भांगरभूंय | प्रतिनिधी
भांगरभूंय । प्रतिनिधी
दिवचलः विठ्ठलापूर- साखळी हांगा आयतार 26 नोव्हेंबराक त्रिपुरारी पुवन व्हडा दबाज्यान मनयतले. ह्या उत्सवाची तयारी पुराय जायत आयल्या. नौकानयन हे ह्या उत्सवाचें मुखेल आकर्शण आसा. राज्य पावंड्या वयले हे सर्तींत फकत पर्यावरणपूरक अश्या बोटींक प्रवेश दितले. न्हय आनी पर्यावरण प्रदूशण मुक्त दवोरपा खातीर सरकारा वतीन व्हो निर्णय घेतला. मयेंचो आमदार प्रेमेंद्र शेट हांणे दिवचले घेतिल्ले एके पत्रकार परिशदेंत ही म्हायती दिली.
कला आनी संस्कृती खातें, पर्यटन उदरगत म्हामंडळ, दिपावली उत्सव समिती विठ्ठलापूर आनी विठ्ठळ रखुमाई देवस्थान समिती हांच्या जोड पालवान त्रिपुरारी पुनव आनी नौकानयत सर्त आयोजीत केल्या. हे सर्ती खातीर 35 हजार रुपयाचें पयलें, 30 हजाराचें तिसरें, 25 हजारांचें चवथे आनी 20 हजाराचें पांचवे इनाम दवोरला. 10 सर्तकांक दरेकी पांच हजारांनी उमेद वाडोवपी इनामां दितले. सर्तींत वांटो घेवपी पंगडाक दरेकी 4 हजार रुपया दितले.
नौकानयत सर्ती वांगडाच लोकांचे मनरिजवणे खातीर विठ्ठल रखुमाई मंदिर आवाठांत भावगीत, भक्तिगीत, पोवाडे, नाच आनी महेश सोनुर्लेकार हांची सांस्कृतीक कार्यावळ जातली. गोंय सरकारान व्हो उत्सव पुरस्कृत केला. नौकानयत सर्तीक मुख्यमंत्री डॉ प्रमोद सावंत, कला आनी संस्कृती मंत्री गोविंद गावडे, पर्यटन मंत्री रोहन खवंटे, पर्यटन उदरगत म्हामंडळाचो अध्यक्ष गणेश गांवकार, पर्येची आमदार दिव्या राणे हाजीर रावतली.
त्रिपुरारी पुनवे निमतान 26 नोव्हेंबराक सांजे 6 वरांचेर विठ्ठलापूर पेडा कल्यान दिंडीं पंगडा सयत श्रीकृष्णाची मिरवणूक काडटले. ती व्हाळवटी न्हंय देगेर आयल्या उपरांत सुहासिनीं कडल्यान दीपदान करतले. श्रीकृष्णाची मूर्ती व्हाळवटीचे मदीं विराजमान करतले आनी नौकानयत सर्त सुरू जातली. ताचे पयलीं न्हंयच्या पात्रांत खासा उबारल्ले माचयेर दशावतारी कलाकारां कडल्यान त्रिपुरासुराचो वध व्हो प्रसंग सादर करतले. ह्या वेळार मळबांत सरंगे सोडटले अशें शैलैश फातर्पेकारान सांगलें. पत्रकार परिशदेक सर्वणचो सरपंच दत्तप्रसाद सारकांडे, पंच वांगडी ज्ञानेश्वर बाळे, संतोष गुरव दिपावली उत्सव समितीचो अध्यक्ष दिनेश उसपकार आनी सोमनाथ मोरजकार हाजीर आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
