समाजांतल्याच विचारवंतांनी समाजाक घडोवचो

भांगरभूंय | प्रतिनिधी

समाजातलें लोक सगल्या पक्षांनी विखुरिल्ले आसतात. समाजाच्या व्यासपिठार पक्षीय राजकारण येवंक दिवंक जायना. म्हूण समाजाचे नेतृत्व हें राजकारणां विरयत व्यक्ती कडेन आसपाक जाय.

समाज म्हणजे फक्त मनशांचो पंगड न्हय. ती एक संघटणा. संघटणा एकामेका वेल्या विस्वासाचेर चलता. ह्या विस्वासाक
तेड वचूंक दिवंक फावना. प्रत्येक समाजाची जीवन जगपाची एक संस्कृती आसता. मनीसपणाची एक सभ्यता आसता. त्या त्या समाजाचो लेय -कायदो रिती – रिवाज, स्वाभिमान, कणखरपणां आसता. आपल्या समाजाचेर जावपी अन्याय नदरे आड करून राजकरण्यांच्या ताटां पोंदचें मांजर जावन उपकारना.
प्रत्येक समाजाचो आपलो असो एक फ्रेम वर्क आसूंक जाय. आरत्यो वाजोवन, फुगड्यो घालून, आनी शिगमो नाचून, वर्सूयभर महोत्सव करून समाज वयर सरना. समाज वयर सरतलो जाल्यार शिक्षण जाय. शिक्षणा बगर समाज परिवर्तनाक पर्याय ना. आमच्या समाजाचो उत्कर्ष आमीच घोडोवपाक जाय. आमचो समाज बांधव एकीकडेन कसो येतलो? आनी कायम एकसंघ कसो उरतलो हाचेर समाजबांधवांनी विचार करपाची गरज आसा. ना जाल्यार कोण तरी आमचो वापरूच करता आनी आमी बळी पडत आसात. दुसऱ्याच्या पोंशातल्यान उदक पियेवपाची आमकां जाल्या संवय. आमचे भितरलो न्युनगंड आमीच पयस करपाक जाय. आमच्या इतिहासाची पाळांमुळां आमीच सोदपाक जाय, आनी आमचो इतिहास आमीच रचपाक जाय. अशें आनीक कितलो तेप आमी गुलाम जावन जगतले? हें खंय तरी थांबपाक जाय. आमी खामसुत्री बावली जावंक उपकारना. आमच्या समाजाची शेंडी​ आमी दुसऱ्याच्या हातान दिवंक फावना. सरकारी येवजण घेवपा पुरते आमी समाज सोदता हे योग्य न्हय. फक्त सर्टिफीकेटी पुरतो समाज आसुंक फावना. समाजाचो अभिमान दर एका समाजबांधवाक दिसपाक जाय. तो मागीर खंयचोय समाज आसूं. आमी स्वाभिमानान अन्याया आड पेटून उठपाक जाय. आमी आपआपल्या समजाक कितलें योगदान दितात हाचे दर एकल्यान आत्मपरिक्षण करपाक जाय.
समाजाक राजकी पक्षांचे वा राजकरण्यांचे दावणीक बांदूक फावना. राजकी मनिशा बाळगून कोणेंच समाजाचे व्यासपिठूय वापरचो न्हय, आनी समाजाच्या व्यासपिठार खंयच्याच पक्षाचो बिल्लो आसपाक जायना. समाज हो समाज आसता. समाजाची ध्येय धोरणां वेगळी आसता आनी राजकी पक्षांची उद्दिश्टां वेगळीं आसता देखून समाजकारण आनी राजकारण एक करून उपकारना. समाजातलें लोक सगल्या पक्षांनी विखुरिल्ले आसतात. समाजाच्या व्यासपिठार पक्षीय राजकारण येवंक दिवंक जायना. म्हूण समाजाचे नेतृत्व हें राजकारणां विरयत व्यक्ती कडेन आसपाक जाय. तांणी समाजाक संघटीत दवरपाक जाय. समाजांतलो निमाणो मनीस वयर कसो पावतलो ताचेर आमचो प्लान जाय. ग्राम समिती आमी काडटात त्या ग्राम समित्यांचे काम कितें? फक्त सर्टीफिकिटी पुरतेंच. ना ग्राम समित्यांनी आपआपल्या वाठारांत सगल्यांक एकसंघ दवरपाक यत्न करपाक जाय. वेगळेवेगळे उपक्रम राबोवंक जाय. समाज कसो वेसनमुक्त आनी तंटामुक्त जातलो हाचेर भर दिवपाक जाय. शिक्षणिक उदरगत कशी जातली हाचेर लक्ष घालपाक जाय. कोण तरी आमकां भडकयतात आनी आमी एकामेकां विरूध्द उबें रावतात हें आदी बंद जावपाक जाय. समाजांत मनीस म्हूण वावुरतना सरसकट सगल्या समाजाचो आदर करपाक जाय. खंयच्याच समाजाक हिणसावपाक जायना वा कमी लेखूक जायना. खंयच्याच ल्हान व्हड समाजाक गृहीत धरूंक जावचें ना. प्रत्येक समाज स्वताचे अस्तित्व घेवन जगता हे आमी विसरूंक फावना. ज्या ज्या समाजाचो उत्कर्ष आमकां दिश्टी पडटा आसत जाल्यार ताचे कारण शिक्षण जावन आसा.
समाज चडांत चड उच्य शिक्षीत आनी सुसंस्कृत कसो जातलो हाचेर प्रत्येक समाजांतल्या फुडाऱ्यांनी लक्ष दिवपाक जाय. तशे तरेच्यो सोयी दर एका समाजान निर्माण करपाक जाय. दर एकल्याक आपआपल्या समाजाचो अभिमान आसपाक जाय. कोणा राजकरण्यांच्या दावणीक समाजाक बांदूक फावना. आनी राजकारण्याच्या ताटा पोंदचे माजरूय जावंक जायना. स्वाभिमानान जगपाक जाय. चडूय मुर्वत घेवन बसपाचे दीस आयज उरूंक ना. समाज पयली. तो खंयचोय आसूं. आमी समाजा खातीर आसा. आमी म्हूण समाज असो कांय लोकांचो समज आसता हें समा न्हय. प्रत्येक मनीस आपआपल्या समाजाक योगदान दीत आसता. कोणेंच आपल्या फायद्या खातीर समाजाचो बळी दिवंक जायना. समाज नेतृत्व हे समाजीक वावरांतल्यान तयार जावचें पडटा. असो समाज वावुरपी फुडारी प्रत्येक समाजा भितर आसपाक जाय. अशें तरेचो समाजवावुरपी आपआपल्या समाजा भितर आसा व्हय? केन्ना केन्ना समाजातलेंच मनीस समाजांतल्याच मनशाचेर अन्याय करतात. अशें जावपाक जायना. समाज फुडाऱ्यान राजकरणांत पड नासतना समाजाचें फुडारपण करपाक जाय. पक्षाचो बिल्लो लावन कोणेंच समाजाचे फुडारपण करचे न्हय. हें सगल्या समाजाच्या फुडाऱ्यांनी लक्षांत घेवपाक जाय. समाज हो नांवा पुरतो आसूंक फावना. समाजा विशीं जण एकल्याक तळमळ आसपाक जाय. दर एक समाज हो दुसऱ्या समाजाक प्रेरणादायी थारपाक जाय. दर एका समाजाच्या उदरगतीची बुनियाद शिक्षणाचेर निंबून आसता तेन्नाच तो तो समाज सर्वांगी सक्षम आनी समृध्द जावंक पावता. ते खातीर समाजांतल्या सगल्यां घटकांचे सहकार्य जाय पडटा.
आमी आपआपल्या समाजाक कितलें योगदान दितात तें तपासपाची गरज आसा. समाजा कडेन आमचीं बांदिलकी आसपाक जाय. थोडे समाजाच्या खुस्तार मिरोवपाक सोदतात. समाज मजबूत आसत जाल्यार कोणाकच अन्याय करपाची कापझदाद जावची ना. समाज जर मेंगो कसो रावलो. मिळमिळीत धोरण आपणायले जाल्यार ‘कुणीही यावे टिकली मारून जावे’ अशी गत जावपाक वेळ लागचो ना? समाज सक्षम आनी समृध्द करतलो जाल्यार समाजाक समाजांल्याच विचारवंताची गरज आसा.

काशिनाथ नायक
9158345844