शाळा विलीनीकरण मॉडेल आतां देशभरांत चालीक

भांगरभूंय | प्रतिनिधी

नवी दिल्ली, खबरां संस्था ः देशभरांतल्या शिक्षणाचो दर्जो सुदरावपा खातीर मध्य प्रदेशाचें ‘एक शाळा-एक परिसर’ मॉडेल देशभर चालीक लावंक शकता. निती आयोगान 50 परस उणी संख्या आशिल्ल्या शाळांचे व्हड शाळांनी विलीनीकरण करपाक जाय अशी सगल्या राज्यांक शिफारस केला.
शाळांतल्या शिक्षणाचो दर्जो सुदरावपाच्या हेतान नीती आयोगान 2017 वर्सा SATH-E (मानवी क्षमता-शिक्षण बदलण्यासाठी शाश्वत कृती) प्रकल्प सुरू केलो. मध्य प्रदेश, झारखंड आनी ओडिशा ह्या तीन राज्यांनी ताची अंमलबजावणी केली.

अहवालांतल्यो सुचोवण्यो….
देशांत 10 लाखां परस चड शिक्षकांचो उणाव आसा. हाचेर मात करपा खातीर 50 परस उणी संख्या आशिल्ल्या शाळांचे विलीनीकरण करपाक जाय. जायत्या राज्यांनी 30-50% शिक्षक पदां रितीं आसात. गांवगिऱ्या वाठारांनी शिक्षकांचो व्हड उणाव आसा. शिक्षकांची भरती करपाक प्राधान्य दिवचें पडटलें.
थोड्या अंतराचेर आशिल्लीं शाळा एकठांय करून तांची व्हड शाळांनी उदरगत करा. येरादारी सुविधां पसून विद्यार्थ्यांच्या प्रवेशात सुदारणा करा. ब्लॉक पांवड्या मेरेन यंत्रणा तयार करा, जंय शिक्षक तशेंच वरिश्ठ अधिकारी दरेक पांवड्यार जापसालदार आसतले.

मध्य प्रदेश 4 वर्सांत 12वे सुवातेर पावलो
शाळेच्या शिक्षणांत मध्य प्रदेश 2017 वर्सा 17वे सुवातेर आशिल्लो. आतां पांचवे सुवातेर आयला, राज्यान चार वर्सांत 12वे सुवातेर उडी मारली. हें सगळें एक शाळा-एक परिसर खाला घडलें. शाळा दर्शना खाला अधिकाऱ्यांनी शाळांच्या मुळाव्या साधनसुविधा आनी शिक्षणाची पळोवणी केली. शाळेंतल्यान फोटो धाडप सक्तीचें केलें. जाचो परिणामूय दिसलो. हाचे भायर सीएम रायज शाळा सुरू जाली. हेर शाळांच्या तुळेंत दर वर्सा प्रवेश 4% वाडत आसा. 10 वे चो निकाल सामान्य शाळां परस 5 टक्के चड लागता. ह्या प्रकल्पा खाला मध्य प्रदेशांतल्या 35 हजार शाळांचें विलीनीकरण 16 हजार शाळांनी जालें.
हमारा घर हमारा विद्यालय खाला कोविडाच्या काळांत रेडिओ-टीव्ही आनी इंटरनॅटावरवीं शिक्षण दितालें. 2017 ते 2021 मेरेन 13 हजार शिक्षकांची भरती जाली. मध्य प्रदेशांतल्या 84 हजार मुळाव्या शाळांतल्यान 39 हजार शाळांनी 40 परस उणे विद्यार्थी आशिल्ले. एक शाळा एक परिसर खाला शाळा विलीनीकरण करून सध्या 35,113 शाळा कार्यरत आसात.