भांगरभूंय | प्रतिनिधी
पिठाचे दर वाडपाची शक्यताय
नवी दिल्ली, खबरां संस्था ः गंवाचें उत्पादन ४ टक्क्यांनी उणें जावं शकता. देशांत गंव पेरपाचो वाठार उणो जाले उपरांत गंवाचे उत्पादन सुमार 10 कोटी टन इतलेंच उरूंक शकता. फाटल्या वर्सा (2022-23) गंवाचें उत्पादन 11.05 कोटी टन आशिल्लें. सरकारी आंकडेवारी प्रमाण, 3 नोव्हेंबर मेरेन देशांत गंवाच्या खाला आशिल्लो वाठार फाटल्या वर्सा परस 12.6 टक्क्यांनी उणो आशिल्लो. अंदूं पेरणीचें क्षेत्र 3 टक्क्यांनी उणें आसूं शकता. सुमार 3.04 कोटी हेक्टर आसूं येता जे फाटल्या वर्सा तें 3.14 कोटी हेक्टर आशिल्लें.
सीएमआयईच्या अहवाला प्रमाण, गंवाची पेरणी उणी जावपाक दोन कारणां आसात. पयलें म्हळ्यार ह्या वेळार शेतकारांनी चणो चड रोयला कारण चड दर मेळटा. चण्याचें दर 12.3% जाल्यार गंवाचे दर 6.6% वाडल्यात. दुसरें म्हळ्यार एल निनोक लागून देशाच्या मध्य आनी उत्तर भागांत तापमान चड उरलें. ताका लागून दर हेक्टराक गंवाची उत्पादकताय 1% उणी जावन दर हेक्टराक 3480 जाली. मध्य प्रदेश, राजस्थान, महाराष्ट्र आनी गुजरातांत गंवाच्या उत्पादनांत व्हड प्रमाणांत उणाव येवपाची शक्यताय आसा.
गंवाच्या सरकारी सांठ्यांत 36.60% उणाव
ऑगस्टांत गंवाचे दर फाटल्या वर्सा परस 7.6 टक्क्यांनी चड आशिल्ले. दर नियंत्रणांत दवरपा खातीर भारतीय अन्न म्हामंडळ आपल्या बफर स्टॉकांतल्यान गंव बाजारात हाडूंक शकता. गंवाचे मुळावे मोल दर क्विंटलाक 2275 रुपया आसात. बाजारांतलें मोल 2459 रुपया आसा. गंवाचें मुळावें मोल बाजारांतल्या दरापरस उणें आसता. हाका लागून फुडल्या हंगामांत सरकारी गंवाची खरेदी फाटल्या वर्सा परस 26.1 कोटी टन उणी आसूं येता. सध्या देशांत 2.39 कोटी टन गंवांचो सांठो आसा, जो फाटल्या वर्सा 3.77 कोटी टन गंवाच्या सांठ्या परस 36.60 टक्क्यांनी उणो आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
