भांगरभूंय | प्रतिनिधी
संसदेच्या सभाघरांत प्रश्न विचारपा खातीर लांच घेवपाचे प्रकार आमच्या देशांत तशे नवे न्हय. अशाच एका प्रकरणांत तृणमूल
काँग्रेसीच्यो तथाकथीत फायरब्रँड खासदार महुआ मोईत्रा ही नाका मेरेन बुडल्या तरीय तातूंतल्यान सुरक्षीत भायर पडपा खातीर ती बरीच धडपड करता. पडलो, आपटलो तरी नाक वयर अशें सांगून नामा निराळे रावपाचो यत्न करचो अशेंच कितें तरी महुआ मोईत्रा हिचें चल्लां. मात ह्या प्रकरणां कडेन आपलें कांयच देणें घेणें नाशिल्ल्याच्या थाटांत ती अजून वावुरता. महुआ मोईत्रा हिचें मुखामळ सुंदर आनी आक्रमकपणा देशांतल्या जायत्या जाणांनी प्रधानमंत्री नरेंद्र मोदी हांचे आडच्या अविस्वास थारावा वयले चर्चे वेळार पळयलो आसतलोच. पूण ह्या सुंदर मुखामळा फाटल्यान ठासून भरल्ली विद्रुपताय प्रस्न विचारपा खातीर लांच घेवपाच्या तांच्या ह्या प्रकरणांतल्यान देशा सामकार आयल्या आनी हो प्रकार देशा खातीर सामको लजेक घालपा सारको प्रकार आशिल्ल्याची प्रतिक्रिया ताचेर उक्तायतात. महुआ मोईत्रा हांचे आक्रमक खासदार म्हणून तयार जाल्लें वलय तिका प्रस्न विचारपा खातीर दितात त्या पयशाक लागून तयार जाल्लें हें आतां सगळ्यांक कळ्ळां. अस्तंत बंगालाची मुख्यमंत्री आनी तृणमूल काँग्रेसीची सर्वेसर्वा ममता बॅनर्जी हांच्या सामक्या विस्वासांतल्याे आशिल्ल्या महुआ मोईत्रा हिका दिल्लीतली ममता दिदी अशें पाचारतले वा दिल्लींतली ममता दिदी अशी आपली प्रतिमा तयार जावची हे खातीर महुआ दिदीचो यत्न चलिल्लो. मात सभाघरांत प्रस्न विचारपा खातीर लांच घेवपाचो सोंपो आनी चैनीचो मार्ग खासदारीणबाईन घेतिल्ल्यान सध्या तिचे तकलेर अपात्रतायेची तरसाद हुमकळटा.
महुआ मोईत्रा तशें पळोवंक गेल्यार खूबशा आडमेळ्यांनी सांपडल्या, आनी तातूंतल्यान भायर काडपा खातीर तिणें जांचे कडेन हक्कान मजतीची याचना करची अशे सगलेच तिचे लागींचे इश्ट आसूं, वा जांचे कडल्यान तिणें कोट्यांनी रुपयांचो मलिदा घेतलो ते शुभेत्सुकय तिच्या विरोधांत ठिय्या मांडून बशिल्ले दिसतात. अशे प्रतिकूल परिस्थितींत सपशेल शरणागती पत्करप होच तिचे सामकार पर्याय आसलो तरी आपलें नाक अजून वयर आशिल्ल्याचें सांगत खासदारीणबाई वण्टीर तकली आपटयत आसात. हातूंतल्यान कांयच साध्य जावचें ना हाची तिका पुराय कल्पना आसा. तरी वेळकाडू धोरण आपणावन पयलींच हारिल्ली लडाय लडपाचो तिचो हेत स्पश्ट दिसता. मोदी सरकाराच्या विरोधांतली आघाडी महुआ मोईत्रा सभाघरांत बेस बरी सांबाळटाली. सरकाराच्या कारभाराची चिरफाड करपी तिगेली भाशणां आसूं वा जायतीं वादग्रस्त विधानां समाज माध्यमाचेरूय आमी पळयताले. पूण आतां प्रस्न विचारपा खातीर लांच घेवपाच्या ह्या प्रकरणांत तिजीच समाज माध्यमांतल्यान जावपी चिरफाड पळोवप तिच्या नशिबांत आयलां. तिच्याच तृणमूल काँग्रेस पक्षानूय सद्या तिका आपले पसून दोन हात पयस दवरून सांसदीय चवकशी उपरांत किदें तो निर्णय घेवं अशी भुमिका घेतल्या. पयशां खातीर महुआ मोईत्रा हिणे देशाची सुरक्षितताय धोक्यांत हाडिल्ल्याचो आरोप भाजपाचे खासदार निशिकांत दुबे हांणी ह्या प्रकरणांत केला. महुआ मोईत्रा दिल्लींत आसतना तिचो सांसदीय आयडीचो वापर दुबयंत करताले आनी एनआयसी म्हणल्यार राष्ट्रीय तपास यंत्रणे कडेन ताची सगली म्हायती उपलब्द आशिल्ल्यान हें प्रकरण तिचेर बरेंच शेकतलें असो निश्कर्श काडपाची कोणेंय ताकतीक करीत जाल्यार ती चुकीची थारची ना.
उद्देगपती गौतम अदानी हो काँग्रेसीचो फुडारी राहूल गांधी हांचो सामको आवडीचो विशय आनी ताचेर तो उलोवपाक लागलो जाल्यार ताका सहसा कोणूच थांबोवपाक शकना. अर्थांत गौतम अदानीची प्रधानमंत्री नरेंद्र मोदी हांचे कडेन आशिल्लें लागींपण विरोधकांच्या केंद्र सुवातेर आसप अपरिहार्य आनी तातूंतल्यान आपलो सुवार्थ सादपा खातीर महुआ मोईत्रा हिणें असो मार्ग आपणायलो की सभाघरांतल्या सगल्यांनी आपली वाहवा करची अशें तिका दिसलें. अदानी संबंदांत सरकाराक सभाघरांत प्रस्न विचारपाची लॉटरी तिका दुबयंतलो भारतीय उद्देगपती हिरानंदानी हाच्या रुपांत लागली, आनी मागीर फाटल्यान पळोवपाचो प्रश्नूच नाशिल्लो. आपूण अदानीच्या विरोधांक कितली आक्रमक आसा हें सभाघरांत दाखोवपा खातीर महुआ मोईत्रान एकूच काम केलें, तें म्हणल्यार मुंबयंतल्या ह्या उद्देगपतीची हितराखण कशी करप हाचेरूच लक्ष दिलें. सभाघरांत हे खासदारीणबाईन विचारिल्ल्या 60-61 प्रस्नांतले सुमार पन्नाशेक प्रस्न अशे आशिल्ले की ते एक तर त्या उद्देगपतीच्या हितसंबंदाची राखण करपी आशिल्ले वा ताचे पसून तांकां निश्चीतूच फायदो जावपाक शकतलो अशेच तरेचे आशिल्ले, आनी ते खातीर तिणें पयशे घेतिल्ले. चैनीच्यो म्हारग वस्तू मेळयल्यो वा विदेशांत पर्यटनूय फुकटांत जावपाक लागतकूच अशे प्रस्न विचारपाक अडचण ती खंयची असो विचार तिणें केलो आसुये, पूण हेंच तिका शेकलें आनी सध्या तिचेर अपात्र जावपाचो धोको सामकार उबो रावला. सांसदीय समिती आतां ह्या प्रस्न प्रकरणाची चवकशी करता. उद्देगपती हिरानंदानी हाणें स्वता महुआ मोईत्रा हिका अडचणींत हाडपी प्रतिज्ञापत्र सभापतीक सादर केल्ल्यान खासदारीणबाईचो पांय चड खोलांत गेला.
केंद्रांतल्या मोदी सरकाराची प्रखर अशी टिकाकार म्हणून आपली खाशेली प्रतिमा तयार करप, ममता बॅनर्जीच्या सामकें लागीं पावप आनी तातूंतल्यान आपलो राजकी सुवार्थ सादून घेवप ह्याच हेतान महुआ मोईत्रा हिणे हें सगलें सामकें वेवस्थीत जुळोवन हाडिल्लें. मात तिच्या घरांतल्यान म्हणा वा सामक्या लागींच्यान ह्या प्रकरणाचेर उजवाड घालपाचें काम केलें आनी मोईत्रा हिच्या सुंदर मुखामळा फाटलें खरें विद्रूप मुखामळ देशा सामकार आयलें. स्वताक फायरब्रँड खासदार म्हणून सिद्ध करपाचो तिचे भितरलो हेतू कसो वेगळो आशिल्लो हें ह्या प्रकरणांतल्यान भायर आयिल्ले म्हायतीन चव्हाट्यार आयलें. सांसदीय चवकशी समिती सामकार आपली बाजू मांडटना महुआ मोईत्रा बिरेस्तारा कसली भुमिका घेता हाचे कडेन सगल्यांचें लक्ष आसा.
18 वर्सां आदीं अश्याच एक गंभीर घोटाळ्याचो पर्दाफाश जाल्लो, ताची याद ह्या प्रकरणाक लागून जागी जाल्या. संसदेंत प्रस्न विचारपांच्या मोबदल्यांत कांय खासदरांनी जांचे हितसंबंद आसात अशा लोकां कडल्यान रोख रक्कम घेतिल्ली. स्टींग ऑपरेशनाच्या माध्यमांतल्यान ह्या घोटाळ्याचो पर्दाफाश जाल्लो. देशाक हालोवन उडोवपी ती घडणूक आशिल्ली. महुआ मोईत्राचो हो घोटाळोय तेच तरेचो आशिल्ल्यान आमचे सांसदीय लोकशायेक लांछन थारपी अशे प्रकार सासणाचे बंद जावपा खातीर जे दोशी आसात तांचे आड खर कारवाय जावप ही काळाची गरज आसा. आमचे लोकशायेंत निश्ठ बाबी आडावप ताका लागूनच तर शक्य जातलें.
वामन प्रभू
9823196359
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
