बरी पटकथा आशिल्लेच चित्रपट स्विकारले

भांगरभूंय | प्रतिनिधी

सनी देओलः बॉलिवूडांतल्या प्रवासा विशीं खोलायेन म्हायती

भांगरभूंय । प्रतिनिधी

पणजीः आपूण चित्रपटांत अभिनय करपाक आयिल्लों. केन्नाच स्टार जावपाचें नाशिल्लें. तेच खातीर आपणे फक्त बरी पटकथा आशिल्लेच चित्रपट स्विकारले, अशें अभिनेतो सनी देओल हांणी सांगलें.

मंगळारा इफ्फीच्या  ‘इन कॉन्व्हर्सेशन’ ह्या सत्रांत सनी देओल उलयतालो. ह्या वेळार दिग्दर्शक राजकुमार संतोषी, अनिल शर्मा आनी राहुल रवैल हाजीर आशिल्ले. सनी देओलान आपल्या बॉलिवूडांतल्या प्रवासा विशीं म्हायती दिली.

तुमच्या हातार हून पडटलें हे कळटकच तुमी तो हात आपसूक फाटीं ओडटात. चित्रपटाचे बाबतींत आपलेंच अशेंच जाता. पटकथा वाचले उपरांत आपल्याक एकाचो चित्रपट बरो जातलो काय ना ताची कल्पना येता. हे प्रेरणेच्या आदारान आपूण बऱ्या चित्रपटांची निवड केली. हाचो आपल्याक सदांच फायदो जालो. अर्थान आपले सगळेच चित्रपट बरे चलूंक नात, हेंवूय तितलेंच खरें, अशें सनी देओलान सांगलें.

‘गदर’ चित्रपटाक बरें येस मेळ्ळें. मात ते उपरांतचो काळ आपले खातीर खूब आव्हानात्मक आशिल्लो. त्या काळांत आपूण खूब भावनीक जाल्लों. आपल्याक बरे चित्रपट मेळूंक नात. कांय चित्रपट केले. मात तातूंतले थोडे चल्ले. ह्या काळांत सकारात्मकता कायम दवरली. नकारात्मकता कुशीक दवरून काम करीत रावलों. ‘गदर’ उपरांत सुमार 20 वर्सांनी ‘गदर 2’ ह्या चित्रपटाक लागून आपल्याक परतून येस मेळ्ळें, अशें सना देआलोन अदीक म्हायती दितना सांगलें. दिग्दर्शक अनील शर्मान सांगलें, सनी देओल हो एकाच वेळार मवाळ आनी आक्रमकता आशिल्लो अभिनेतो आसा. बरी पटकथा दिली जाल्यार तो त्या चित्रपटाचें भांगर करपाक शकता. मात दुर्दैवान बॉलिवूडांतल्या खूबश्या दिग्दर्शकांक ताची तांक कळूंक ना. तो वन मॅन आर्मी आसा आनी वेळावेळार तें ताणें सिद्ध करून दाखयलां.

‘हिंदुस्तान जिंदाबाद’ डायलॉगाचेर प्रेक्षक खूश

‘इन कॉन्व्हर्सेशन’ ह्या सत्रांत उलयतना सनी देओलान ‘गदर’ चित्रपटांतलो चित्रपटातील ‘हिंदुस्तान जिंदाबाद था, है और रहेगा’ हो डायलॉग उलोवन दाखयलो. तशेंच ‘दामिनी’ चित्रपटातलो ‘ये ढाई किलो का हात’ हो डायलॉग लेगीत म्हणलो. ह्या दोनूय डायलॉगांक प्रेक्षकांनी टाळयो मारून दाद दिली.

धर्मेद्र खूब शिस्तीचे

धर्मेंद्र हे खूब शिस्तीचे आशिल्ले. ल्हानपणांत मस्ती केल्लयार ते आमकां ख्यास्त दिताले. अशेंच एकदां ताणें आपल्याचेर कानसुलार फुलयिल्लें. त्या वेलार ताचीं तीन बोटां पोल्यार उदेल्ली, असोय उगडास सनी देओलान सांगलो.

‘घायल’ सोदतालो निर्मातो

‘घायल’ चित्रपटाक निर्मातो मेळानाशिल्लो. आपूण आनी दिग्दर्शक राजकुमार संतोषी खूबश्या निर्मात्यां कडेन वचून आयले. मात कोणेच चित्रपटाक पसंती दिवंक ना. अखेर आपणे ही गजाल धर्मेंद्राक सांगली. अखेर ताणेंच चित्रपटा खातीर निर्मातो म्हूण काम करपाचें थारायलें, अशी म्हायती सनी देओलान दिली.