भांगरभूंय | प्रतिनिधी
इंडियन कौन्सिल ऑफ मेडिकल संशोधनाचो दावो
नवी दिल्ली, खबरां संस्था ः कोविड-19 लस घेतल्या कारणांन देशांतल्या तरणाट्यांक अचकीत मरण येवपाचे प्रमाण वाडूंक ना असो दावो इंडियन कौन्सिल ऑफ मेडिकल संशोधनान एका अभ्यासांत केला. अभ्यासा प्रमाण हॉस्पिटलांत दाखल जावप, अचकीत मरण येवपाचो कुटुंबीक इतिहास आनी कांय जिणे पद्दतीच्या सवयींक लागून कोरोनाच्या काळांत अचकीत मरण येवपाचें प्रमाण वाडले.
हे जिणे पद्दतीच्या संवयींनी मरणा पयलीं 48 वरां सतत सोरो पियेवप, ड्रग्स वा हेर खंयचेय मादक पदार्थांचे सेवन करप आनी मरणा पयलीं 48 वरां वेगवेगळ्या प्रकारचीं खर शारिरीक क्रियाकलाप करप हांचो आस्पाव जाता. तशेंच लसीचो एक डोस घेतिल्ल्या लोकां मदीं अशें अचकीत मरण येवपाचो धोको उणो जावं शकता अशें अहवालांत म्हणलां.
47 हॉस्पिटलांनी अडेज वर्साचो अभ्यास
1 ऑक्टोबर 2021 ते 31 मार्च 2023 ह्या काळांत देशभरांतल्या 47 मुखेल हॉस्पिटलांनी हें संशोधन केलां. ह्या अभ्यासांत 729 प्रकरणां आनी 2,916 नियंत्रणा आशिल्ली. ह्या अभ्यासांत 18 ते 45 वर्सां पिरायेच्या लोकांचेर भर दिल्लो, जे भलायकेन निरोगी आशिल्ले आनी तांकां खंयचेच व्हडलें दुयेंस नाशिल्लें, तरी लेगीत अज्ञात कारणांक लागून तांका अचकीत मरण आयलें.
ह्या अभ्यासांतल्यान अशेंय दिसून आयलां की ज्या लोकांनी हे लसीचे दोन डोस घेतिल्ले तांकां अचकीत मरण येवपाची शक्यताय उणी आशिल्ली, जाल्यार एक डोस घेतिल्ल्यांक अचकीत मरण येवपाची शक्यताय मात्शी चड आशिल्ली. फेब्रुवारींत स्टॅनफोर्ड विद्यापिठान एक अहवाल उजवाडायल्लो की भारतान कोरोनाच्या काळांत व्हड प्रमाणांत राष्ट्रीय लसीकरण मोहीम चालीक लावन 34 लाखां परस चड लोकांचो जीव वाटावपाक येस मेळयलां. लस मोहिमेक लागून अर्थवेवस्थाय बरी जावंक पावली आनी ताचे वायट परिणाम उणे जाले आनी ताका लागून १८.३ अब्ज डॉलरांचें (१५.१७ लाख कोटी रुपया) लुकसाण जावंक ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
