भांगरभूंय | प्रतिनिधी
जीत आरोलकारः जानेवारींत पेडणें खातीर युवा महोत्सव
भांगरभूंय । प्रतिनिधी
पेडणें: मांद्रें मतदारसंघांत पर्यायान पेडणें म्हालांतल्या कलाकारां खातीर रोखडेंच माद्रें मतदारसंघांत कला भवन बांदतले. ते भायर मांद्रें उदरगत संस्थे खाला जे तरेन दीपोत्सव व्हड उमेदीन मनयलो. ह्या येसस्वी आयोजना उपरांत नातळां लेगीत भौशीक पद्दतीन मनयतले. जानेवारींत पेडणें म्हाला खातीर युवा महोत्सवाचें आयोजन मांद्रें उदरगत संस्थे वतीन करतले, अशी म्हायती मांद्रेंचे आमदार जीत आरोलकार हांणी दिली.
दीपोत्सवा निमतान पेडणें म्हाल मर्यादीत आकाशदिवो सर्त, रांगोळी सर्त आनी पाक कला सर्तीचें आयोजन केल्लें. ताचो इनामां भेटवण सुवाळो मांद्र्यां आमदार आरोलकार हांच्या कार्यालयांत जालो. ह्या वेळार ते उलयताले.
ह्या वेळार माचयेर दीपोत्सव आयोजन समितीचे अध्यक्ष अजीत मोरजकार, महिला अध्यक्ष सुनिता बुगडे देसाय, पंच सागर तिळवे, लक्ष्मीकांत गवंडी, पंच नायक हाजीर आशिल्ले.
पेडणें म्हाल मर्यादीक आकाशदिवो सर्तीचें पयलें इनाम महेश खडजी, रांगोळी सर्तीचें पयलें इनाम दीपेश नायक जाल्यार पाक कला सर्तीत सविता सावंत हांकां पयलें इनाम फावो जालें. जैतिवंतांक आमदार आरोलकार हांचे हस्तुकीं इनामां भेटयलीं.
आकाशदिवो सर्तींत दुसरें इनाम श्रद्धा आरोसकार, तिसरें इनाम यतीन शेट्ये, जाल्यार प्रसाद पाळणी, विवेक गावडे, अजीत बगळी आनी समर्थ कांसकार हांकां उमेद वाडोवपी इनामां दिलीं.
पेडणें मर्यादीत रांगोळी सर्तींत दुसरें इनाम अर्जिता परब, तिसरें इनाम वेदिका तेली जाल्यार अक्षता सावंत, स्नेहश्री कोरगांवकार आनी शुभ्र शेट्ये हांकां उमेद वाडोवपी इनामां फावो जालीं.
मांद्रें मतदारसंघ मर्यादीत पाक कला (फोव आनी फराळ) सर्तींत दुसरें इनाम प्रगती नायक, तिसरें सीमा डिसोझा जाल्यार सुरत च्यारी, रेखा कळंगूटकार, स्मिता सावंत हांकां उमेद वाडोवपी इनामां भेटयलीं.
मांद्रें मतदारसंघाचे उदरगती वांगडाच संस्कृती तिगोवपा खातीर वेगवेगळ्या कार्यावळींचें आयोजन म्हत्वाचें आसा. जे तरेन दीपोत्सव येसस्वी केलो तसोच नातळां लेगीत करचीं. ह्याच खाजन गुंडो वाठारांत वेगवेगळीं नकेत्रां आनी क्रिस्तांव धर्माचे परंपरे प्रमाण विविध सर्तींचें आयोजन करतले, अशें आरोलकार हांणी सांगलें.
मोपा विमानतळ संबंदांत आदल्या लोकप्रतिनिधी, आमदार, मंत्र्यांनी कंपनी वांगडा तशेंच सरकारा वांगडा वेवस्थीत कबलात केल्ली जाल्यार भुंयपुतांचेर अन्याय जावचो नाशिल्लो. अन्याय जाल्ल्या पिडेस्त शेतकारांक फुडारांत मांद्रें मतदारसंघांत येवपी प्रकल्पांत पेडणेंच्या भुंयपुतांक रोजगार मेळोवन दिवपाचो आपलो यत्न आसतलो. इलेक्ट्रीक सिटी आनी तुयें हॉस्पिटलांत लेगीत रोजगाराची संद दिवपाचो आपूण यत्न करतलों. भलायकेची, वीज- उदकाची समस्या सुटावी करचे खातीर सरकार दरबारांत यत्न करतलों. फुडल्या कांय काळा भितर मांद्रें मतदारसंघांतले रस्ते हॉटमिक्स करतले, अशें आरोलकार हांणी सांगलें. ह्या वेळार माचये वयल्या मानेस्तांचींय उलोवपां जालीं.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
