पाकिस्तानाची सेमी फायनलीची आस्त कायम

भांगरभूंय | प्रतिनिधी

पाकिस्तान पंगडान काल जाल्ले संवसारीक वन डे क्रिकेट सर्तींत 35वे मॅचींत न्युझिलॅण्ड पंगडा आड डीएलएस नेमा प्रमाण 21 धांवड्यांनी जैत जोडलें. पाकिस्ताना खातीर जैत सामकें म्हत्वाचें आशिल्लें. ही मॅच हारिल्ली जाल्यार ताचें सेमी फायनलींत सुवात मेळोवपाचें आव्हान लागीं लागीं सोंपिल्ल्यांत जमा जातलें आशिल्लें. मुखार 400+ धांवड्यांची मोख आशिल्ली. ताचो फाटलाव करतना फखर जमानान आक्रमक बॅटींग केली आनी ताका मुखेली बाबर आजमाची योग्य अशी साथ मेळ्ळी.

402 धांवड्यांचो दोंगर मुखार आसतना ओपनर अब्दुल्लाह शफीक (4) रोखडोच तंबूंत परतलो. पूण, फखर जमान आनी बाबर आजम हांणी आक्रमक बॅटींग केली. फखरान 63 बॉलांनी 9 सके आनी चार चवके मारून शेंकडो पुर्ण केलो. पाकिस्ताना वतीन संवसारीक वन डे क्रिकेट सर्तींतलो हो जलद शेंकडो थारलो. पावस पडपाची शक्यताय मतींत घेवन पाकिस्तानान आक्रमक बॅटींग केली. 21.3 ओव्हरी जायना फुडें पावसान आपली हाजेरी लायलीच. त्या वेळार पाकिस्तानान 1 विकेट वगडावन 160 धांवड्यो केल्ल्यो आनी डीएसएला प्रमाण पाकिस्तान 10 धांवड्यांनी मुखार आशिल्लो. पावसाक लागून मॅच अधिकाऱ्यांनी णव ओव्हरी उण्यो करपाचो निर्णय घेतलो आनी पाकिस्तानाक सुदारीत मोख दिली.

मॅच परतून सुरू जाल्या उपरांत बाबरान चवको मारून अर्द शेंकडो पुर्ण केलो. पाकिस्ताना मुखार 41 ओव्हरींनी 342 धांवड्यांची सुदारीत मोख आशिल्ली. तांकां 19.3 ओव्हरींनी 182 धांवड्यो करपाच्यो आशिल्ल्यो. आडखळी उपरांत परतून तेच शैलींत खेळप मात्शें कठीण आशिल्लें. पूण, फखर आनी बाबर हाणें चवके आनी सके मारप चालूच दवरून डीएसएल नेमा प्रमाण पाकिस्तानाक मुखार दवरलो. 25.3 ओव्हरींनी 1 विकेट वगडावन 200 धांवड्यो जाल्ल्यो तेन्ना परतून पावसान आपली हाजेरी लायली. त्या वेळार पाकिस्तान 21 धांवड्यांनी मुखार आशिल्लो. पावसान नेट धरिल्ल्यान अखेरेक मॅच रद्द करपाचो निर्णय घेतलो आनी पाकिस्तानाचें जैत निश्चीत जालें.

ते पयलीं रचीन रवींद्रान आनी केन विलियम्सनान 180 धांवड्यांची भागिदारी करतना पाकिस्तानाची बॉलींग फोडून काडली. न्युझिलॅण्डान निर्धारीत 50 ओव्हरींनी 6 विकेटी वगडावन 401 धांवड्यो केल्यो. विलियम्सनान 79 बॉलांनी 10 चवके आनी 2 सक्यांचे मजतीन 95 धांवड्यो केल्यो. रचीनान 94 बॉलांनी 15 चवके आनी एक सक्याचे मजतीन 108 धांवड्यो केल्यो. डरील मिचेल (29) आनी मार्क चॅम्पमन (39) हाणें 51 धांवड्यांची भागिदारी केली. ग्लॅन फिलिप्स आनी मिचेल सॅण्टनर हाणें 26 बॉलांनी 43 धांवड्यांची भागिदारी केली. सॅण्टनरान 17 बॉलांनी 26 धांवड्यो केल्यो.