भांगरभूंय | प्रतिनिधी
नवी दिल्ली, खबरां संस्था ः देशांतल्या उत्पादनांत वाड जाल्ल्यान आतां चार दुर्मिळ दुयेंसांची वखदां खूब सवाय दरांत उपलब्ध जाल्यात. भारतीय फार्मा कंपनीं आतां म्हारग आयात केल्ल्या म्हत्वाच्या फॉर्मूलेशनांचेर आदारून रावप उणें करतात, अशें केंद्रीय भलायकी मंत्रालयाच्या अधिकाऱ्यांनी शुक्रारा स्पश्ट केलें.
सिकल सेल अॅनिमिया सयत 13 दुर्मिळ दुयेंसां संबंदीत कारवाय करपाचेर मंत्रालयान लक्ष केंद्रीत केल्ल्यान हे दर उणे जाला. सिकल सेल अॅनिमिया सयत टायरोसिनिमिया टायप-1, गौचर दुयेंस, विल्सन दुयेंस आनी ड्रॅव्हेटलेनॉक्स गॅस्टॉट सिंड्रोम ह्या चार दुयेंसांच्या वखदांक मान्यताय दिला. तांचें उत्पादन देशी पद्दतीन तयार करतात. तीन दुयेंसा खातीर – फेनिलकेटोनूरिया खातीर टॅबलेट सप्रॉपटेरिन, हायपरॅमोनेमिया खातीर सप्रोप्टेरिन, कार्ग्लुमिक अॅसिड आनी गौचर दुयेंसा खातीर कॅप्सूल मिग्लस्टॅट ही चार वखदां मान्यताय दिवपाचे प्रक्रियेंत आसात.
एप्रील 2024 वर्सा मेरेन ही वखदां मेळपाची शक्यताय आसा. हीं वखदां देशी आशिल्ल्यान टायरोसिनिमिया टायप-1 ह्या दुयेंसाचेर उपचार करपाखातीर निटिसिनोन कॅप्सूलांचो वर्सुकी खर्च कितलेशेच पटींनी उणो जातलो. देखीक, आयात केल्ल्या कॅप्सूलांची खरेदी करपाचो वर्सुकी खर्च 2.22 कोटी रुपया आसा. पूण आतां स्वदेशी कॅप्सूल फक्त 2.5 लाख रुपयांक मेळटले.
मार्च म्हयन्यां सावन हायड्रॉक्सीयुरिया सिरपाची पुरवण
सिकल सेल अॅनिमियाचेर उपचार करपाक वापरिल्ल्या हायड्रॉक्सीयुरिया सिरपाची वेपारी पुरवण मार्च 2024 वर्सा मेरेन सुरू जावपाची शक्यताय आसा. तात्पुरतो दर 405 रुपया दर बाटलेक आसतलो. एक दुर्मिळ दुयेंस ल्हान लोकसंख्येंत पातळटा. पूण देशांतल्या 6-8 टक्के लोकांक सामुहीकपणान ताचो त्रास जाता आनी भारतांत 8.4-10 कोटी प्रकरणां अशीं आसूं येतात अशें अधिकाऱ्यांनी सांगलें. ह्या दुयेंसातले सुमार ८० टक्के दुयेंस वंशपरंपरेन जावपी आसतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
