इस्रायलच्यान 212 भारतीयांक घेवन पयलें विमान दिल्लीत पावलें

भांगरभूंय | प्रतिनिधी

‘ऑपरेशन अजय’ मोहिम सुरु

नवी दिल्ली, खबरां संस्था ः इस्रायल आनी हमास हांचे मदीं चालू आशिल्ल्या झुजाचो आयज सातवो दीस. इस्रायलांतल्या वेगवेगळ्या शारांनी आडकून पडिल्ल्या भारतीय नागरिकांक ‘ऑपरेशन अजय’ हे मोहिमे खाला भारतांत हाडल्यात. आयज सकाळीं 212 भारतीयांक घेवन पयलें विमान गुरियन विमानतळा वयल्यान दिल्ली विमानतळार पावलें. ह्या वेळार केंद्रीय मंत्री राजीव चंद्रशेखर हांणी इस्रायलांतल्यान आयिल्ल्या भारतीयांक दिल्ली विमानतळार येवकार दिलो.

हमासान इस्रायलाचेर अचकीत हल्लो केले उपरांत 7 ऑक्टोबराक एअर इंडियान इस्रायल सावन भारतात येवपी सगळ्यो विमान सेवा रद्द केल्ल्यो. देखून जायते भारतीय नागरीक इस्रायलांत आडकून पडिल्ले. ताका लागून केंद्र सरकारान ‘ऑपरेशन अजय’ ही मोहीम इस्रायलांतल्या झुजांत आडकून पडिल्ल्या भारतीय नागरिकांक सोडवपाची मोहीम सुरु केलां. काल सावन हे खातीर नोंदणी प्रक्रिया सुरू जाल्या. तशेंच भारतीय नागरिकां खातीर हेल्पलायन सुरू केल्या. इस्रायलांत सुमार 18 हजार भारतीय नागरीक रावतात.