भांगरभूंय | प्रतिनिधी
भांगरभूंय । खबरां मेज
पणजीः लोटलेच्या बीग फूटांतल्या आर्ट गॅलरींत गोंयांतल्या रस्त्या कुशींक आशिल्ल्या खुरसांच्या फोट्यांचें प्रदर्शन आयोजीत केलां. तातूंत 243 फोटें लायल्यात. प्रदर्शनाचें उक्तावण फाटल्या सोमाराक मडगांवच्या लॉयेला हायस्कुलाचो आदलो प्राचार्य फादर विलियम रॉड्रिग्ज हांचे हस्तुकीं केलें. 30 ऑक्टोबर मेरेन हें प्रदर्शन सुरू आसतले आनी सकाळीं 9.30 तें सांजे 6 मेरेन तें साबार लोकांक पळोवपाक मेळटलें.
वेसायट क्रॉसीस ह्या प्रदर्शनाची संकल्पना बीग फूटाचे धनी महेंद्र आल्वारीस हांची आसा. ह्या फोट्यांचो आसपाव आशिल्लें पुस्तक सगल्या तपशिला सयत प्रकाशीत करपाचो ताचो विचार आसा. सगल्या खुरसांची म्हायती एकठांय करपाक सुमरा 4 ते 5 म्हयने लागतलो. ते उपरांत पुस्तक बरोवपाची प्रक्रिया सुरू जातली. फेब्रुवारी 2024 मेरेन ह्या पुस्तकांत छापपा खातीर खुरसांचे फोटे धाडपाक मेळटले अशें आल्वारीस हाणे सांगलें. हे प्रदर्शन बीगफूट क्रॉस आनी प्रेयर बीड्स म्युझियन, लोटली हांच्या जोड पालवान आयोजीत केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
