भांगरभूंय | प्रतिनिधी
मुरगांव: संवसारीक गोडेंमूत दिसा निमतान लायन्स क्लब ऑफ चिखली बोगमाळोन रेल्वे कर्मचारी आनी तांच्या कुटुंबांतल्या वांगड्यां खातीर वैजकी शिबिराचें आयोजन केल्लें.
लायन्स क्लब ऑफ चिखली बोगमाळो वतीन विवीध समाज उपेगी उपक्रम राबोवन गरजेवंतांक मजतीचो हात दिता. हाचोच एक भाग म्हूण क्लबा वतीन वास्को रेल्वे कर्मचारी आनी तांच्या कुटुंबांतल्या वांगड्यां खातीर वैजकी शिबिराचें आयोजन हांगासरल्या रेल्वे स्टेशनाच्या व्हीआयपी लॉन्ज हांगा केल्लें.
शंबरा परस चड जाणांनी हाचो लाव घेतलो. तांच्या रगतांतली साकर आनी रक्तदाब तपासणी केली. खूबशा दुयेंतींची उच्च साकर आनी उच्च रक्तदाबाची चांचणी केली. डॉ. सॅवियो डी पिंटो सुझा हांणी तांकां गरजेचीं वखदां बरोवन दिलीं आनी जिणेशैलीचे योग्य उपाय पाळपाचो सल्लो दिलो.
वास्को रेल्वे स्टेशनाचे भलायकी निरिक्षक जितेंद्र आनी क्लबाचे अध्यक्ष लायन अर्नाल्डो डो रेगो हांणी वैजकी शिबिराचें उक्तावण केलें. तशेंच तांणी स्वताची तपासणी केली. तशेंच ह्या वेळार झोन चेअरपर्सन लायन शरद चोपडेंकार, अतिरिक्त कॅबीन सेक्रेटरी एमजेएफ लायन फिओला रेगो, सेक्रेटरी लायन लिनू थॉमस, भांडारी लायन रायनेल कार्व्हालो, लायन वैभव च्यारी आनी अपोलो हॉस्पिटलाचो पंगड हाजीर आशिल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
