भांगरभूंय | प्रतिनिधी
वो झूट बोल रहा था बड़े सलीक़े से, मैं एतिबार न करता तो और क्या करता? वसीम बरेलवी हांचो हो शेर. आयज सोशल मिडिया ‘फटिंगाचो पाय’ जाला. कितें खरें, कितें फट, कळना जालां. इस्रायल आनी हमास (पॅलेस्टायन) हांचे मदीं संघर्श चालू आसा. हरशीय हें रेंवट तशें तापिल्लेंच आसता. मात, आतां हमास संघटणेन गरज नासतना राॅकेटां सोडून इस्रायलाची कळ काडली आनी परतून झुज सुरू जालें. तातूंत सोशल मिडिया तेल ओतपाक लागल्या. ‘आय 24’ ह्या खबरा चॅनलान दोन दिसां पयलीं काफर अझा वाठारांत हमासान 40 सानुल्या भुरग्यांची कत्तल केली, अशी खबर दिली. अर्थांत संवसारांतल्या खबरां चॅनलांनी ती प्रक्षेपीत केली. आमकां ही खबर सैनिकांनी दिली, अशें पत्रकाराचें म्हणणें. आतां इस्रायलाच्या लश्करान आपणाक हे विशीं कांय खबर ना, अशें जाहीर केलां. ह्या झुजांत ल्हान भुरगीं, जाण्टे, दुयेंती सगळेच जखमी जाल्यात. दोनूय वटेनचे दोन हजारां वयर लोक मेल्यात. ताचे दुपेटीन जखमी जाल्यात. झुजांत कोणूय जिखूं वा हारूं, सासणाचें लुकसाण जाता, तें थळाव्यांचें. शारिरीक, मानसीक, अर्थीक…. सगले तरेचें! आशिकुशीच्या देशांकूय ताचो धपको बसता.
सोशल मिडिया, टीव्ही वयल्यान फटीच्यो खबरो पातळावन परिस्थिती इबाडप समा न्हय. सोशल मिडिया वयले हे सुनामीक लागून आतां युरोपीयन युनियनान संबंदीत खातें वापरप्यांचेर बेगोबेग कारवाय करपाचो उलो सोशल मिडियाच्या धनयांक मारला. खास करून ‘एक्स’च्या एलोन मस्क हांकां. चुकीची म्हायती दिल्ल्यान गंभीर समाजीक परिणाम जावपाची भिरांत आसा, अशें युरोपी देशांक दिसता. हमासाच्या हल्ल्या उपरांत इस्रायल समर्थक आनी विरोधकांचें सोशल मिडियाचेर झूज पेटलां. हरशी म्हूण दोन विचारसरणेंचें पेटिल्लें आसताच. मात आतां बोगस म्हायती, व्हिडिओ येवपाक लागल्यात. कांय खबरांनी फटीची म्हायती मिस्तुराद करून नेटिझनांचें मत, विचार बदलपाचे यत्न चालू जाल्यात. ‘एक्स’ प्लॅटफाॅर्मान फाटल्या चार दिसांनी दुस्वास पातळावपी आनी दिशाभूल करपी शेंकड्यांनी खातीं बंद केल्यांत. सुक्या वांगडां ओलेंय लासलां आसतलें! व्हायट हावसान इस्रायलाक अर्थीक, लश्करी मजत दिल्या, इस्रायल आनी हमास लोकांक मारतात, झुजतात ते व्हिडिओ म्हूण झुजाच्यो ‘गेमी’ अपलोड केल्यात. एके कडेन तर गाझा पट्टीचेर अणुबाॅम्ब घाला, तें दिसता. हमास आनी इस्रायलाचे फुडारी झुजांत मेल्यात… कितल्यो खबरो सांगपाच्यो? इस्रायल, पॅलेस्टायन संघर्शा संबंदी पांच कोटी पोस्ट फाटल्या सप्तकभरांत आयिल्ल्याचें ‘एक्स’ कंपनीन जाहीर केलां. हाचे वयल्यान सोशल मिडियाच्या सांवाराची कल्पना येतली. लोकांचेर कितलो प्रभाव आसा तेंवूय दिसतलें. खरें म्हणल्यार हांगां फक्त सत्य खबरो, बोध दिवपी पोस्ट, समाजांत एकचार निर्माण करपी व्हिडिओ दिसपाक जाय. मात तशें जायना. इस्रायल- हमासाचें झूज हो एकूच विशय न्हय, तर दीसपट्ट्या विशयांचेर पसून दुसऱ्यांक थोमणे मारपाचे, भलतीच म्हायती दिवपाचे, अर्दसत्य सांगपाचे प्रकार सगल्याच देशांनी जातात. आमकां भारतीयांक तर हाची चड फोडनिशी करून सांगपाची गरज ना! भाजपाचे ज्येश्ठ फुडारी सर्गेस्त अटलबिहारी वाजपेयी हांचो पॅलिस्टायनाचें खर समर्थन करपी व्हिडिओ व्हायरल जाला. मुस्लीम फुडारी पॅलेस्टायनाचें समर्थन करतना दिसतात. बाकीचे विरोध. सगल्या प्लॅटफाॅर्मांचेर इस्रायल, पॅलेस्टायनाचे पोस्ट, व्हिडिओ भोंवतना पळोवंक मेळटा.
29 नोव्हेंबर 1947 दिसा संयुक्त राष्ट्रान सर्वसादारण सभेंत थाराव 181 (फाळणी थाराव) घेतलो. तातूंत मे 1948 त अरब आनी ज्यू अश्या दोन वाठारांची निर्मणी करपाचें थारलें. ताचेर ब्रिटनाचो ताबो आशिल्लो. भोवतेक जाग्यांचेर पॅलेस्टिनी लोक रावताले. इस्रायलाचे निर्मिती उपरांत इसापनितींतलो शिंयान कुडकुडपी उंट अरबाक विनवणी करून तंबूंत इल्लो इल्लो करून भितर घुसता…. अखेरेक उंट तंबून आनी अरब भायर !! आयज पॅलेस्टिनी लोक थंय निर्वासीत म्हणून रावतात. तांच्या वांट्याक 6020 चौ. किमी, तर इस्रायलाच्या ताब्यांत 22,145 चौ. किमी जमीन आसा. ज्यू हे संवसारांतले सगल्यांत हुशार मनीस. हिटलरान तांकां काबार करपाचो यत्न केलो, पूण आयज ते स्वताच्या बळग्याचेर सगल्या देशांनी स्वताच्या पांयांचेर उबे आसात. तांच्या ह्या कर्तृत्वाक लागून हिटलराक आदर्श मानपी लोक पसून ज्यूंक मानतात.
धर्म, प्रांत, जमीन, उदक, सैमीक साधनसुविधा हांचे वयल्यान संवसारभर चलिल्ल्या संघर्शांक लागून येवपी पिळग्यां मदीं एक प्रकारची आक्रमकताय, दुस्वास, तिडक रुजता…. हें सुडचक्र कायमचें घुंवत आसा. मनीसजातीचो हो पेखनाशिल्लो घावो!
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
