भांगरभूंय | प्रतिनिधी
भारतान पाकिस्ताना आड संवसारीक क्रिकेट सर्तींतली जैताची धांव कायम राखली. हांगाच्या नरेंद्र मोदी स्टेडियमाचेर जाल्ले मॅचींत पाकिस्तानाक 7 विकेटींनी हारयलो. संवसारीक क्रिकेटींत भारतान पाकिस्ताना आठवे खेपे हारयलो. तशेंच ह्या जैता सयत भारतान गुणतकट्यांतली पयली सुवात मेळयली.
पाकिस्तानान दिल्ली 192 धांवड्यांची मोख भारतान फकत तीन विकेटी वगडावन 30.3 ओव्हरींनी मेळयली. मुखेली रोहित शर्मान 86 धांवड्यांची खेळी केली. ताणें तिसरे विकेटी खातीर श्रेयस अय्यरा वांगडा 77 धांवड्यांची भागिदारी केली. 19 धांवड्यांनी 2 विकेटी घेवपी जसप्रीत बुमराची मॅन ऑफ द प्लॅयरा खातीर निवड जाली.
पाकिस्ताना वतीन मुखेली बाबर आजमान अर्द शेंकडो नोंदयलो. मोहम्मद रिझवानान 49 धांवड्यांची खेळी केली. भारताच्या पांच बॉलरांनी दरेकी 2 विकेटी घेतल्यो. भारता वतीन रोहिता खेरीत श्रेयस अय्यरान 53 धांवड्यांचें योगदान दिलें. पाकिस्ताना वतीन शाहिन आफ्रिदीन 2 विकेटी घेतल्यो.
मजगतीं, मोखीचो फाटलाव करपी भारताक संवसारीक सर्तींतली पदार्पणाची मॅच खेळपी शुभमन गिलान बरी सुरवात करून दिली. हसन अलीचे ओव्हरींत ताणें तीन चवके मारले. शाहिन आफ्रिदीचे तिसरे ओव्हरींत गिलान (16) नेटाचो शॉर्ट खेळ्ळो. पूण, शादाब खानान ताची सुंदर अशी कॅच धरली. ते उपरांत रोहित शर्मा आनी विराट कोहली हांणी डाव मुखार व्हेलो. रोहितान काल सक्यांचो पावस घालो. वन डे क्रिकेटींत 300 सके मारपी तो संवसारांतलो तिसरो भारताचो पयलो बॅट्समन थारलो. रोहित आनी कोहली हांणी केल्ली 56 धांवड्यांची भागिदारी हसन अलीन फोडली. कोहली 16 धांवड्यो करून कॅच बाद जालो. दुसरे वटेच्यान रोहितान आपली आक्रमक बॅटींग कायम राखली. ताणें 36 बॉलांनी आपलो अर्द शेंकडो पुर्ण केलो.
कोहली उपरांत अय्यरान रोहिता वांगडा अर्द शेंकड्याची भागिदारी केली. रोहित शेंकडो पुर्ण करतलो अशें दिसतालें. पूण, शाहिनान ताका तंबूंत धाडलो. रोहितान 63 बॉलांनी 6 चवके आनी स सक्यांचे मजतीन 86 धांवड्यो केल्यो. संवसारीक सर्तींत ताका आठवो शेंकडो चुकलो. रोहित बाद जाल्या उपरांत खेळ मात्सो स्लो जालो. पूण, लोकेश राहुल आनी अय्यर हाणें संयमान बॅटींग करून भारताचें जैत निश्चीत केलें. श्रेयस 53 धांवड्यो करून नाबाद रावलो. लोकेशान नाबाद 19 धांवड्यो केल्यो.
ते पयलीं जसप्रीत बुमरा, कुलदीप यादव, हार्दिक पांड्या, रवींद्र जडेजा आनी मोहम्मद सिराज हांणी पाकिस्तानाचो डाव 191चेर सोंपयलो. अब्दुल्लाह शफिक (20) आनी इमाम उल हक (36) बाद जाल्या उपरांत बाबर आजम आनी मोहम्मद रिझवान हांणी 83 धांवड्यांची भागिदारी करून पाकिस्तानाक सांबाळपाचो यत्न केलो. पूण, सिराजान आजमाक (50) बोल्ड केलो. ते उपरांत थारावीक अंतरान विकेटी पडत गेल्यो. सौद शकील (6) आनी इफ्तिखार अहमद (4) हे कुलदीपाचे शिकार थारले. ते उपरांत बुमरान रिझवानाक (49) बोल्ड केलो आनी उपरांत रोखडोच शादाब खानाची (2) विकेट घेतली. पाकिस्तानाचो 2 बाद 155 धांवड्यां वयल्यान 191चेर डाव सोंपलो.
रोहित शर्माचे 300 सके
रोहित शर्मान पाकिस्तानाचो आदलो बॅट्समन शाहिद आफ्रिदी आनी वॅस्ट इंडिजाचो आदलो बॅट्समन क्रिस गेल हांचे वळेरेंत सुवात मेळयली. रोहित शर्मान वन डे क्रिकेटींत 300 सक्यांचो आंकडो हुपलो. हो पराक्रम करपी तो भारताचो पयलो आनी संवसारांतलो तिसरो बॅट्समन थारलो.
शाहिद आफ्रिदी पयले सुवातेर आसा. ताणें 369 डावांनी 351 सके मारल्यात, जाल्यार गेल 294 डावांनी 331 सके मारून दुसरे सुवातेर आसा. रोहितान अजून मेरेन 246 डावांतल्यान 300 सके मारल्यात.
भारताच्या बॅट्समनांची वळेरी पळयली जाल्यार आदलो विकेटकीपर बॅट्समन महेंद्रसिंग धोनी दुसरे सुवातेर आसा. ताणें 229 सके मारल्यात. रोहित आनी धोनी हांकां सोडले जाल्यार भारताच्या खंयच्याच बॅट्समनाक 200 सके लेगीत मारपाक जमूंक नात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
