भांगरभूंय | प्रतिनिधी
भारत आयज संवसारीक वन डे क्रिकेट सर्तींत बांगलादेशा आड लेगीत जैताची लय कायम राखतना सेगीत चवथ्या जैताची नोंद करपाक इत्सूक आसतलो.
अंदूंचे सर्तींत धपके बसपी दोन निकाल पळयल्या उपरांत भारताचो पंगड बांगलादेशा आड सादूर रावपाचो यत्न करतलो. बांगलादेशान फाटल्या चारांतल्या तीन मॅचींनी भारताक हारयला. हालींच जाल्ले आशिया करंड सर्तींत ताणें भारताक स धांवड्यांनी हारयिल्लो.
इंग्लंड आनी दक्षीण आफ्रिका ह्या पंगडांक वळेरेन अफगाणिस्तान आनी नॅदरलॅण्ड ह्या पंगडां कडल्यान हार घेवची पडल्या उपरांत भारत खंयच्याच पंगडाक उणो लेखपाची चूक करचो ना.
मुखेली रोहित शर्मा आपलो उत्कृश्ट फॉर्म कायम राखपाक इत्सूक आसतलो. जाल्यार शुभमन गिल आनी विराट कोहली व्हड खेळी करपाक सज्ज आसतले. भारत सध्या गुणतकट्यांत दुसरे सुवातेर आसा.
बांगलादेश लेगीत जैत जोडून सेमी फायनलींत सुवात मेळोवपाची आपली आस्त कायम राखपाचो यत्न करतलो. ताणें सेगीत तीन मॅच वगडायल्यात. पयल्या तीन मॅचींनी लिटन दास आनी मेहदी हसन हाणें दरेकी एक अर्द शेंकडो नोंदयला. पूण, नजमूल हसन शांटो आनी तौहीद हृदय सारक्या युवा खेळगड्यांनी निर्शेणी हाडल्या. मदले फळयेंत मुशफिकर रहिम व्हड खेळी करपाक येसस्वी थारला. अणभवी बॉलर तस्कीन अहमद आनी मुस्तफिजूर रहमान लय मेळोवपाक झुजतना दिसतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
