भांगरभूंय | प्रतिनिधी
मुंबय, खबरां संस्था ः आरबीआयचे गव्हर्नर शक्तिकांत दास हांणे मुंबयंत जाल्ल्या एफआयसीसीआय कार्यावळीत जागतीक अनिश्चिततायेक लागून धोरण निर्मात्यां खातीर आनी अर्थीक क्षेत्रा खातीर आव्हानां वाडयल्यात अशें सांगलें. चालू अर्थीक वर्सा (2023-24) आनी फुडल्या अर्थीक वर्सा (2024-25) जीडीपी वाडपाचो अदमास 6.5 टक्क्यांनी आसा अशें तांणी सांगलें. हाचे भायर म्हारगायेचो दर 4 टक्क्यां मेरेन देंवोवपाचेर आरबीआय लक्ष केंद्रीत करता अशेंय तांणी सांगलें.
आमच्या म्हारगायेच्या लक्ष्याचेर आमी नदर दवरतात. चलनविशयक धोरणांत नियंत्रण दवरप हें आमचे प्राधान्य आसतलें. धोरणात्मक निर्णयांत वाडी परस म्हारगाय नियंत्रणाक प्राधान्य दितले. किरकोळ म्हारगाय उणी करपा खातीर जायतीं पावलां उबारल्यांत. रुपयांतली अस्थिरताय उणी आसून स्थिरताय आसा तशीं आसा. अर्थीक आनी दरांच्या स्थिरताय कडेन आरबीआयची समतोल भुमिका आसा.
शेतकी मळार सुदारणा करपाची गरज आसा. पावस उणो आसून लेगीत शेतकी मळार स्थिरताय दिसून येता. खाजगी क्षेत्राक शेतवडींत गुंतवणूक करपाची संद निर्माण जावपाक लागल्या.
ऑक्टोबरांत ठोक म्हारगाय 4.87%
ऑक्टोबरांत किरकोळ म्हारगाय 4.87 टक्क्यांनी देंवली. सप्टेंबरांत 5.02% आशिल्ली. जाल्यार ताचे आदीं ऑगस्टांत 6 टक्क्यां वयर आशिल्ली. किरकोळ म्हारगाय 4 टक्क्यांचेर उरची अशें आरबीआयक दिसता. अंदूं (2023) आतां मेरेन खंयच्याच म्हयन्यांत किरकोळ म्हारगाय 4% वा ताचे परस उणी जावंक ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
