इतलेंच न्हय तर कांय जाणांक तर फाटलें वर्स, देड वर्स तो फारीकूच करूंक ना. हें आस्थापन काय गरीब ना पयशांचो लेगीत उणाव ना. पूण मालकाचे विचार वेगळेच. काम करपी कर्मचारी पळून गेले तर, देणेकार फाटीं सरलो तर.. अशे जायते विचार ताका पिशे करतात. घडये असल्याच कारणांक लागून आमी सरकारी नोकरीक पसंत करीनात मूं? आसूं . पूण एक मात, कोणूय कितेंय म्हणू, गोंयांतली सरकारी नोकरी सहज मेळप सद्या तरी कठीण दिसता. आनी निकाल जरी जाहीर जालो तरी कोर्टाची सुनावणी कितलो वेळ लांबत हें कोणें सांगू येता? म्हूण पालकांनी अशें शिक्षणिक वातावरण घरांत निर्माण करचें की जाका लागून हेर नोकरें कडे भुरग्यांचें लक्ष वचूं शकता. देखीक केंद्र सरकारच्यो लेगीत सरकारी नोकऱ्यो आसतात.
बँके भितर लक्ष घालत तर थळावे उमेदवार खूब उणे दिसतात, हीच गजाल टपाल खात्याची. हाचे एक कारण म्हळ्यार थळावे हाचे कडेन आडनदर करतात, नाजाल्यार ते संबंदीचें मार्गदर्शन आसना, हें कारण आसू शकता, धरून चलात तुमका जर बँके भितर काम करपाचें आसा, नोकरी करपाची आसा तर तुमका परीक्षा दिवची पडटा. पदवी शिकिल्लो भुरगो हे परिक्षेची तयारी नाशिल्ल्यान यश मेळोवंक शकना. हे परिक्षेची तयारी जर ताणें आदी पासुनुच केल्ली तर ताका ही परिक्षा कठीण वचपाक ना. आठवेंतल्यान जर तुमी हे परिक्षेचे नजरेन जर तयारी केली तर येश मेळपाक कठीण वचू नजो.
ह्या भुरग्याच्या प्रयत्नाक पालकांचो हातभार लागपाक जाय. पालक पेपर वाचता तेन्ना ताच्या भितर विंगड विंगड कार्यशाळांची म्हायती दिल्ली आसता. तातून भुरग्यान भाग घेवचो आनी वांगडा आपुन वचपाची तयारी दाखयत तर भुरग्याकूय नेट येतलो. हें कळपाक तुमी त्या फाट्यांतले तज्ञ आसपाक जाय अशें ना. तुमकां जर फावना तर घरांतलो कोणीय जबाबदार मनीस वांगडा वचूं शकता. म्हाका याद आसा एक वळखीचो पालक कृष्णा आपल्या चल्याक घेवन गांवां पसून पयस आशिल्ले सुवातेर कार्यशाळेक आपल्या चल्याक व्हरतालो आनी हाडटालो लेगीत. अशें तुमीं लेगीत करूं येता. शाळेन प्रत्येक कार्यशाळेचें आवाहन करपी परिपत्रक येता, तातून आपुण वांटेकार जातलो हें त्या भुरग्यान सांगपाक जाय. जर येवपा, वचपाची तयारी पालक दाखयत तर ते शाळेकूय उमेद येतली. सद्या गोंयांत जायते महोत्सव जायत आसतात. ८ डिसेंबराक काणकोणां आदर्श ग्राम सुवातीचेर तीन दिसांचो लोकसंस्कृती महोत्सव जावपाचो आसा. हातून १२ राज्यांतली पथकां वांटेकार जातलीं. जानेवारींत ८ ते १३ मेरेन आंतरराष्ट्रीय दर्जो आशिल्लें, दिव्यांगां खातीर खास आशिल्ले पर्पल फेस्ट जावपाचें आसा. तें तुमी पळोंव शकतात, त्या महोत्सवान जरी तुमी प्रत्यक्ष वांटेकार जरी नासले तरी प्रेक्षक म्हूण वचूं शकतात. इतलो तरी त्रास भुरग्या खातीर आपणें काडचो. हातूंतल्यान भुरग्या लागीं एक नातें निर्माण करपाची तुमकां संद मेळटा.
वेळांत वेळ काडून तुमी तुमच्या भुरग्यांक जर काणयो सांगल्यो तर मोबायल तो पयस दवरु शकतलो. कसलीच गजाल तुमकां खबर ना अशें जावंकूच शकना. रामायण, महाभारत तर सगळ्यांनी आयकलां आसताले. आतां तर तें अभ्यासक्रमांचो वांटो जावं शकता. ह्यो गजाली भुरग्यांकूच न्हय तर जाण्ट्या लोकांक लेगीत संदेश दिवपाचो वावर करतात. तुमकां खबर आशिल्ली काणी तुमी जरूर सांगची आनी हाचें प्रमाण दिसाक एक लेगीत आसूं शकता. हातूंतल्यान घरा भितर शिक्षणिक वातावरण दवरपाक तुमी थोडे तरी यश मेळयतले. तुमी चड शिकिल्ले आसशात तर अधिक बरें, पूण भुरग्या कडेन तुमचें नातें जुळोवप ही आतांची गरज आसा. आदल्या तेंपार टीव्ही, नाटकां आसतालीं, आता टीव्हीच्या असंख्य चॅनलांची भर तर पडल्याच, खेरीज मोबायला वरवीं कितल्योशोच गजाली प्रत्येक दिसा घडत चल्ल्यो. तातून सगळेंच वायट आसता अशें ना, पूण बरें कितें वायट कितें, हें भुरग्यांक कळपाक जाय. पालकांनी आता तरी जागृत जावन बऱ्या कार्यावळींनी वांटेकार जावचें आनी घरा भितर शिक्षणिक वातावरण निर्माण करचें.
प्रा रामदास केळकार
9822583275
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
