भांगरभूंय | प्रतिनिधी
मुंबय, खबरां संस्था : स्वातंत्र्या पयलीं ब्रिटीशांनी आयात केल्ल्यो वा ते सोडून गेल्ल्यो मेजक्योच मोटारसायकली १९७० च्या दशकांत नदरेक पडटाल्यो. बीएसए कंपनींच्यो मोटारसायकली गिरेस्तांच्यो गॅरेजी सोबयताल्यो.
रॉयल एन्फिल्ड बुलेट लेगीत कांय मेजक्याच लोकां कडेन आसताली. उपरांत एक नवी मोटारसायकल बाजारांत आयली. ती चलोवपाक सोपी आशिल्ली. तिचें वजनूय उणें आशिल्लें आनी तातूंत नवो कार्बोरेटर डिझायन वापरिल्लो. फकत शारांतूच न्हय तर गांवगिर्या वाठारांतूय ही मोटारसायकल विकती घेवपा खातीर गिरायकांक बरेच म्हयने वाट पळोवची पडटाली. तिच्या लुकांतूय खूब बदल आसलो.
ही गजाल राजदूत मोटारसायकलीची. राजदूत म्हणून प्रदर्शीत जाल्ले हे मोटारसायकलाचें पुराय नांव ‘राजदूत एक्सेल टी’ अशें आशिल्लें. एका काळार देशाच्या रस्त्यांचेर दिसपी ही मोटारसायकल तीस वर्सां परस चड काळ बाजारांत उरली. एक्सकॉर्ट आनी यामाहा हांणी संयुक्तपणान ही मोटारसायकल तयार केली. उपरांत यामाहा कंपनीच्यो हेर मोटारसायकलीय बाजारांत आयल्यो. आयज राजदूत परतून खबरांनी येवपाचें कारण म्हणल्यार रस्त्याची राणी अशें म्हणपी ही सायकल परतून येवपाक सज्ज आसा. आतां एक्सकॉर्ट फकत ट्रॅक्टर आनी हेर वेपारी वाहनां तयार करता. पूण नव्या डिझायनान आनी तंत्रगिन्यानाच्या आदारान राजदूताची तयारी सुरू आसा अशें समजता.
राजदूत परत येतली हे विशीं कंपनीन आजून कसलेंच अधिकृत विधान करूंक ना. पूण, मेळिल्ले म्हायती प्रमाण येवपी एका वर्सांत ही मोटारसायकल सादर करतले. उपरांत कांय काळांत ती लॉंच करून ताची डिलिव्हरी सुरू करतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
