भांगरभूंय | प्रतिनिधी
रस्त्यार गाडी चलयतना तुमचे कडेन ड्रायव्हिंग लायसन्स आसप सक्तीचें. तें वळखपत्र म्हणूनय वापरूं येता. पूण, आतां तुमी तुमचें ड्रायव्हिंग लायसन्स वापरून परदेशांत गाडी चलोवंक शकतात.
यूएसए
अमेरिकेंतल्या चडशा राज्यांनी भारतीय वाहन चालक लायसन्स आशिल्ल्या मनशाक भाड्याची गाडी चलोवंक मेळटा. पूण, परवानो इंग्लीश भाशेंत आनी कायदेशीर रितीन वैध आसूंक जाय. तो आसल्यार गाडी चलोवचे पयलीं आय- 94 फॉर्म भरचो पडटलो. ह्या फॉर्मांत तुमची यूएसांत येवपाची तारीख आसतली. सगळ्या म्हत्वाच्या कागदपत्रां सयत अमेरिकेंत भारतीय ड्रायव्हिंग लायसन्स एक वर्सा खातीर वैध आसा.
जर्मनी
तुमी भारतांतल्यान जर्मनीचे भोंवडेर गेले आनी तुमकां गाडी चलोवपाची आसल्यार स म्हयने भारतीय ड्रायव्हिंग लायसन्साचेर गाडी चलोवंक मेळटा. तशेंच भारतीय ड्रायव्हिंग लायसन्स फकत इंग्लीश वा जर्मन भाशेंत आसपाक जाय. सुरक्षे खातीर गरजेचे सगळे कागदपत्र सदांच तुमचे कडेन दवरात.
ऑस्ट्रेलिया
ऑस्ट्रेलियेचे कांय वाठार, जशे की न्यू साउथ वेल्स, क्वीन्सलँड, दक्षीण ऑस्ट्रेलिया, राजधानी वाठार (Capital Region) हांगा भारतीय ड्रायव्हिंग लायसन्स स्वीकारतात. तशेंच ताचो काळ तीन म्हयने आसतलो. म्हत्वाचें म्हळ्यार हे लायसन्स इंग्लीश भाशेंत आसतले. भारतीय ड्रायव्हिंग लायसन्स इंग्लीशींत ना जाल्यार सहजतायेन ते इंग्लीशींतल्यान मेळूं येता.
यूके
युनायटेड किंगडमांत भारतीय ड्रायव्हिंग लायसन्स एक वर्स वैध आसता. सरकार भारतीय ड्रायव्हिंग लायसन्स धारकाक फकत वेंचून काडिल्लीं वाहनां चलोवपाची परवानगी दिता. तशेंच सुरक्षे खातीर ड्रायव्हिंग लायसन्स संबंदीत सगळे गरजेचें कागदपत्र सगळ्या वेळार तुमचे कडेन दवरात.
कॅनडा
भारतीय ड्रायव्हिंग लायसन्स आशिल्ल्या मनशाक कॅनडांत 60 दिसां खातीर गाडी चलोवंक मेळटा. तशेंच तुमचो परवानो इंग्लीश भाशेंत आसपाक जाय. मुखेल गजाल म्हळ्यार त्या मनशान कॅनडांत प्रवेश केल्ली तारीख सांगपी अतिरिक्त कागदपत्रां व्हरपाक जाय. पूण, भारतीय ड्रायव्हिंग लायसन्स कॅनडांत 60 दिसां खातीर म्हळ्यार फकत दोन म्हयन्यां मेरेन वैध आसा. ते उपरांत कॅनडांत गाडी चलोवपा खातीर कॅनडियन ड्रायव्हिंग लायसन्स आसप गरजेचें.
देखून ह्या पांच देशांत भेट दिल्या उपरांत भारतीय ड्रायव्हिंग लायसन्स वापरून परदेशांत गाडी चलोवपाचो आनंद घेवंक मेळटा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
