भांगरभूंय | प्रतिनिधी
भुरग्यांक स्कुलांक दिवाळेची सुटी पडिल्ली. गांवांत तशेच प्रत्येकाच्या घरांत नरकासुर करपाचें काम नेटान चालू आसा अशें दिसतालें. ह्या दिसांनी चडशे भुरगे आपआपल्या वाड्या वयलो नरकासुर करपाच्या कामांत मग्न आसतालें. रातीच्यो रातीं जागरणां करून ते नरकासुराची प्रतिमा तयार करपाच्या कामांत आशिल्ले. देखून ह्या आयतारा आजयेली काणी आयकूंक चडशे चले भुरगे नाशिल्ले. आयच्या आयतारा आजयेगेर चडश्यो चलयोच दिसताल्यो.
“सुरेश, राजेश आनी हेर भुरगे आज काणी आयकूंक येवंक ना शे…! आजयेन विचारलें.
“आज्जी, ते नरकासुर करतात
न्हय गे…! देखून येवंक ना…!!” सुमनान सांगलें.
“हां नरकासुर करतात न्हय? आनी आमचो अमनूय तांचे वांगडा आसा दिसता! जावं करुंदी तांकां नरकासुर. वर्साक एकूच फावट येता न्हय तो नरकासुर? बावडे साबार कश्ट करून, रातीं जागोवन, खूब पयसो आनी वेळ खर्च करून, तें नरकासुर तयार करतात आनी नरकासुराचे रातींक फांतोडेर ताका लासयता. सकाळीं उठून लासयल्ल्या त्या नरकासुराच्या गोबराक पळोवन तांकां मात्तूय चिंतून येना काय…?” आज्जी उलयतां उलयतां थारलीं.
“कितें चिंतून येना म्हणटात गे आज्जी तूं?” सुमनान विचारलें.
“हेंच की आमी प्रत्येक वर्सा नरकासुराक लासोवन ताचो गोबर करतात, पूण हो गोबर कसलो? वायटाचो, फटींगपणाचो काय नरकासुरान केल्ल्या क्रुर कर्माचो…? जर प्रत्येकान असो विचार करून नरकासुराचे प्रतिमेक लासयल्ली जाल्यार, आज ह्या सगल्या वायटाचो नाश जातलो आसलो, फटींगपणां उरचीं ना आसलीं, कोणाचेर अन्याय, अत्याचार जावचे नासलो.” आजयेन बरेंच कितें सांगलें, पूण तें कोणाचे तकलेंत गेलें ना.
“आज्जी तूं कितें सांगूंक सोदता तें आमकां कांयच कळूंक ना.” ज्योतीन म्हणलें.
“हय आज्जी, मातशें परतून समजावन सांग न्हय…!” सुमनान म्हणलें.
“हय सांगता, सत्य हें असत्या परस चड बळिश्ट आसता… देखून तर पावला पावलाक असत्याचो पराभव जावन सत्याचें जैत जाता. आज हांव तुमकां त्या सत्य आनी असत्याची काणी सांगतां.”
“नरक चतुर्दशी ही परब केन्ना आश्वीन तर केन्ना कार्तीक कृष्ण चतुर्दशीक, म्हणल्यार दिवाळेच्या एक दीस पयलीं मनयतात. हे चतुर्दशेक धाकटी दिवाळी अशेंय बी म्हणटा. ह्या दिसा फांतोडेर न्हावून यमाचो तप करचो आसता
आनी सांजेच्या वेळार दिवे पेटोवन उजवाड दान करपाचो म्हणून एक समज आसा.
पौराणीक कथेनुसार भगवान श्री कृष्णान आश्वीन कृष्ण वा (कार्तीक कृष्ण) चतुर्दशी दिसा नरकासुर नांवाच्या राकेसाक मारिल्लो. (वध केल्लो) ज्या राकेसान सोळा हजार आंकवार चलयाक आपणाले बंदखणींत बंद करून दवरिल्ली. नरकासुराचो वध करून, श्री कृष्णान त्या सोळा हजार चलयांक बंधन मुक्त केलें. पूण त्यो चलयो समाजाक आपलें तोंड दाखोवंक भियेताल्यो. त्यो म्हणटाल्यो की हो समाज आमकां स्विकार करतलो…? नरकासुराचे बंदखणींत रावले उपरांत कोण आमचे कडेन लग्न करतलो? कोण आमकां आपणायतलो…? होच तांचो भंय आशिल्लो. देखून तांणी श्री कृष्णाक विनवणी केली की तुवेंनूच आमकां न्याय दिवचो, तुवेंनूच कितें तरी उपाय करचो. तेन्ना समाजांत त्या चलयांक मान सन्मान दिवचे खातीर, सत्याभामाचे मजतीन श्री कृष्णान त्या सगल्या चलयां वांगडा लग्न केल्लें. अशे तरेन नरकासुर वध जाल्लो आनी दिवाळेची परब मनोवपाक सुरवात जाली. ही आशिल्ली सत्य आनी असत्याची काणी.
पूण आज मनीस सत्याक पुजना, असत्याचो तिरस्कार करना. असत्याक आपणायता, ताचीच तोखणाय करता, ताकाच वेंगेंत घेवन नाचता. हे सगले आमी नरकासुराच्या रुपांत दर वर्सा पळयतात. जांणी असुरांचो नाश करून ह्या संवसाराक ताच्या अन्याय, अत्याचारा पासून वाचयलें. मनशाक ताचे वेदने पासून पयस केले. ताची परत फेड म्हणून ह्या दिसा आमी श्री कृष्णाची याद काडूंक जाय आशिल्ली. ताची पुजा करून भजन, आरती गावन आमी ती रात सारूंक जाय आशिल्ली. आनी जांणी क्रुरतायेन मनशाची हत्या केल्ली, सत्याचेर अन्याय केल्लो, अस्तुर्यांचेर अत्याचार केल्लो. ताका लासोवन मारूंक जाय आशिल्ले आनी ते आमी करताय बी पूण ताचो उद्देश वेगळोच आसता. आमी वाजयत गाजयत ताची गायना करता. लावडस्पीकराच्या वाजपांत नाच करून, हातांत बियराची बाटली धरून, पुराय रात जागोवन, आपल्याच जिवाचे हाल करून, पडून, धडपडून, हजारांनी रुपया खर्च केल्ल्या
नरकासुराचे प्रतिमेक निमणें एका जटक्यांत लासोवन भस्म करतात. हीं किसलीं शाणेपणां…?
हय मानतां हांव की जशी प्रथा आसा तशेच आमी करूंक जाय. नरकासुराक लासोवंक जाय, ताचो तिरस्कार करूंक जाय. कित्याक तर तो वायट आशिल्लो आनी वायट कर्माचो वायट परिणाम हें आमी दाखोवन दिवंक जाय. जेणे करून समाजांतलो खंयचोच मनीस नरकासुर जावंक पावचो ना. आयज आमच्या समाजांत पावला पावलाक आमकां नरकासुर दिसतात, ताणें केल्लीं क्रुर कर्मां दिश्टी पडटात. त्या काळांत श्री कृष्णान त्या क्रुर कर्मांचो वध केल्लो, नरकासुर वध केल्लो तो देखावो दाखोवपाचो आमी यत्न करूंक जाय.
नरकासुर प्रतिमेची सर्त न्हय,
तर श्री कृष्णाच्या हातांतल्यान नरकासुर नांवाच्या राकेसाचो वध जाल्लो ह्या देखाव्याची सर्त करूंक जाय. नरकासुरा रे नरकासुरा हीं पदां गावन न्हय, तर श्री कृष्ण, गोवींद, हरे मुरारी, जय नाथ नारायण वासुदेवा… हीं पदां म्हणून श्री कृष्णाचो जयजयकार करूंक जाय. तेन्नाच खर्या अर्थान आमी श्री कृष्णान केल्ल्या पराक्रमाची, ताणें दाखयिल्ले दयेची, मायेची याद काडले सारकी जातली.
(फुडें चलता)
अविनाश कुंकळकार
7875237830
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
