भांगरभूंय | प्रतिनिधी
फिडे मास्टर अॅथन वाझ हाणें निमाणे लडतींत महाराष्ट्राचो इंटरनॅशनल मास्टर विक्रमादित्य कुलकर्णी हाका हारोवन अखील भारतीय फिडे मानांकन रॅपीड बुद्दीबळ सर्तीचें वस्तादपण जोडलें.
साश्ट तालुको बुद्दीबळ संघटनेन रोटरी क्लब ऑफ मडगांव आनी मडगांव क्रिकेट क्लबाच्या सहकार्यान मडगांवां सर्तीचें आयोजन केल्लें. सर्तीक गोंय बुद्दीबळ संघटना आनी अखील भारतीय बुद्दीबळ म्हासंघाची मान्यताय आशिल्ली.
ह्या जैतान अॅथन वाझाक 35 हजाराचें इनाम फावो जालें. विक्रमादित्य, भक्ती कुलकर्णी हांचे दरेकी साडेसात गूण जाले. तांकां वळेरेन तिसरी आनी चवथी सुवात फावो जाली.
दरेक णव डाव सोंपल्या उपरांत अॅथन वाझ आनी इंटरनॅशनल मास्टर सम्मेद शेटे हांचे समान आठ गूण जाले. पूण, टायब्रेकर गुणांनी अॅथन वाझ उजवो थारलो. इनामां भेटवण सुवाळ्याक दत्ता दामोदर नायक, सुशांत नायक, आशेश केणी, राजेश काकोडकार, दिलीप वेर्णेंकार, दामोदर जांबावलीकार उपस्थीत आशिल्ले. सर्त मिलेनियम बेकर्सान पुरस्कृत केल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
