भांगरभूंय | प्रतिनिधी
लग्नाचो विशय काडलो काय, ‘पयलीं लग्न तुळशीचें, मागीर म्हजें’ हीं उतरां आंकवारां कडल्यान खूप फावट आयकल्यांच आसतलीं. आमच्या गोंयांत परबांक खाशेलें म्हत्व. जशी चवथ तशीच दिवाळी. गोंयांत दिवाळी दोन तरांनी मनयतात. धाकटी आनी व्हडली दिवाळी. नरकासुराचें दहन केले उपरांत येता ती धाकटी दिवाळी आनी व्हडली दिवाळी म्हळ्यार तुळशीचें लग्न. ह्या दिसा तुळशीचें लग्न लायतात. घराघरांनी आशिल्ल्या तुळशीक सजयतात. तुळशी सभोंवतणी मंडप तयार करतात. रोजां आनी फुलांनी तिका सजयतात. भितर ऊस, चिंच तशेंच आंवाळे दवरतात. अंतरपाठ धरून मंगलाष्टकां म्हणून तुळशीचें विष्णू वांगडा लग्न लायतात. हें लग्न जालें कांय हिंदू धर्मांत लग्नकार्याक सुरवात जाता.
तुळशीचें लग्न हें हिंदू धर्मा भितर एक मोटो सुवाळो जावन आसा. परंपरा, रिती सांबाळून वेवस्थित पद्धतीन केल्यार निश्चित बरें फळ मेळटाच. हिंदू मदीं तुळशीच्या झाडाक एक आगळें वेगळें म्हत्व आसा. दर एका घराच्या आंगणांत वा दारा भायर तुळस ही आसताच. पयलीं चवक्यांचीं घरां आसतालीं आनी मदीं व्हडली तुळस. देवळा भायर लेगीत तुळस आसता. तुळशीक देवाचें स्थान आसा. जितलें तिचें पावित्र्य व्हड, तितलेंच तिजें मोल. सत्यनारायण पूजेक तुळशी नात जाल्यार ही पूजा पावन जायना. विष्णूक तुळशी तितल्योच आवडीच्यो, जितल्यो गणपतीक दुर्वा. हिंदुंच्या घरा भायर तुळस ही आसताच. जागो नासत जाल्यार कुंड्यांनी तरी लोक तुळस रोयताच.
तुळस म्हळ्यार पावित्र्याचें वास्तव्य. जितलें तिका धार्मिक नदरेन म्हत्व आसा, तितलेंच वखदी म्हत्वय आसा. थंडी जाल्यार काडो, कसाय ही तुळशीचीं पानां, कणसां वापरून करतात. ताका वखदी गुण आशिल्ल्यान दुयेंस पयस जाता. पर्यावरण नितळ उरपाक तिचो आदार जाता. आयजकाल तुलसी युक्त स्किन क्रीम, फेसवॉश, हँडवॉश आनी जायत्यो वस्तू मेळटात. ताचें म्हत्व खबर आशिल्ल्यान ह्यो तुलसी युक्त वस्तू लोकांनी आपणांयल्यात. गोयकारांची च्या म्हणटा ती सामकी घोस्ताची. च्या शिजताना जर तुळशी पानां वा कणसां तर च्यात घालीत जाल्यार एक वेगळोच स्वाद मेळटा आनी तुळशीच्या वासान तर घर सामकें परजळटा. मनशाक मरण येतकंच लेगीत तोंडान तशेच आंगार तुळशी ची माळ घालून पवित्र्य आत्म्याक शांती प्रदान करतात. दारांत तुळस आसप म्हळ्यार सुख, समृद्धी आनी धनाची कृपा घराचेर उरता. तशेच जिवितांतले सगळे दुःख, क्लेश पयस जातात. दर एका झाडाक आपलें अशें खाशेलें म्हत्व आसा तांची राखण करप ही आमची जापसालदारकी. सगळ्यांक तुळशी लग्नाचीं परबीं.
शिल्पा लाड
8411007204
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
