भांगरभूंय | प्रतिनिधी
खबरां संस्था
लॉस एंजिलीसः आंतरराष्ट्रीय ऑलिम्पीक समितीन (आयओसी) 2028च्या लॉस एंजिलीस ऑलिम्पिकांत क्रिकट सयत पांच नव्या खेळांचो आसपाक करपाक मंजुरी दिल्या. ताका लागून 128 वर्सां उपरांत ऑलिम्पिकांत क्रिकेट खेळाचें पुनरागमन जातले. 1900 वर्सा पॅरीसांत जाल्ल्या ऑलिम्पिकांत क्रिकेट मॅची जाल्ल्यो.
आयओसी कार्यकारी मंडळाचे बसकेंत क्रिकेट सयत पांच खेळांचो आसपाव करपाच्या निर्णयाचेर म्होर लायली. क्रिकेट, बेसबॉल/सॉफ्टबॉल, प्लॅग फुटबॉल, स्क्वॉश आनी लेक्रोस हे ते नवे खेळ आसात. फाटल्या 13 ऑक्टोबराक आयओसीन लॉस एंजिलीस ऑलिम्पिकांत क्रिकेट खेळाचो आसपाव करपाचो प्रस्ताव स्विकारल्लो.
1900च्या पॅरीस ऑलिम्पिकांत क्रिकेट खेळ जाल्लो. तेन्ना ग्रेट ब्रिटन आनी फ्रान्सा मदी भांगरा पदका खातीर फकत एक टॅस्ट मॅच जाल्ली. ब्रिटनान ही मॅच 158 धांवड्यानी जिखल्ली. 1998 आनी 2022च्या राष्ट्रकूल खेळांत तशेंच 2010, 2014 आनी 2023च्या आशियाई खेळांत क्रिकेटीक सुवात मेळल्ली.
फ्लॅग फुटबॉलाचो आसपाव
लॉस एंजिलीस ऑलिम्पिकांत फ्लॅग फुटबॉलाचो आसपाव केला. फ्लॅग फुटबॉलांत दोन पंगडांत पांच- पांच खेळगडे आसतात आनी ह्या फुटबॉलाक अमेरिकन व्हेरिएंट म्हणटात. अमेरिकन फुटबॉलांत डिफेंड करपा खातीर अॅटेकींग प्लेयराक बॉला वांगडा टच लायनीर पावचे पयलीं टॅकल करून सकल उडोवचें पडटा. फ्लॅग फुटबॉलांत प्लेयराच्या कमराक बांदल्ले दोन बेल्ट काडचे पडटात. अमेरिकेंत फ्लॅग लोकप्रिय आसा.
स्क्वॉशाचो पयलेच फावट ऑलिम्पिकांत आसपाव केला. 1998च्या राष्ट्रकूल आनी आशियाई खेळांत स्क्वॉशाचो आसपाव केलो. ही गेम दोन वा चार खेळगड्यां मदीं चार वण्टीच्या कोर्टांत एक ल्हान रबराच्या बॉलान खेळटात. खेळगडो आपल्या रॅकेटान बॉल कोर्टाच्या वण्टीत परत परत मारता. आपलो प्रतिस्पर्धी रिटर्न शॉट मारपाक शकचो ना अशे तरेन बॉल वण्टीक मारचो पडटा.
लेक्रोस पोरणो खेळ
लेक्रोस व्हो अमेरिकेंतलो पोरण्या खेळांतलो एक आसा. व्हो एक सांघीक खेळ आसा. जो लेक्रोस स्टीक आनी लेक्रोस बॉलान खेळटात. तो उत्तर अमेरिकेतल्या मूळ लोकां मदीं 12व्या शतमानांत खेळपाक सुरवात जाल्ली. फुटबॉल सारक्या मैदानार तो खेळटात. लेक्रोस स्टीकी वयर एक नेट आसता. खेळगडो लेक्रोस स्टीक नेटाचो उपेग बॉल व्हरपाक, पास करपाक, धऱपाक वा गोल करपाक करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
