भांगरभूंय | प्रतिनिधी
16 विद्यार्थ्यांनी घेतलो वांटो; विवीध म्हायती घेतली समजून
म्हापशें: बाल दिसा निमतान विद्यार्थ्यां खातीर उदेंतें दर्पण, थिवी हे संस्थेन ‘चलात गोंय पळोवया’ हो अभिनव उपक्रम आयोजीत केल्लो.
ह्या उपक्रमा खाला 16 विद्यार्थ्यांक घेवन उदेंतें दर्पणच्या वांगड्यांनी सुर्लाची जामा मस्जीद, सांतानचें तवशें, फेस्ताचें सेंट एन चर्च, गोवा वेल्हाची सेंट अँड्रू चर्च, वेर्णेंचें महालसा नारायणी देवूळ, सांकवाळचें बिर्ला देवूळ, केपेंचे प्लासियो दो देओ हांगा भेट दिवन विवीध म्हायती समजून घेतली आनी उपक्रमाचो बोध घेवन आनंद घेतलो.
भुरग्यांक फक्त पुस्तकी ज्ञाना बरोबरूच चार वण्टी भायरूय जग आनी सत्य परिस्थितीची जाणीव करून दिवंक जाय. तशेंच राष्ट्रभक्ती आनी राष्ट्रीय एकता हांचें बीज तांचे मदीं रुजोवंक जाय, म्हणून शिक्षणीक संस्थे बरोबरूच हेर समाजीक संस्थांनी लेगीत वेगळेवेगळे अभिनव उपक्रमांचें आयोजन करून त्या उपक्रमांक प्रत्यक्षांत हाडून भावी पिळगेक एकात्मतायेंत बांदून दवरूंक जाय. जाल्यारूच आमचो समाज समाजीक नदरेन सुदृढ जातलो अशें संस्थेचे पदाधिकारी शिक्षक हरीश कामत हांणी सांगलें.
संस्थेचे पदाधिकारी हरीश कामत, वामन धारवाडकार आनी अभया कामत हांणी विद्यार्थ्यांक मार्गदर्शन केलें. ह्या उपक्रमा विशीं विद्यार्थ्यांच्या पालकांनी समाधान उक्तावन संस्थेची तोखणाय केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
