भांगरभूंय | प्रतिनिधी
धाराशिव, खबरां संस्था ः धाराशिव (महाराष्ट्र) जिल्ह्यांतल्या बेंबळी गांवांत वीज, उदक नाशिल्ल्या मोडक्या, पत्र्याच्या घरांत रावपी, रातच्या वेळार फकत मेणवातीच्या उजवाडात जगपी बाई लिंबा वाघे देवभक्त. तिणें भक्तीभावान वेगवेगळ्या देवळांक 50 लाखां परस चड दान केलां. हालींच पंढरपूरच्या विठ्ठलाक तिणें भांगराचो करदोडा (कमरेची मूज) आनी रुक्मिणीक गंठण (दावल) अश्यो 18 लाख मोलाच्यो भांगराच्यो दोन वस्तू दान केल्यो.
तिणें आतां मेरेन वेगवेगळ्या देवळांक 50 लाख रुपया मोलाचे भांगर दान केलां. बाई लिंबा वाघे ही 85 वर्सां पिरायेची आसा. ती एकटीच रावता. तिच्या घोवाक 50 वर्सां आदीं मरण आयलें. तांकां भुरगीं नात. तिका वाटणीची 11 एकर शेती मेळ्ळ्या. दोन वस्ती दान केल्ले खातीर पांडुरंग देवूळ समितीन बाई हांचो भोवमान केलो.
बाई वाघे हिणें हाचे पयलीं रुईभरच्या (धाराशिव) दत्ताच्या देवळांत कळसा खातीर एक तोळो भांगर आनी एक किलो रुपें अर्पण केल्लें. पळसवाडीच्या मारुती देवळा खातीर 7 लाख रुपयांच्यो मूर्ती, शिवाजीनगर (धाराशिव) हांगाच्या खंडोबा देवळांत 2 लाख रुपया मोलाच्यो मूर्ती, अक्कलकोट देवळाच्या अन्नछत्रांत आयदनां दिल्यांत. बेंबळींतल्या खंडोबा देवळाची पुनर्स्थापना केल्या. विशेश गजाल म्हळ्यार तिणें पंढरपूराक दान करपा खातीर स एकर शेती विकली.
बाई वाघेन आपल्या घरांतलें वीज कनेक्शन काडलां. घरांत उदका खातीर कळसो, धान्य सांठोवपाक पोरणीं मातयेचीं आयदनां, दोन- तीन साडयो इतलेंच सामान आसता. जाण्टेपणांत लेगीत ती स्वता रांदता आनी हेर कामां करता.
सोशल मिडियाचेर टिका, समर्थन
बाई वाघे हांणी हो पयसो गोरगरिबांक दान करपाचो. शाळा, धर्मशाळा, भलायकी केंद्रांक दिवपाचो असो सल्लो कांय जाणांनी दिला. देवळाचे समितीचे थोड्यांनी आरोप केल्यात. समितीन तिका आतां घर बांदून दिवचें आनी तिची मरमेरेन सेवा करची, अशें एकल्यान म्हणलां. तर थोड्यांनी तिचे भक्तीची तुस्त केल्या. स्वताचो पयशो कोणाक दिवचो हाचो सल्लो दिवपाचो अधिकार लोकांक ना, अशें थोड्यांनी म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
