भांगरभूंय | प्रतिनिधी
कुंतीन आपल्या पुतांक म्हणलें, “हें पळेयात, आता भीमाच्या सुखा खातीर आमी काय काळ हांगाच रावूया. भीमा, तूं हिडिंबेक घेवन तिच्या घरा चल आनी बरो संवसार कर. फकत एक काम कर, दिसातल्यांन एकदा आमची खबर घेवन चल.
आदि पर्व 16
भीम आनी हिडिंबा
(हस्तिनापूराचो राज्य कारबार आतां दुर्योधनाचे मर्जेन चलतलो हें लोकांनी वळखलें. आतां फुडें…..)
वारणावतांतल्यान फासळ्ळ्या उपरांतच्या दुसऱ्या दिसा पांडवांनी रानांतली फळां आनी कंदमुळां एकठांय केलीं आनी खाल्लीं. लागींच एक तळें आशिल्लें थंय ते उदक पियेले. रातभर चलून सगले थकिल्ले. एका झाडा पोंदा ते आड पडले. थंयच तांकां न्हीद लागली. भीम मात न्हिदलो ना. तो पारो दित कुशीकूच बसून रावलो.
त्या रानांत हिडिंब आनी ताची भयण हिडिंबा रावताली. हिडिंब हो त्या वाठारांतल्या सगल्या राकेसांचो मुखेली आशिल्लो. त्या दिसा हिडिंबा रानांतल्यान भोंवता भोंवता पांडव न्हिदिल्ले ते सुवातेर पावली. पारो दियत बशिल्ल्या बळिश्ट भीमाक पळोवन ती ताच्या मोगांत पडली. राकेसीण आसून लेगील हिडिंबेचे रूप बरें आशिल्लें. तिचो देहूय धश्टपुश्ट आशिल्लो. ती भीमा कडेन वचून उबी रावली आनी तिणें ताका आपल्याक बायल म्हणून स्विकार कर अशी विनवणी केली. भीमाक धीट आनी घटमूट हिडिंबा सामकी पसंत पडली. पूण ताणें तिका म्हणलें, “हें पळय, म्हज्या व्हडल्या भावाचें अजून लग्न जावंक ना. तेन्ना ताचे पयलीं हांव कशें लग्न करूं? म्हजी आवय हांगा आसा तिणें आनी म्हजो व्हडलो भाव धर्म, हांणी संमती दिली जाल्यार हांव तुजे कडेन लग्न जातां.” इतल्यांत आपले भयणीक सोदीत सोदीत हिडिंब राकेस आयलो. भीम आनी हिडिंबाक एकठांय पळोवन तो कुशीक लिपून रावलो आनी ताणें तांचे सगळे उलोवणें आयकलें.
भीम आनी हिडिंबा एकामेका वांगडा लग्न करपाच्यो गजाली करतात हे कळटकच हिडिंबाक खूब राग आयलो. तो फुडे आयलो आनी ताणें म्हणले, “हय रे, तूं म्हजे भयणी वांगडा लग्न करपाक तयार जाला? तुका आता कितें ते दाखयतांच! आनी तूं गो, एका राकेसा वांगडा लग्न करचे सोडून हाच्या वांगडा लग्न जावंक सोदता? राव मात्शें, तुका हांव मागीर पळयता, हाका पयली धडो शिकयता अशें म्हणून तो भीमाच्या आंगार धांवून गेलो. भीम तयारुच आशिल्लो. दोगूय एकामेकांक मारपाचो यत्न करपाक लागले. त्या आवाजान कुंती आनी हेर पांडव जागे जाले. ते म्हणसर भीमान हिडिंबाक वयर उखलो आनी जमनीर आपटून ताचो जीव काडलो.
आपको भाव मेलो हें पळोवन हिडिंबा रडूंक लागली. रडत रडत ती कुंती कडेन गेली आनी तिणें म्हणलें, “म्हजो ह्या जगांत आतां कोणूच ना. हांव आता खंय वचू ? म्हाका आतां कोण पळयतलो? तुज्या पुतान म्हज्या भावाक मारून उडयलो. आतां ताका तूं म्हजे वांगडा लग्न जावपाक सांग. तुवें आनी तुज्या व्हडल्या पुतान संमती दिल्यार तो म्हजो आपली बायल म्हणून स्विकार करपाक तयार आसा, अशें म्हणून हिडिंबेन कुंतीच्या पांयार घालून घेतलें. कुंतीन पयलीं भीमाच्या आनी मागीर धर्माच्या तोंडा कडेन पळयलें. भीम मान सकयल घालून पायांच्या नाखटांनी जमीन खरपितालो आनी धर्म ताका पळोवन भितरले भितर हांसतालो. कुंतीन तें सगलें पळयलें आनी भीमाक म्हणलें, “भीमा, हिडिंबेचो तुजेर खरोच मोग आसा अशें दिसता. तेन्ना तुवें तिचो बायल म्हणून स्विकार केलो जाल्यार आमची कांयच हरकत ना. कळ्ळे? आता बेशटींच लजपाचीं नाटकां करूं नाका.” कुंतीचे तें उलोवप आयकून सगले हांसूक लागले. हिडिंबा मागीर परत कुंतीच्या पायां पडली.
हिडिंबेन उपरांत पांडवांक वांगडा घेवन तांका रावपाक एक खोप उबी केली. मागीर तांच्या जेवणाची तयारी केली. जेवण तयार जाल्या उपरांत सगल्यांनी एकठांय बसून जेवण घेतलें. समगल्यांक हिडिंबेचो सभाव खूब मानवलो. जेवल्या उपरांत सगले एकठांय बशिल्ले आसतना कुंतीन आपल्या पुतांक म्हणलें, “हें पळेयात, आता भीमाच्या सुखा खातीर आमी काय काळ हांगाच रावूया. भीमा, तूं हिडिंबेक घेवन तिच्या घरा चल आनी बरो संवसार कर. फकत एक काम कर, दिसातल्यांन एकदा आमची खबर घेवन चल. आयले लक्षांत?” भीम आनी हिडिंबा, हाणी मागीर कुंती आनी हेर पांडवाचो निरोप घेतलो आनी थंयच्यान गेलीं.
पांडव आनी कुंती थंयच तळ्याचे कुशीक हिडिंबेन बांदिल्ले खोपींत रावूंक लागलीं. भीम तांका मेळपाक सदांच येतालो. केन्ना केन्ना तांचे वांगडा हिडिंबाय आसताली. ती आयली म्हणटकच कुंतीक कितें जाय, कितें नाका तें विचारताली आनी तांच्या जेवणा खाणाची वेवस्था करताली. अशें तरेन पांडव त्या रानांत सगल्यो अडचणी सोंसून रावूंक लागले. हया काळांत हिडिंबेन एका चल्याक जन्म दिलो. ताका घटोत्कच अशें नांव दवरलें. हळूहळू तो व्हड जावंक लागलो. ताचे वांगडा खेळून सगळ्या पांडवांचो वेळ बरो वचूंक लागलो. घटोत्कच मातसो व्हड जातकच पांडवांनी थंय सावन वचपाचें थारायलें. भीमान हिडिंबेक घटोत्कचाची बरी काळजी घे अशें सांगलें. सगल्यांनी मागीर हिडिंबा आनी घटोत्कचाचो निरोप घेतलो आनी तें रान सोडलें.
– अनील नायक
9049079789
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
