भांगरभूंय | प्रतिनिधी
तरणाट्यांच्या उदरगती खातीर केंद्राची युवा डिजिटल शाखा
नवी दिल्ली, खबरां संस्था ः येवपी लोकसभा वेंचणुकेंत बायलां सारकेच तरणाटेय निर्णायक मतदार आशिल्ल्यान केंद्र सरकारान युवा शक्ती कडेन लक्ष दिवपाक सुरवात केल्या. तरणाट्यांचे उदरगती खातीर केंद्राची युवा डिजिटल शाखा ‘मेरा भारत’ ह्या नांवान उगडटले. हे डिजिटल संघटनेच्या प्रस्तावाक बुधवारा केंद्रीय मंत्रीमंडळान मान्यताय दिली.
देशांतल्या तरणाट्यांची फुडारपणाची तांक आनी कुशळटाय वाडोवपा खातीर ‘मेरा भारत’ ही नवी डिजिटल संस्था स्थापन करता. सरदार पटेल हांच्या जयंती दिसा निमतान 31 ऑक्टोबराक हे संस्थेचे लोकार्पण जातले अशी केंद्रीय म्हायती आनी प्रसारण मंत्री अनुराग ठाकुर हांणी पत्रकार परिशदेंत म्हायती दिली.
‘मेरा भारत’ ही संस्था केंद्रीय युवा आनी खेळां मंत्रालयाच्या खाला काम करतली.
‘मेरा भारत’ संस्थेचो उद्देश….
‘मेरा भारत’ हे संस्थेचो मुखेल उद्देश तरणाट्यांच्या उदरगती खातीर अत्याधुनीक डिजिटल माची दिवप आनी 15 ते 19 वर्सां पिरायेच्या गटांतल्या सुमार 40 कोटी तरणाट्यांक हे संस्थेचो फायदो जातलो. तरणाट्यांक वेगवेगळ्या उदरगतीच्यो संदी मेळूं येतात, पूण एकठांय केल्ली म्हायती मेळपाची सुविधा ना, जी ‘मेरा भारत’ वरवीं मेळूं येता. ही संस्था शिक्षण, भलायकी, खेळां अशा वेगवेगळ्या मळार फुडार निर्माण करपाचें साधन थारतली. तशेंच सरकाराच्या वेगवेगळ्या येवजण्यां विशीं म्हायती मेळूं येता. तरणाटे कुशळटाय उदरगत कार्यावळींत वांटो घेवंक शकतात. ही संस्था केंद्र सरकारान चालीक लावपाची आसली तरी केंद्रान तिचे खातीर अर्थीक मजत दिवंक ना. तरणाट्यांनी हे संस्थेच्या वेव्हारांत वांटो घेवन ताचो फायदो घेवचो अशी अपेक्षा आसा – अनुराग ठाकुर, केंद्रीय म्हायती आनी प्रसारण मंत्री
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
