भांगरभूंय | प्रतिनिधी
नवी दिल्ली, खबरां संस्था: डीपफेक व्हिडियो जावचे न्हय हे खातीर नेम लागू करपाची तयारी सरकार करता. केंद्रीय मंत्री अश्विनी वैष्णव हांणी आयज पत्रकार परिशदेंत हे विशीं म्हायती दिली. लोकशायेक एक नवो धोको म्हणून डीपफेक मुखार आयल्यात अशें तांणी सांगलें.
आयज आमी सगळ्या सोशल मिडिया प्लॅटफॉर्मांक बसके खातीर आपयल्यात अशें केंद्रीय मंत्र्यान सांगलें. सगळ्यांचेर चर्चा जाली आनी सगळ्यांनी डीपफेक हो एक मुखेल समाजीक धोको आनी ताच्या खरपणाचेर एकमत जालें.
प्रधानमंत्री नरेंद्र मोदी हांणी १७ नोव्हेंबराक डीपफेकांचेर हुस्को उक्तायलो. एका व्हिडियोंत म्हाका गरबा गायतना दाखयल्लो, जायते व्हिडियो ऑनलायन उपलब्ध आसात अशें तांणी सांगिल्लें.
फुडल्या सप्तकांत मसुदो तयार जातलो
अश्विनी वैष्णव हांणी म्हणलें, ‘डीपफेक संबंदी नव्या नियमनाची गरज आसा आनी ताचेर बेगोबेग कारवाय जातली. फुडल्या सप्तकांत नेमांचो मसुदो तयार करपाचे यत्न करतले. जाका लागून समाज आनी समाजीक संस्था वाचोवपाचें काम बेगीनांत बेगीन करपाक मेळटलें.
आमी ४ गजालींचेर एकठांय काम करचें पडटलें. पयलें पोस्ट करचे पयलीं डीपफेक कसो थांबवचो, दुसरें डीपफेक व्हिडियो व्हायरल जावपाक कशे आडावप, तिसरें अहवाल दिवपाची पद्दत कशी सुदारची, चवथी जागृताय करपा खातीर एकठांय काम करप.
निर्मातो आनी प्लॅटफॉर्म हांचे मदीं जापसालदारक्यो दितले
डीपफेक्साच्या निर्मात्यांची आनी तांकां येजमानकी दिवपी प्लॅटफॉर्माची जापसालदारकी थारायतले अशें वैष्णव हांणी सांगलें. नवे नेम, नवे कायदे वा सद्याच्या नेमां मदीं दुरुस्ती करून नियमन हाडूं येता अशें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
