भांगरभूंय | प्रतिनिधी
शांत आनी सुसेगाद राज्य अशी पयलीं गोंयची वळख आशिल्ली. आतां गोंय पयलीं भशेन शांत उरूंक ना.
चोरयो, दरोडे, फटींगपणां तशेंच बायलांचेर अत्याचार जावपाचे प्रमाण आतां हेर राज्यां इतलेंच जालां. घुंवळे वखदांचें प्रमाण तर हुस्को करपा सारखें आसा. गुन्यांवकारी घडणुको वाडत आसतना अपघातांचें प्रमाण भिरांकूळ आसा.
अपघात जावपाची तरेकवार कारणां आसात. हीं कारणां सगल्यांक खबर आसा. तरी लेगीत सरकारा कडल्यान फावो त्या नेटान उपाय येवजण्यो जायनात. तशेंच येरादारी नेमांक पाळो दिवपा सयत सादुरताय बाळगुपा विशीं लोकूय गंभीर नात. लोकसंख्या तशेंच आकाराचे तुळेंत गोंयांत वाहनांचो आंकडो मोठो आसा. लोकसंख्येचो विचार करीत जाल्यार सगल्या राज्यां मदी गोंयांत दुचाकींचो आंकडो सगल्यांत चड आसपाक जाय. हाका लागून सकाळीं आनी सांजवेळार सगल्या शारांनी येरादारीची कोंयडी जाता. राज्यांत भौशीक येरादारी वेवस्था योग्य ना. दुचाकी वाडपा फाटलें हें एक कारण आसा. सकाळीं णवा पयलीं कार्यालयांत आनी रातीं साता उपरांत बशींतल्यान घरा पावप अशक्य जाता. कोरोना म्हामारी उपरांत तर येरादारी वेवस्था सामकीच कोलमडल्या. हाचेर सरकाराक किदें तरी उपाय काडचोच पडटलो.
सोरो पियेवन गाडी चलोवप हें एक अपघाताचें मुखेल कारण आसा. थळावे लोकूच सोरो पियेवन गाडी चलयतात अशें ना. पर्यटक लेगीत सोरो पियेवन गाडी चलयतात. खासगी गाडयो सोडाच, प्रवाशांनी भरिल्ली बस लेगीत चलोवपी चालक सोरो पियेल्लो आसता. फाटल्या सप्तकांत एक धक्कादायक घडणूक घडली. पणजी सावन वाळपय वचपी कदंब बस आचकीत हालपाक लागली. बशींतल्या प्रवाशांनी बोवाळ केलो, आड्ड्यो मारल्यो. तरी कंडक्टर वा चालकाचेर कसलोच परिणाम जालो ना. बशीच्या चालकाक सिटाचेर बसपाक जायनासलें. तो चालक सोरो पियेल्लो म्हूण ताचे कडेन गाडी झेलपडटाली. तो चालक तशेंच बशींतल्या प्रवाशांचें नशीब बरें आसलें म्हूण कसलीच वायट घडणूक जावपाक पावली ना. चालकाचें बशीचेर नियंत्रण नासतना बस पणजे सावन पोरणें गोंया मेरेन पावता… हीच एक अजापीत करपी घडणूक आसा.
प्रवाशांनी बस थारायली आनी कंडक्टराक जाप विचारली. कदंबा बशीचो चालक सोरो पियेवन गाडी चलयता, ही एक गंभीर गजाल आसा. हाचें पयलीं लेगीत चालकान सोरो पियेल्ल्यान कदंब बशींक अपघात जाल्ले आसात. कदंब म्हामंडळान संबंदीत चालकाक निलंबीत केला. अपघात जालो वा दोशी थारले उपरांत कारवाय ही जातलीच आनी जावपाकूच जाय. तरी प्रवाशांचे सुरक्षे खातीर चालक सोरो पियेवन बस चलोवचो ना म्हूण उपाय येवजण करपाची गरज आसा. सोरो पियेवन कदंब बस चलोवपाच्या प्रकारा उपरांत चालकाची अल्कोहोल चांचणी करपाचो निर्णय कदंब म्हामंडळान घेतलो. अल्कोमिटराच्या आधारान ही चांचणी जातली. प्रवाशांक दुबाव आयलो, जाल्यार तांणी नियंत्रण कक्षका कळोवचें. चालक तशेंच कंडक्टराची चांचणी जातली, अशें कदंब म्हामंडळान स्पश्ट केलां. प्रवाशांक दुबाव येवपाची वाट कित्याक पळोवपाक जाय? चार दिसांनी वा सप्तका मदीं आचकीत चालकाची अल्कोहोल चांचणी करपाक किदें हरकत आसा? ज्या चालकान सोरो पियोवंक ना, तो सुट्टलो. जो कोण चालक पियेला, तो दोशी थारतलो. हाचो प्रवाशां सयत म्हामंडळाक लाव जातलो. सेगीत अशो चांचण्यो सुरू उरल्यो जाल्यार कोण, कोण चालक सोरो पियोवन कामाचेर येतात. तशेंच कोण चालक सोरो पियोवन कामाचेर येनात, ते म्हामंडळाक कळपाक मजत जातली. सोरो पियोवन कामाचेर येवपी चालकांचे खासा समुपदेशन करप शक्य जातलें. सगल्या बस स्टॅण्डार अल्कोमिटर हाडून दवरले आनी चांचणे खातीर खासा कर्मचाऱ्यांची नियुक्ती केली जाल्यार नेमान अल्कोहोल चांचणी करप शक्य आसा. चांचणी केले उपरांत लेगीत कांय चालक सोरो पियेपाची शक्यताय न्हयकारपाक जायना. तशेंच कदंबाचेच चालक सोरो पियेतात अशें ना. खासगी बशींचे चालक लेगीत खूबशे खेपे सोरो पियेवन गाडी चलयतात. जाल्यार खासगी बस चालकांची अल्कोहोल चांचणी कित्याक नाका? कदंबाचो चालक सोरो पियेवन गाडी चलयतना मेळ्ळे उपरांत म्हामंडळान अल्कोहोल चांचणी करपाचो निर्णय घेतलो. हेच धर्तीचेर खासगी बशींच्या चालकांची अल्कोहोल चांचणी जावपाक जाय. सोरो पियेवन गाडी चलोवपाच्या घडणुकेची गंभीर दखल घेवन मुख्यमंत्र्यांनी कदंब चालक निलंबीत जातलो हाचे कडेन लक्ष दिलें. कदंबाच्यो जितल्यो बशी चलतात, तितल्योच राज्यांत खासगी बशी चलतात. सरकारान खासगी बशींच्या चालकांची अल्कोहोल चांचणी जातली, अशी वेवस्था करपाक जाय. येरादारी पुलीस आनी येरादारी खात्यान हे विशीं पावलां उखलपाक जाय.
अपघातांचें प्रमाण उणें करपा खातीर काय म्हयन्यां पयलीं सरकारान खासा मोहीम सुरू केल्ली. हे मोहिमे खाला चालकांची अल्कोहोल चांचणी पुलीस करताले. पणजे रातच्या वेळार कांय दीस चांचणी जाली. उपरांत चांचणीची मोहीम थंड पडली. बशींनी बरेच प्रवासी आसतात. प्रवाशांच्या सुरक्षीततायेचो विचार करून खासगी बशींच्या चालकांची अल्कोहोल चांचणी जावपाक जाय. हेर गाडयांच्या चालका परस बशींच्या चालकाची अल्कोहोल चांचणी जावप चड गरजेची आसा. हें काम दिसता तितलें सोंपें ना. तरी लेगीत येरादारी खात्यान पुलिसांचे मजतीन ही मोहीम सुरू करपाक जाय. दर दिसा अपघात जाता. अपघातांत निरपराध लोकांचें बळी वतात. अपघातांत मरण येवप्यां मदीं दुचाकी चालकांचें प्रमाण चड आसा. हाका लागून पुलिसांनी हॅल्मेट सक्तीची कारवाय खर केली. जे दुचाकी चालक हॅल्मेट घालिनात, तांका तालांव दिवपाक सुरवात जाली. हाका लागून आतां 90 टक्के दुचाकी चालक हॅल्मेट घालपाक लागल्यात. दुचाकी चालकांक आतां हॅल्मेट घालपाची संवय जाल्या. खूबशे चालक सोरो पियेवन गाडी चलयतात. कांय पर्यटक फक्त सोरो पियेवपाक मेळटा म्हूण गोंयांत येतात. गोंय हे पर्यटन थळ आसलें तरी ते सोरो पियेवपाचे थळ न्हय, अशें उलोवप आमदार मायकल लोबो हांणी केलां. जे पर्यटक सोरो पियेवन गाडी चलयतात, तांचेर कारवाय करपाची मागणी तांणी केल्या. तांची ही मागणी योग्य आसा. जे कोण रातचे सोरो पियेतात तांकां घरा पावोवपाची जापसालदारकी बारवाल्यांनी घेवपाक जाय. असो कायदो करपाक जाय, अशें विधान फाटल्या वर्सा येरादारी मंत्री मॉवीन गुदिन्हो हांणी केल्लें. कायदो जालो तरी हाची कार्यवाही जावप कठीण आसा. तरी खासगी बसवाल्यांची अल्कोहोल चांचणी करपाक हरकत ना. अचकीत चांचणी जाली जाल्यार जे कोण सोरो पियेवन बस चलयतात तांकां जरब बसतली. ‘आओ जाओ घर तुम्हारा’, हें प्रमाण सध्या तरी चालकांक कायद्याची कसलीच भिरांत ना. कायदो मोडलो जाल्यार शिक्षा जातली, अशी भिरांत थोडी तरी चालका मदीं तयार जावपाक जाय.
गणेश जावडेकार
9860610762
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
