भांगरभूंय | प्रतिनिधी
खबरां संस्था ः दक्षीण कोरियेंत सुण्यांचें मांस खावपाचेर बंदी घालतले. सत्ताधारी पक्षाचे धोरण मुखेली यू युई-डोंग हांणी ही घोशणा केल्या. खबरां एजन्सी रॉयटर्साचे खबरे प्रमाण, दक्षीण कोरियांत सुण्यांचें मांस खावपा विशींचो वाद संवसारभर कितलेशेच दीस चालू आसा. जनावरां हक्क संघटनाय ताका विरोध करतात.
पशुकल्याण संस्थेच्या म्हणण्या प्रमाण देशांत दर वर्सा 20 लाख सुण्यांक मारतात. त्याच वेळार दर वर्सा सुमार १ लाख टन सुण्यांचें मांस खातात. आतां ल्हवू ल्हवू सुणो खावपी लोकांचो आंकडो उणो जायत आसा. सरकार 2027 मेरेन सुण्यांच्या खावपाचेर पुरायपणान बंदी घालपाचें आसा. हाचे खातीर सरकार अंदूं विधेयक हाडपाचें आसा.
रेस्टॉरंटांत सुण्यांचें मांस विकचें ना
धोरण मुखेल्यान म्हणलें – ह्या कायद्याक लागून वेवसायांत लुकसाण जावपी शेतकार, कसाई आनी हेर लोकांक सरकार पुराय मजत करतले. तशेंच हें मांस विकपी नोंदणीकृत शेतकारांक, रेस्टॉरंट कामगारांक आनी हेरांक लुकसाण भरपाय दितले.
दक्षीण कोरियांत हाचे पयलीं जायते फावटीं सुण्यांच्या मांसा आड विधेयक हाडिल्ले. पूण, ह्या वेवसायाक संबंदीत आशिल्ल्या लोकांच्या विरोधाक लागून ताका मान्यताय मेळूंक नाशिल्ली. नव्या विधेयकांत 3 वर्सांचो वाड कालावधी आनी अर्थीक मजतीची तरतूद जोडल्या.
दक्षीण कोरिया सरकाराच्या आंकडेवारी प्रमाण, देशांत सुमार 1150 सुणी पोसवण केंद्रां आसात. सुण्यांचें मांस दिवपी सुमार 1600 रेस्टॉरंटां आसात. मांस मेळोवपा खातीर 34 कत्तलखाने आसात आनी सुमार 219 कंपनीं सुण्यांचें मांस विकतात.
गॅलप कोरियन सर्वेक्षणां प्रमाण, फाटल्या वर्सा सुमार 64% लोकांनी सुण्यांचें मांस खावपाक विरोध केल्लो. 2015 ते 2022 मजगतीं हें मांस खावपी लोकांचो आंकडो सुमार 20% उणो जालो.
नागालँडांत 2020 वर्सा सुण्यांच्या मांसाचेर बंदी घाल्ली
ह्युमन सोसायटी इंटरनॅशनल हे संस्थेच्या मतान, दक्षीण कोरिया सोडल्यार चीन, फिलीपीन्स, थायलंड, लाओस, व्हिएतनाम, इंडोनेशिया, कंबोडिया आनी भारतांतल्या नागालँड ह्या देशांनी सुण्यांच्या मांसाचो वेपार जाता. 4 जुलय 2020 दिसा नागालँडाच्या मुखेल सचीवान सुण्यांच्या मांसाची आयात- निर्यात करपाचेर बंदी घालपाचो आदेश जारी केलो.
ते भायर सुण्यांचे बाजारपेठ, सुण्यांचें मांस विकप आनी रेस्टॉरंटांनी दवरपाचेर बंदी घाली. तेच वांगडा घोडो, गाय, गाढव आनी माजराचे मांस खावपाक जायत्या देशांनी बंदी आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
