भांगरभूंय | प्रतिनिधी
भांगरभूंय । प्रतिनिधी
दिवचलः दोडामार्ग सुरुचीवाडी हांगच्या नवकिरण युवा मंचान आयोजीत केल्ले आकाश दिव्याचें उक्ते सर्तींत गोंयांतल्या सर्तकांनी आकर्शक आकाश दिवे तयार करून बाजी मारली. पयलीं स आनी उमेद वाडोवपी चार इनामां गोंयकारांक मेळ्ळीं. हातूंत पिर्ण- बार्देशाचो आदर्श कोरगांवकार हाका 5 हजारांचें पयलें इनाम फावो जालें. 3 हजार रुपयाचें दुसरें इनाम सुर्ला हांगच्या जयंत वोगाणकार आनी 2 हजाराचें तिसरें इनाम पर्यें हांगच्या सनी शिरसाट, देड हजार रुपयाचें चवथें इनाम मोर्लें हांगच्या गितेश गावकार, एक हजार रुपयाचें पांचवें इनाम दिवचलच्या गोकुळदास च्यारी हाणे मेळयलें. विवेक सावंत (पर्ये), स्वयंम मळीक (पर्यें), अमीत नायक (हळदोणे), विवांश सावंत (पर्यें) हांकां उमेद वाडोवपी इनामां फावो जाली.
सैमीक साधन सामुग्रींतल्यान तयार केल्ल्या आकाश दिव्यांचे सर्तींत राजाराम गांवस, सात्विक उगाडेकार, शिवानंद गवत, निकिता बायकार, अखिल पालकार, नवीन गांवकार हांकां पयलीं स आनी स्नेहा किशोर देसाय, स्वप्नील वडावलकार, भावेश माळी, गजानन राणे हांक उमेद वाडोवपी इनामां म्हणून घड्याळां दिलीं. सर्तींत 20 सर्तकांनी वांटो घेतिल्लो. दोडामार्ग, सावंतवाडी तशेंच गोंयच्या सत्तरी, फोडें, दिवचल, बार्देश आनी पेडणे तालुक्यांतल्या सर्तकांनी वांटो घेतिल्लो.
ही सर्त दोडामार्ग बाजारांतल्या पिंपेळेश्वर सभा मंडपांत जाली. लोकांनी आकाश दिवे पळोवपाक गर्दी केल्ली. सर्त येसस्वी करपा खातीर दीपक बुगडे , हर्षद तांबुळकार , सिद्धेश आयनोडकार , प्रशांत कोरगांवकार , प्रभाकर मयेकार , विशाल चव्हाण, राजेश कोरगांवकार काडाओडी काडल्यो. सर्तीचें परिक्षण संदीप गांवस , सागर देसाय आनी अंकुश मिरकार हांणी केलें. इनाम भेटवण कार्यावळीक नाना चांदेलकार, प्रणय मोरजकार, अंकुश मिरकार, सागर देसाय हाजीर आशिल्ले. सूत्रसंचालन संदीप गांवस आनी संजय शिरोडकारान उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
