भांगरभूंय | प्रतिनिधी
बेळगावी, प्रतिनिधी : कर्नाटक राज्यांतली संरक्षण मंत्रालयाची एकमेव छावणी आशिल्ल्या बेळगांवी छावणी मंडळाचे (कंटोन्मेंट बोर्ड) मुखेल कार्यकारी अधिकारी के आनंद हांणी आत्महत्या केल्या. फाटल्या स दिसां सावन सीबीआय अधिकाऱ्यांनी छावणी मंडळाचेर धाड घालून मंडळाच्या कथीत कर्मचारी भरती भानगडीची चवकशी चालू केल्या. ते फाटभुंयेर सीईओ के आनंदान आत्महत्या केल्ल्या आसुये, अशें कांय जाणांक दिसता.
ही घडणूक शेनवारा सकाळीं बेळगांवांतल्या कॅम्प वाठारांतल्या तांच्या अधिकृत घरांत उक्ताडार आयली. उपरांत वरिश्ठ पुलीस अधिकाऱ्यांनी थंय वचून पळोवणी केली. आतां चवकशी सुरू केल्या.
मूळ चेन्नयचे के आनंद हे भारतीय संरक्षण इस्टेट सर्विस (आयडीईएस) अधिकारी आशिल्ले. फाटलीं देड वर्सां ते बेळगावी छावणी मंडळाचे मुखेल कार्यकारी अधिकारी म्हणून काम करताले. बिरेस्तारा सांजवेळा सावन बंद आशिल्लें घराचें दार शेनवारा सकाळीं मेरेन उक्तें नाशिल्ल्यान शेजाऱ्यांनी कॅम्प पुलिसांक हे विशीं म्हायती दिली, उपरांत पुलिसांनी दार उगडलें आनी घरांत के आनंदाची कूड मेळ्ळी. मराठा लाइट इन्फंट्री रेजिमेंट सेंटराचे ब्रिगेडियर जॉयदीप मुखर्जी, डीसीपी रोहन जगदीश आनी खडे बाजाराचे एसीपी अरुण कुमार कोलूर हांणी थंय भेट दिवन तपासणी केली.
फाटल्या सप्तका सावन बेळगांव छावणी मंडळाच्या कार्यालयांतले भरती प्रक्रियेंत भानगड जाल्ल्याच्या आरोपा वयल्यान सीबीआयची चवकशी चालू आसा. तमिळनाडूंतल्या आनंदाच्या आवय-बापायक हे घडणुकेची म्हायती दिल्या आनी सांजवेळा मेरेन ताची कूड निमाणे संस्कार करपा खातीर तमिळनाडूंतल्या होसूर हांगा धाडटले. के आनंद हांचें लग्न जावंक नाशिल्लें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
