‘आधार लॉक’ वरवीं दवरात तुमचो डेटा सुरक्षित

भांगरभूंय | प्रतिनिधी

देशांतलो दरेक नागरीक वळखपत्र म्हूण आधार कार्डाचो उपेग करतात. आधार कार्डा वरवीं खंयचीय सरकारी सेवा तुमी सोंपेपणान घेवंक शकतात. सिम खरेदी ते तिकीट बुक करपा मेरेन सगळ्या गजालीं खातीर आधार कार्ड वापरतात. देखून सरकार आधार कार्डाक शक्य तितले सुरक्षीत करपाचो यत्न करता.
हे खातीर आधार जारी करपी सरकारी एजन्सी यूआयडीएआयन (UIDAI) ‘आधार लॉक’ नांवाचें खाशेलें खाशेलपण दिलां, जाचे मजतीन तुमी तुमचे बायोमेट्रीकय लॉक करूंक शकतात. आधार करतना खंयच्याय मनशा कडल्यान बायोमेट्रीक घेतात. हातूंत तोंड, बोटांचे छाप आनी दोळे हांचो आस्पाव जाता. आधार डेटा जरी पुरायपणान सुरक्षीत आसलो तरी तुमी ‘आधार लॉक’ वरवीं ताची सुरक्षीतताय आनीक वाडोवंक शकतात.
आधार लॉक करपाचो सगळ्यांत व्हडलो फायदो म्हणल्यार तुमचे आधार कार्ड शेंणलें वा चुकीच्या मनशाच्या हातांत ते गेले जाल्यार तो ताचो गैरवापर करूंक शकता. अशे स्थितींत तुमी चड प्रवास करता जाल्यार आधार बायोमेट्रीक लॉक करप हो बरो निर्णय जावंक शकता आनी तुमी तुमचो डेटा चड सुरक्षीत करूंक शकतात. हाका लागून आधारा कडेन जोडिल्ली तुमच्या बँक खात्याची म्हायती हेर लोकांक मेळची ना.

आधार लॉक कसे करचे?

• हाचे खातीर तुमकां यूआयडीएआय संकेतथळार वचचें पडटलें.
• मागीर ‘माय आधार’ विभागांत वचून आधार सेवांचेर (Aadhaar Services) क्लिक करात.
• ते उपरांत लॉक आनी अनलॉक बायोमेट्रीक हाचेर क्लिक करात.
• मागीर आधार नंबर आनी कॅप्चा भरून जेनरेट ओटीपीचेर क्लिक करात.
• हाचे उपरांत ओटीपी घालात आनी सबमिट बटणाचेर क्लिक करात.
• तुमकां अनेबल लॉकिंग फिचर (Enable Locking Feature) हाचेर क्लिक करचें पडटलें.
• हाचे उपरांत तुमचो आधार लॉक जातलो.
• तेच प्रमाण तुमी तुमचो आधार अनलॉकय करूंक शकतात.