भांगरभूंय | प्रतिनिधी
जीत आरोलकार: हरमला दीपोत्सव सुवाळो दबाज्यान
हरमल: दिवाळी म्हणल्यार काळखाक पयस करपी उत्सव. ताका लागून कोरकणवाड्यार मनयतात तो दरेक सण, उत्सव हो आगळोवेगळो आसता, आनी ह्या उत्सवाक आपल्याक हाजीर रावपाक खूब खोस भोगता. एकवट हो म्हत्वाचो घटक आसून समजिकायेन एकवट तिगोवन दवरचो आनी समाजांतल्या दरेक घटकान ताचो बोध घेवचो अशें मांद्रेंचे आमदार जीत आरोलकार हांणी म्हणलें.
कोरकणवाडो श्रीराष्ट्रोळी देवस्थानाच्या प्रांगणांत वाड्या वेल्या ग्रामस्थांनी आयोजीत केल्ल्या दीपोत्सवा निमतान पाककला, रांगोळी आनी आकाशदिवो सर्तीच्या इनामां भेटवण सुवाळ्यांत आरोलकार उलयताले.
संस्कृती तिगोवपा खातीर सगल्यांनी एकवटीत यत्न करूंक जाय. ‘उदरगत’ संस्थेन, पार्से खाजन गुंडो हांगा अश्योच सर्ती आनी सांस्कृतीक कार्यावळींचें आयोजन केलां आनी ग्रामस्थांनी थंय अवश्य हाजीर रावचें अशें आवाहन आरोलकार हांणी केलें.
कूळ आनी मुंडकाराचो उल्लेख जालो ते फाटभुंयेर ह्या वाड्या वेल्या लोकांनी आपले कचेरेंत संपर्क सादून फुकट सोपस्कार पुराय करचें आनी जमनीचे मालक जावचे अशें आवाहन आमदार जीत आरोलकार हांणी केलें.
निवृत्त अधिकारी उमाकांत कोरकणकार हांणी आमदारांच्या कार्याची तोखणाय केली आनी कोरकणवाड्या वेल्या भावा-भयणींनी सर्तींत वांटो घेवन सर्त येसस्वी केल्ले खातीर तांचें अभिनंदन केलें.
श्रीराष्ट्रोळी प्रांगणांत वाड्या वेल्या ग्रामस्थांनी बरे तरेन संस्कृताय सांबाळपाचो सुवाळो आयोजीत केलो तशेंच अशा सुवाळ्यांनी शंबर टक्के योगदानाची गरज आशिल्ल्याचें समाजकार्यकर्ते संतोष कोरकणकार हांणी केलें. आमदार जीत आरोलकार हांणी झोनींग प्लान रद्द केले उपरांत कूळ मुंडकारा विशीं एक बरें पावल उबारिल्ले खातीर तांचें अभिनंदन केलें.
वाड्या वेल्या ग्रामस्थांनी बरे तरेन सहकार्य केलें आनी दीपोत्सव मनयलो. दर वर्सा हुशार विद्यार्थ्यांचो भोवमान सुवाळो तशेंच पुजा, भंडारो, नाटक अशे खूबशे उपक्रम जायत आशिल्ल्यान एकवट तिगून उरता अशें मत आदले जिल्हो पंचायत वांगडी अरूण बांधकार हांणी उक्तायलें.
ह्या वेळार माचयेर पंच वांगडी सुशांत गावडे, पुरस्कर्ते राजन बांधकार, ज्ञानेश्वर कोरकणकार, मनोज कोरकणकार, प्रतीक कोरकनकार, परिक्षक साईदास नायक, साईश च्यारी, प्रदीप परब हाजीर आशिल्ले.
देवस्थानाचे अध्यक्ष शशिकांत कोरकणकार हांणी येवकार आनी प्रस्तावीक केलें. देवस्थानाचे प्रमोद, आनंद, रुपेश, बंटी कोरकणकार, बबन मांद्रेंकार बी हांणी सोयऱ्यांक फुलांतुरो भेटोवन येवकार दिलो.
मानेस्तांचे हस्तुकीं इनामां भेटयलीं. सुरवेक आमदार जीत आरोलकार हांचे हस्तुकीं दिवली पेटोवन उक्तावण केलें. सचीव प्रकाश कोरकणकारान उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
