भांगरभूंय | प्रतिनिधी
श्रीपाद नायक: फोंड्यां घुमट आरती सर्तीचें उक्तावण
फोंडें: समाजाच्या आदाराचेर समाज घटमूट करपा खातीर दरेकाचे सहकार्य गरजेचें आसता. विस्वासाचो धागो घटमूट करून नवे पिळगेचेर बरे संस्कार घडोवपाची जापसालदारकी स्वताच्या भुजार घेवप गरजेचें आसा. भंडारी समाजाची दिशा बदलपा खातीर संघटीत जावप हीच समाजाची खरी शक्त आशिल्ल्याचें केंद्रीय मंत्री श्रीपाद नायक हांणी सांगलें.
गोमंतक भंडारी समाज युवा समिती आयोजीत सर्गेस्त विजया श्रीपाद नायक हांच्या स्मरणार्थ तिसरी अखील गोंय बायलांची घुमट आरती सर्तीचें आनी सर्गेस्त मधुकर पोकू नायक हांच्या स्मरणार्थ चवथी अखील गोंय दादल्यांची घुमट आरती सर्तीचें उक्तावण केंद्रीय मंत्री श्रीपाद नायक हांचे हस्तुकीं जालें.
ही सर्त राजीव गांधी कला मंदिराच्या सभाघरांत घेतली. ह्या वेळार गोमंतक भंडारी समाजाचे अध्यक्ष- अशोक नायक, उपाध्यक्ष- देवानंद नायक, भांडारी- जोगुसो नायक, रामचंद्र मुळे, उत्तर गोंय जिल्हो पंचायत अध्यक्ष सिद्धेश नायक, युवा समितीचे अध्यक्ष दिक्षक नायक, दत्तप्रसाद नायक, पंच हरीश नायक आनी हेर मानेस्त हाजीर आशिल्ले.
गोमंतक भंडारी समाजाचे अध्यक्ष अशोक नायक हांणी भंडारी समाज भावांच्या अन्याया आड सेगीत लढो दिवपाक समिती सक्षम आसा. फाटल्या कांय वर्सां सावन समितीन गांवगिऱ्या वाठारांत समाजाचो प्रसार करून संघटीत जावपाचो यत्न केल्ल्याचें तांणी सांगलें.
गोमंतक भंडारी समाज युवा समितीचे अध्यक्ष दिक्षक नायक हांणी सगल्यांक येवकार दिलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
