भांगरभूंय | प्रतिनिधी
खबरां संस्था
धर्मशालाः मोहम्मद शमीन न्यूझिलंडाच्यो घेतिल्ल्यो 5 विकेटी उपरांत विराट कोहलीच्यो 95 धांवड्यांच्या बळग्यार संवसारीक वन-डे वर्ल्ड कपांत भारतान न्यूझीलंडाक 2003 उपरांत पयलेच फावट हारोवपाचें काम केलें. तशेंच अंदूच्या वर्ल्ड कपाच्या गुण तकट्यांत सेगीत पांच मॅची जिखून 10 गुणांनी पयले सुवातेर रावपाची चलल्ली सर्त भारतान तांकां 4 विकेटींनी हारोवन जिखली. अव्वल सुवातेर आशिल्ल्या दोन पंगडां मदली ही लडत म्हणल्यार अंदूच्या वर्ल्ड कपाचे फायनलीची रंगीत तालमे भशेन आशिल्ली. शमी मॅन ऑफ दी मॅच थारलो.
274 धांवड्यांच्या लक्ष्याचो फाटलाव करतना रोहित शर्मा आनी शुभमन गील ह्या भारताच्या ओपनरांनी बरी सुरवात केली. दोगानीय पयलीं पीच कंडिशन समजून घेतले आनी मागीर शॉट मारपाक सुरवात केली. पॉवर प्लेंतल्या दर एक ओव्हरीत तांणी चौके मारले. 9वी ओव्हरींत मात चौको नाशिल्लो. दोगानीय पॉवर प्लेंत अर्द शेंकड्याची भागिदारी करुन स्कोर 63चेर व्हेलो. शुभमन गिलान वन-डेंत सगल्यांत फास्ट दोन हजार धांवड्यो करपी बॅट्समन थारलो. ताणे 38 डावांत ही कामगिरी केली हाचे पयलीं हाशीम अमलान 40 डावांत 2 हजार धांवड्यो केल्लो.
भारताच्यो 71 धांवड्यो जाल्ल्यो तेन्ना लॉकी फर्गुसनान रोहिताची दांडी उडयली. रोहितान 4 चौके आनी 4 सक्यांनी 40 बॉलांत 46 धांवड्यो केल्यो. ताणे केल्ले चुकीक लागून ताचो अर्द शेंकडो जावपाक शकलो ना. रोहित आवट जाल्या उपरांत गील लेगीत आवट जालो. फर्गुसनाच्या बॉलार मिचेलान ताका कॅच आवट केलो. ताणे 5 चौक्यानी 26 धांवड्यो केल्यो. विराट कोहली आनी श्रेयस अय्यरान तिसरे विकेटी खातीर 52 धांवड्यांची भागिदारी केली. 128 धांवड्याचेर श्रेयस 6 चौक्यांनी 33 धांवड्यो केल्यो. बोल्टान ताका कॅच आवट केलें. केएल राहुलाच्या सांगातान विराट कोहलीन स्कोर 184 धांवड्याचेर व्हेली. ही जोडी पंगडाक जैत मेळोवन दितली अशें दिसतनाच सेन्टनराच्या बॉलाचेर राहुल एलबीडब्ल्यू जालो. ताणे 3 चौक्यांनी 27 धांवड्यो केल्यो. ह्या उपरातं आयिल्लो स्पोटक बॅट्समन सूर्यकुमार यादव रनआवट जालो. सेन्टनराच्या बॉलार मीड विकेटी कडेन बॉल मारल्या उपरांत तो धांवलो मात दुसरे वटेन आशिल्लो विराट थंयच रावलो. तें पळोवन सूर्यकुमार परत आयलो पूण तो मेरेन बॉल्टान बॉल विकेटकीपर लाथनाक दिलो आनी सूर्यकुमार रनआवट जालो.
विराटाचो विरस
विराट कोहलीक सचिन तेंडुलकाराच्या 49 ओडीआय शेंकड्यां कडेन बोरोबोरी करपाक 5 धांवड्यो उण्यो पडल्यो. खरें तर व्हो शेंकडो जावपाचो पूण संशमान खेळपी विराटान मॅट हेनरीक सक्यो मारपाचो यत्न केलो आनी ग्लेन फिलीपाक सोपी कॅच दिली. तागेलो म्हत्वाचो शेकडो जालो ना मात भारताक ताणे जैत मेळोवन दिलें. विराटान 104 बॉलांत 8 चौके आनी 2 सक्यांनी 95 धांवड्यो केल्यो. विराट- रवींद्र जडेजा जोडी भारताक जैत मेळोवन दिवपा कडेन पावल्ली तेन्नाच विराट आवट जालो आनी मोहम्मद शमीच्या सांगतान चौको मारून जडेजान (नाबाद 39) जैताचेर म्होर लायली.
न्यूझीलंडाच्यो 273 धांवड्यो
न्यूझीलंड व्हडली धांवसंख्या करतलो अशें दिसतना भारता खातीर मोहम्मद शमीचो एक बॉल सामको म्हत्वाचो थारलो. कारण ह्या एका बॉलाक लागून मॅच भारता वटेन फिरल्ल्याचें पळोवपाक मेळ्ळें. ताका लागून डॅरील मिचेलना जरी शेंकडो केलो तरी न्यूझीलंडाच्या धांवड्यांक ब्रेक लागलो. शमीन सगल्यांत चड 54 धांवड्यात 5 विकेटी घेतल्यो. ताका लागून न्यूझीलंडाक 273 धांवड्यांचेर खोशी मानची पडली. मिचेलान 9 चौके आनी 5 सक्यांनी 130 धांवड्यो केल्या. मात तो आवट जाल्या उपरांत न्यूझीलंडाचो डाव गडगडलो.
रोहित शर्मान टॉस जिखल्या उपरांत बॉलींग करपाचो निर्णय घेतलो आनी तो सारको थारलो. महम्मद सिराजान डेव्हॉन कॉनवेक शून्याचेर आवट केलें. उपरांत मोहम्मद शमीन ओपनर वील यंगाक 17 धांवड्याचेर बोल्ड केलें.
ह्या वेळार न्यूझीलंडाची स्थिती 2 आवट 19 अशी जाल्ली. मात राचिन रवींद्र आनी डॅरिल मिचेल हांणी तिसरे विकेटी खातीर 159 धांवड्यांची दमदार भागिदारी केली. ही जोडी व्हडली धांवसंख्या उबारतली अशें दिसतालें तेन्ना कॅप्टन रोहितान शमीच्या हातांत बॉल दिलो आनी ताणे रवींद्राक आवट केलें. रवींद्रान 6 चौके आनी एक सक्यान 75 धांवड्यांची खेळी केली. रवींद्राची विकेट भारता खातीर म्हत्वाची थारली. शमीन ताका आवट केलें आनी मॅच भारता वटेन आयली. कारण ते उपरांत भारतान न्यूझीलंडाच्यो एकाफाटल्यान एक विकेटी घेतल्यो आनी तांकां व्हडली धांवसंख्या उबारपाक दिलें ना. मोहम्मद शमीन भारतीय पंगडांतली आपली निवड सार्थ थारायली.
महम्मद सिराज आनी जसप्रीत बुमहारान दरेकी एक विकेट घेतली तरी तांणी सुरवेक सावन न्यूझीलंडाच्या ओपनरांचेर चेंपण हाडलें आयचो दीस मोहम्मद शमीचो आशिल्लो. बॉलींग करपाक आयल्या सावंन ताणे तें दाखोवन दिलें. सेन्टनर आनी मॅट हेनरीक ताणे दोन बॉलांत आवट केलें. तागेली हॅट्ट्रीक मात चुकली. कुलदीप यादवान 2 विकेटी घेतल्यो. भारतीय बॉलरां सामकार चॅम्पमन (6) सोडून बाकीचे पांच बॅट्समन पांच आकडी धांवड्यो करपाक शकले नात. कॉनवे, हेनरी आनी बॉल्ट शून्याचेर आवट जाले. मोहम्मद शमीन वन-डे वर्ल्ड कप सर्तींत पांच विकेटी घेवपाची कामगिरी दुसरे फावट करून दाखयली.
————————————————————————
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
