भांगरभूंय | प्रतिनिधी
गोंयांत फुडल्या तीन वर्सांनी, म्हणल्यार 19 नोव्हेंबर 2026 उपरांत अखंड वीज पुरवण जातली, ही खबर आयकना फुडें गोंयकार खोशयेन दांडिया नाचल्यात आसतले. ‘वा वा किती आनंद झाला…’ गायत दोन टिपऱ्यो नेटान मारल्यातूय आसतल्यो. 1970 च्या दसका सावन गोंयांत वीज पुरवण घराघरांनी पावपाक सुरवात जाली. सगल्याक बल्ब, ट्युबलायटी दिसपाक लागल्यो. मात, अजून दर दिसा खंय ना खंय लायट आपालिपा खेळटाच. दोन वर्सां पयलीं तौक्ते मोडान तर गोंयांतल्या कांय वाठारांनी 1 ते 5 दीस लायट गायब केल्ली. पूण, वीज खात्याच्या कामगारांनी रातदीस घाम गळोवन परतून उजवाड हाडलो. सलाम! तांकां 50 वर्सां उपरांत सुसेग घेवपाक मेळटलो. कारण फुडाराक अखंडीत वीज पुरवण जातली! लायट केन्नाच वचपाक जायना, गोंयकारांक ‘बरे दीस’ येवपाक जाय म्हूण भुंयगत वीज केबल घालपाचें काम झुजा पांवड्यार चालू आसा. सादारण 1600 कोटी रुपया खर्च येतलो खंय. तो 2000 कोटींचेर वच्चे पयलीं हें काम सोंपोवपाचो यत्न जावंक जाय. भुंयगत केबल घालपाचें काम पुराय जालें काय मागीर लायटी बाबतींत भिवपाची गरजूच ना!
वीज पुरवण जाग्यार घालतलो जाल्यार सगल्यांत पयलीं भायल्यान गोंयांत वीज येता ती वाडपाक जाय. येता ती गोंयां सारक्या पर्यटन राज्याक पावना. आतां सगलेंच लायटीचेर! म्हणटकूच मेळटा तितली लायट उणीच म्हणचें पडटलें. ताचे पयलीं पोरणी वीज यंत्रणा बदलची पडटली. लोड आयलो जाल्यार यंत्रणा तो सोंसपाक शकची ना. मागीर कितें जातलें तें सांगपाची गरज ना. महाराष्ट्र, कर्नाटकांतल्यान जावपी वीज पुरवण अदीं मदीं बंद जाता आनी कांय वाठारांनी वराचीं वरां लायट येना. राज्यांत एके कडली लायट गेल्यार रोखडीच दुसरे कडल्यान पुरवण जाता, म्हूण गोंयकारांक तसो त्रास जायना. तरीय, तमनार करता तें यंत्रणा उबारपाचें, सरयांचें जाळें विणपाचें काम बेगीन पुराय जावप गरजेचें. वेळ, काळ सांगून येना. 30 वर्सां पयलींचो लायटीचो वापर आनी आतांचो हातूंत जमीन – आसमानाचो फरक आसा, हें कोणाक पटोवन दिवपाची गरज ना. तेन्ना नाशिल्ले मोबायल फोन आयज दरेकल्याच्या हातांत आसात. मिक्सर, टीव्ही, संगणक, फॅन, गिझर, शेगडी, फ्रीज, फॅर्र, वाॅशींग मशीन आयज प्रत्येक घरांत दिसता. इलेक्ट्रीक गाडयो, एसीय खांची- कोनशांनी पावत आयल्यात! दर्यादेगांचेर रातचो झगमग वाडला. कांय कडेन उजवाडसर लायटी पेटिल्ल्यो आसतात. लायटीचो वापर वाडला आनी ताचे विशीं अनास्थाय. आठ जालीं तरी स्ट्रीट लायटी पालोवप जायना. घरांनीय कुडींत कोण नासलो तरी फॅन, एसी, टीव्ही चालूच आसता. ताका लागून आमकां लायट चड लागता. फुडाराक चडूच लागतली, हें विसरूंक फावना.
पोरणी वीज यंत्रणा बदलपूय प्राधान्यक्रमान जावंक जाय. काम नेटान सुरू जालां, अशें सरकारान म्हणलां. वीज पुरवण कित्याक बंद जाता, तें लायनमनांक खबर आसतलेंच. तांचे कडेन उलोवचें. ट्रान्स्फाॅर्मर, सरयो बदलूंक जाय. सरयां वयलीं झाडां कापपाक जाय. आतां भुंयगत वीज केबल घाले काय तो प्रस्न येवचो ना. भुंयगत वीज पुरवण म्हणजे कितें तें लोकांक खबर आसचें. वयर एकूय सरी दिसची ना, फक्त स्ट्रीट लायटी पुरते खांबे उरतले… कांय आनीक कितें ते विशीं जागृताय गरजेची.
तीन वर्सांत भुंयगत लायटीचें काम पूर्ण जावचें, अशें प्रत्येक उद्देजकाकूय दिसता आसतलें. कारण लायट गेल्यार तांकां ताचो सगल्यांत व्हडलो धपको बसता. जनरेटर लावन कितलो वेळ काम करतले? ताका लागून प्रदुशण जाता तें वेगळें. फुडल्या पांच वर्सांत घराघरांनी इलेक्ट्रीक गाडयो जातल्यो. आतांच प्रत्येक वाड्यार त्यो दिसपाक लागल्यात. तांकांय लायट जाय. लायटीन उदरगतीक व्हडलें योगदान दिलां. पूण, फक्त कोळश्या वयले विजे बदला आमी सौर उर्जे कडेनूय वळपाक जाय. फुडल्या तीन वर्सांच्या काळांत ते नदरेनूय यत्न जावचे. वीज खात्यांत कामगार बेगीन भरपाक जाय. तांचे सुरक्षेचे उपाय घेवपाक जाय. केबलांतलो फाॅल्ट सोदपाक अत्याधुनीक यंत्रां जाय….. वीज पुरवण अखंड मेळटली, हे खबरेन गोंयकाराक उपाट खोस जाल्या. ती 2026 उपरांतूय तिगून उरची!!
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
