भांगरभूंय | प्रतिनिधी
पांच खेपेचो वस्ताद ऑस्ट्रेलिया पंगडान अफगाणिस्तानाक उमळशीक वाडोवपी मॅचींत 3 विकेटींनी हारोवन संवसारीक वन डे क्रिकेट सर्तीचे सेमी फायनलींत सुवात मेळयली.
ऑस्ट्रेलियेच्या जैतांत ग्लॅन मॅक्सवॅल पर्जळ्ळो. ताणें नाबाद 201 धांवड्यांची खेळी करून ऑस्ट्रेलियेक जैत मेळोवन दिलें. बॅटींग करतना ताचे जांगेचे स्नायू दुखावले, ताका लागून मॅक्सवॅलाक चलपाक, धांवपाक लेगीत जमनाशिल्लें. पूण, ताणें उबो रावन मॅच घुंवडायली.
मोखीचो फाटलाव करतना ऑस्ट्रेलियेन एका वेळार 91 धांवड्यांचेर 7 विकेटी वगडायिल्ल्यो. ताच्या मुखार 292 धांवड्यांची मोख आशिल्ली. ऑस्ट्रेलियेक ही मॅच जिखप कठीण थारतलें अशें दिसतालें. पूण, मॅक्सवॅल नांवाच्या वादळान अफगाणिस्तान हुबलो.
मोखीचो फाटलाव करपी ऑस्ट्रेलिया पंगडाची सुरवात बाबत जाली. फास्ट बॉलर नवीन उल हकान आपल्या पयल्या दोन ओव्हरींनी ट्रॅव्हिस हेड (0) आनी मिचेल मार्श (24) हांकां बाद केले. अझुमतुल्लाह ओमारजाईन सेगीत दोन बॉलांचेर डॅव्हिड वॉर्नर (18) आनी जोश इंग्लीश हाका बाद केले. मार्नस लाबशेन (14) धांवबाद जालो. मार्कस स्टोयनीस (6) आनी मिचेल स्टार्क (3) हे राशीद खानाचे शिकार थारले. ऑस्ट्रेलियेचेर हारीचें सांवट पातळिल्लें. पूण, मॅक्सवॅलान एका हातान मॅच घुंवडायली. ताणें 76 बॉलांनी 10 चवके आनी तीन सक्यांचे मजतीन शेंकडो पुर्ण केलो.
ताणें आठवे विकेटी खातीर मुखेली पॅट कमिन्सा वांगडा 93 बॉलांनी शेंकड्याची नाबाद भागिदारी केली. हातूंत कमिन्साचें योगदान फकत आठ धांवड्यांचें आशिल्लें.
संवसारीक वन डे सर्तींतलो मॅक्सवॅलाचो हो तिसरो शेंकडो थारलो. ताणें मॅथ्यू हेडन आनी अॅरोन फिंच हांचे कडेन बरोबरी केली. मॅक्सवॅल आनी कमिन्स हे जोडये मुखार अफगाणिस्तानाच्या एकाय बॉलराचें थाणपण चलूंक ना.
मॅक्सवॅलाक 33 धांवड्यांचेर जीवनदान मेळिल्लें. ही कॅच सोडप अफगाणिस्तानाक म्हारग पडलें. मॅक्सवॅलान कमिन्सा वांगडा मेळून 170 बॉलांनी नाबाद 202 धांवड्यांची भागिदारी करून विक्रम रचलो. हातूंत कमिन्साच्यो फकत 12 धांवड्यो आशिल्ल्यो. मॅक्सवॅलान 128 बॉलांनी 21 चवके आनी 10 सक्यांचे मजतीन नाबाद 201 धांवड्यो केल्यो.
ते पयलीं इब्राहीम झाद्रानाचो शेंकडो आनी राशीद खानाची आक्रमक बॅटींग, हाका लागून अफगाणिस्तानान संवसारीक वन डे सर्तींतली आपली सर्वोच्च धांवसंख्या उबारली. अफगाणिस्तानान 5 विकेटी वगडावन 291 धांवड्यो केल्यो. राशीदान 17 बॉलांनी दोन चवके आनी तीन सक्यांचे मजतीन नाबाद 35 धांवड्यो केल्यो. झाद्रानान 143 बॉलांनी आठ चवके आनी तीन सक्यांचे मजतीन नाबाद 129 धांवड्यो केल्यो.
अफगाणिस्तानान हाचे आदीं म्हणल्यार 2019त वॅस्ट इंडिजा आड सगल्यो विकेटी वगडावन 288 धांवड्यो केल्ल्यो.
ऑस्ट्रेलिया सेमी फायनलींत
सेमी फायनलींत सुवात मेळोवपी ऑस्ट्रेलिया तिसरो पंगड थारलो. भारत आनी दक्षीण आफ्रिका ह्या पंगडांनी आदींच निमाण्या चारांतली आपली सुवात निश्चीत केल्ली. आठ मॅचींतल्यान 12 गुणां सयत तो गुणतकट्यांत तिसरे सुवातेर आसा. दुसरे वटेन अफगाणिस्तानाची सेमी फायनलींत सुवात मेळोवपाची आस्त सोंपिल्ल्यांत जमा आसा. तो आठ गुणां सयत सवे सुवातेर आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
