भांगरभूंय | प्रतिनिधी
फा टल्या लेखांत तुमकां गोंय विज्ञान केंद्र, मिरामार तशेंच गोंय विद्यापीठ, बांबोळी ह्या संस्थांक जरूर भेट दियात, अशें सांगिल्लें. सध्या 37 वी राष्ट्रीय खेळां सर्त फातोड्ड्यां, मडगांव, पणजी, कांपाल, वास्को, म्हापशें पेडें, बांबोळे ह्या केंद्रांनी चालू आसा. मानेस्त प्रधानमंत्री मोदीजी हांचे हस्तुकीं तिचें उक्तावण लेगीत जालें. खंयचेय सर्तीचें जेन्नां आयोजन जाता तेन्ना विंगड विंगड खेळांच्यो सुविधा थंय उपलब्ध करच्यो पडटात. राष्ट्री खेळां सर्तीन यजमान गोंयच्या पंगडान पदकां घेतल्यांत. पेन्टनथलॉन लेअर सर्तीन नेत्रावळीचो बाबू गांवकार हांणे भांगरा पदक मेळोवन सुरवात केली. ताका जायतीं इनामां जाहीर जाल्यांत. बाबू गांवगिऱ्या वाठारांतलो. ताका कितल्याशाच अडचणींक तोंड दिवचें पडलां आसतलें. खरेंतर फुडलें खेळगडी, खेळां फांटो घेवपी विद्यार्थ्यांनी बाबूचो आदर्श घेवचो. ताची कामगिरी पळोवपाक मेळ्ळी ना जाल्यार हेर खेळ पळोवपाक मुद्दाम लागींच्या केंद्रांत वचूंक जाय. गोंयांत आजून क्रीडा विद्यापीठ नासलें तरी खेळाची रुची आशिल्ल्यांनी तरी ही संद चुकोवंक फावना.
खेळां फांट्याक जर तुमी घेवपाक पळेतात तर तुमी सदांचो अभ्यास लेगीत करूं शकतात, पूण ज्या खेळांचो प्रकार तुमी वेंचतले ते जतनायेन वेंचात. एक म्हळ्यार तुमकां झेपता तोच खेळ घेयात. तशेंच ह्या खेळांत जर खूब सर्त आसा तर तातून आपणें वांटेकार जावप काय ना हें आदींच थारायात. दुसरें म्हळ्यार जो खेळां प्रकार आमी वेंचतात तातून सराव एकल्यान केल्यार उपकारता काय आनीक खेळगडी जाय? व्हड मैदान जाय काय ल्हान इनडोर चलता हाचो विचार आदींच करात. कांय खेळ दुखापतीक आमंत्रण दितात आनी तुमी तो खेळ खेळू शकनात. हाका लागून 2-3 पर्याय हातां कडेन आसचो. जेन्ना तुमी एखादो खेळां प्रकार वेंचतात तेन्ना ताचो मार्गदर्शक आसता, ताच्यो सुचोवण्यो आयकात. पणजे भितर डॉन बॉस्कोचें बी पी एड कॉलेज आसा. ताका वेळ थारावन भेट दियात.
तुमी खेळगडी जातले की कोच हे आदींच थारयात. दोनूय भितर हालींच्या दिसांनी करियर करपाक मेळटा. पंच, खेळगडी हे आमकां दिसतात, पूण खेळां भितर जायतीं करियरां आसात. खेळांचे दुकानांत लेगीत म्हायती दिवपी दुकानदार आसत तर ताचो लाव गिरायकाक मेळूं शकता. तुमी प्रधानमंत्री मोदीजींचे प्रत्येक म्हयन्याक चलिल्लें मन कि बात आयकतात की नात, हें हांव नकळो. पूण तुमी ते आयकुपाची संवय लायशात जाल्यार तुमकां बऱ्योच गजाली कळूं शकतात. हालींच तांणी दिव्यांगां कडेन संवाद सादलो. हे दिव्यांग आशिल्ले खेळगडी आनी तांणीं सर्तींनी विक्रमी 111 पदकां हाडलीं. तातून 29 भांगरां पदकां आशिल्लीं. हो संवाद तांकां जरी प्रोत्साहन दिवपाक आशिल्लो तरी आमी जांकां सगलें सैमान दिलां तांका चड प्रोत्साहन मेळटले. खंयच्याय खेळान जैत, प्रभावी जावप आसाच, पूण मोदीजी म्हणटात की तुमी मेडलां जिखूं तरी शकतात ना जाल्यार शिकूं शकतात. हार ही गजाल मनांतल्यान काडून उडोवपाक शिकपाक जाय, ही गजाल तुमकां खेळ शिकयता. घडये तुमचें करियर हातूंत जावंचें ना, पूण बऱ्योच गजाली तुमी शिकतात. वयर सांगलां त्या प्रमाण तुमी गोंयांनूच बी पी एड करूं शकतात आनी शारीरिक शिक्षक म्हूण काम करूं शकतात.
जर तुमकां कॉलेज पांवड्याचेर शिकोवपाचें आसा तर एम पी एड करपाकूच जाय, खेरीज नेट सेट परिक्षा दिवची पडटली ती वेगळी. पतियाळा शारांत अभ्यासक्रम शिकपाची सुविधा आसा. ताची म्हायती संकेतस्थळाचेर घेवची. त्या खेरीज तुमी जर लोकप्रीय जाले तर जायराती खातीर मॉडेल म्हूण काम करूं शकतात. हातून व्हडली अर्थीक प्राप्ती आसा. ह्या खेरीज खेळां तज्ञ म्हूण लिखाण करूं शकतात. एकाद्या चॅनलाचेर खेळांचे विश्लेशण करूं शकता. आयज फक्त मनोरंजनूच न्हय तर दोन देशांक लागीं हाडपी म्हूण खेळां कडे आमी पळयता. हाचें तुमी प्रतिनिधीत्व करूं शकतात. तेन्ना वेळ कित्याक काडटात? सरकार तर खेळांक बरे तरेन सपोर्ट करता. खेळो इंडिया, साग ही ताचीं उदाहरणां.
प्रा रामदास केळकार
9822583275
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
