आवाज की दुनिया…

भांगरभूंय | प्रतिनिधी

पर्यटनाचेर गोंय जगता म्हणटकूच पार्ट्यो जायच, पूण सर्वोच्च न्यायालयान आवाजाचेर कांय बंधनां घाल्यांत, नेम केल्यात, ते प्रत्येक भारतीय नागरिकान पाळपाक नाकात?

अाॅक्टोबर लागलो काय आवाज प्रदुशणाचो प्रस्न तकली वयर काडटाच. गोंय हें पर्यटन राज्य. नाच, पदां, पार्टी हांगां सदचींच. नाचप, गावप म्हणल्यार आवाज हो आयलोच. ताचे बगर पर्याय ना. मात, त्या आवाजाची पातळी कितली दवरप, हाका गोंयांतल्या दर्यादेगांचेर धरबंद उरूंक ना. फांतोडेर मळब तांबड्या, हळडुव्या रंगान रंगत वता, तेन्ना पार्टेची नशा देंवपाक लागता आनी आवाज ल्हवू ल्हवू कमी जाता. बरें हो आवाज सोंसपा सारको आसताच अशें ना. म्हापश्यां वाजयल्यार रातच्या शांत वेळार पणजे आयकूंक येतलो, इतलो व्हडलो. जाण्टे, भुरगे, दुयेंती आनी मोनजातीचें कितें जाता आसतलें, तें तांकांच खबर! पर्यटनाचेर गोंय जगता म्हणटकूच पार्ट्यो जायच, पूण सर्वोच्च न्यायालयान आवाजाचेर कांय बंधनां घाल्यांत, नेम केल्यात, ते प्रत्येक भारतीय नागरिकान पाळपाक नाकात? सांगून- सांगून सगले थकले. आतां गोंयच्या मुंबय उच्च न्यायालयान खर आदेश दिला. हणजूण आनी पेडणें पुलीस स्टेशनाचे हद्दींत खंयूय आवाजाचें प्रदुशण जाल्ल्याचें दिसून आयल्यार सगलीं उपकरणां जप्त करचीं आनी आस्थापनाक सरळ सील मारचें!! गोंय राज्य प्रदुशण नियंत्रण मंडळ, न्यायदंडाधिकारी आनी पुलिसांक उच्च न्यायालयान हो आदेश दिला. गोंय राज्य प्रदुशण नियंत्रण मंडळाकूय हें सांगचें पडटा, हाचे वयल्यान कितें तें वाचकांनी समजुचें!!
सागरदीप शिरसयकार आनी आर्नोल्ड डिसा हांच्यो ह्यो याचिका. सागरदीप हांची याचिका 2021 तली. तांणी शॅकधनी, सरपंच आनी पुराय सरकारी यंत्रणेकूच प्रतिवादी केल्ले. जाल्यार आर्नोल्ड हांणी राज्यांत चडशे वेवसायीक आनी कांय नागरिकूय मध्यान रातीं वेळार उक्ते सुवातेंत परवानगी घेनासतना आवाज करून पार्टी आयोजीत करतात, अशें म्हणिल्लें. दोन वर्सां वाट पळोवन मागीर मूळ याचिकादार सागरदीपा सयत आर्नोल्ड हांणी न्यायालयाचो अवमान जाल्ल्याची याचिका दाखल केली. ताचे सुनावणे वेळार न्यायालयान वयलो आदेश दिला. प्रदुशण नियंत्रण मंडळाची आवाज मेजपाची रियल- टायम आवाज निरिक्षण प्रणाली संबंदीत आस्थापन वाठारांत ना असो दावो याचिकादारांनी केला. अचकीत पळोवणी करपाची सुचोवणीय केल्या. न्यायालयान ती मानून घेतल्या. वयल्या वाठारांनी रातचे अचकीत वचून पळोवणी करची आनी अहवाल सादर करचो, तशेंच नेम पाळिनात तांची उपकरणां जप्त करचीं, आस्थापन सील करचें, असो खर आदेश न्यायालयान सरकाराक दिला. म्हणटकूच दर्यादेग वाठारांत परिस्थिती खंय पावल्या आसतली ताची फक्त कल्पना करची. अपुरबाय दिसता ती गोंयकारांच्या सोंशिकपणाची. कांय समाजवावुरपी सोडल्यार एकलोय मनीस ह्या आवाज प्रदुशणा आड आवाज काडिना. तांकां आतां त्या आवाजाची संवय जाल्या आसतली. तो बंद जाल्यार घडये रातभर हांतरुणार तळमळचें पडत, अशी भिरांत बी दिसता काय तांकां?!
आदल्या तेंपार सणां- परबां, लग्नांक, सत्यनारायण पुजेक लावडस्पिकर लायताले आनी ताचो आवाज कितले पयस मेरेन आयकूंक येता हें तपासपाक घरचे लोक वताले. कालांतरान लावडस्पिकाराचो जागो व्हडल्या स्पिकरांनी घेतला आनी ताचेर कितें वाजता, तर वाद्यांक मारपेट करून तयार केल्लें संगीत. ताका लय, ताल, गोडसाण आसताच अशें ना. मागीर तें लावन इल्लें ड्रग्स वा सोरो पेटयलो काय आपलेच धुंदीत जमता तशें नाचप, झिंगप, ट्रान्सांत वचप. ही आवाजाची वेगळीच दुनिया. थंय येवप्यांक आनी संगीत वाजोवप्यांक कोणाचो हुस्को, काकुळट बी नासता. सगलो सुवार्थ. हें आवाज प्रदुशण वाडिल्ल्यान न्यायालयांक बडयो मारच्यो पडटात. तांणी संगीत बंद करूं नाका म्हणूंक ना. तर थारायिल्ले पातळे भितर तें लावचें अशें सांगलां. रातीं 10 उपरांत तांणी आवाज कितलो आसचो, ताचे निर्देश दिल्यात. ते कोण पाळिनात. उरफाटे रात रंगत वता, तसो तो आवाज वाडटा. आवाज प्रदुशणाक लागून भलायकी इबाडटा हें सगल्यांक खबर आसूनय हें जाता. आतां न्यायालयान आस्थापन सील करपाचो आदेश दिला खरो, पूण तो चालीक लागतलो काय ना, हें सरकारी यंत्रणेचेर अवलंबून आसा. रातीं 10 मेरेन पार्टी करप शक्य ना? मनशाक करीत ती संवय जाता. सांजवेळार पार्टी सुरू करून ती 10 मेरेन सोंपयत जाल्यार गिरायक जावचें ना? आवाजाच्या वायट परिणामाचो आतां ह्या आस्थापनांनी विचार करचो!!