भांगरभूंय | प्रतिनिधी
साळांतल्या पांचूय प्रहरांनी भजन करून विठ्ठलाचो जयघोश
दिवचल: “गोपाळकाला गोड झाला, आमचा विठोबा घराशी गेला, गेलो होतो पावू त्याला” अशा भक्तांच्या आवाजांत आनी धोल ताश्यांच्या गजरांत श्रीमहादेव भुमिका देवस्थानाचो देड दिसांचो वर्सुकी भजनी सप्ता व्हड दबाज्यान जालो.
मंगळारा इंदिरा एकादशी ह्या दिसा वयलोवाड्यार सावन श्रीसिद्धेश्वर देवस्थानाच्या प्रांगणांतल्यान श्रीविठोबाची पालखी मिरवणुकेन टाळ-मृदंग आनी भक्तगण हांच्या सांगातान धोल, ताश्यांच्या गजरांत भुमिका देवळांत आगमन जालें. देवळाक प्रदक्षिणा काडून श्रीभुमिका देवळांत अखंड भजनी सप्तकाक सुरवात जाली.
हातूंत साळांतल्या पांचूय पारांनी आपले प्रहरा-प्रहरान भजन सादर केलें आनी श्रीविठ्ठलचो जयघोश अखंड चालू दवरलो. रातच्या वेळार पार एकान आपल्या कार्यावळ स्थानार (श्रीमहादेव देवळाच्या सभामंडपांत) रातीं धा वरांचेर संगीत बसकेचें आयोजन केल्लें. गजर भक्तीची ही सुरेल संगिताची कार्यावळ पार पडली. हातूंत ऋतुजा लाड (मुंबय) आनी सौरभ काडगावकर (पुणें) हांणी आपलें गायन सादर केलें. तांकां ऑर्गनाचेर दत्तराज सुर्लकार (गोंय) तबल्याचेर संकेत खलप (गोंय), पखवाजाचेर किशोर तेली (गोंय) जाल्यार टाळ- राहॅल खांडोळकार (गोंय) हांची साथ संगीत मेळ्ळी. जाल्यार मानसी वाळवे हांणी सुरेख निवेदन केलें. गायन बसका जाले उपरांत चित्ररथ मिरवणूक काडली.
पार दोना वतीन परंपरीक सुवातेर रातच्या धा वरांचेर निषाद क्रिएशन निर्मित चांदणे स्वरांचे ही संगिताची कार्यावळ जाली. हातूंत गोंयचे तरणाटे गायक नवाब शेख, नम्रता पराडकार आनी अक्षता रामनाथकार हांणी आपलें गायन सादर केलें. जाल्यार नेहा उपाध्ये हांणी निवेदन केलें. तशेंच संवादिनीचेर शिवानंद दाभोळकार, तबलो नितीन कोरगांवकार, सिंथेसायझर बाळकृष्ण मेस्त, ऑक्टोपॅड अश्वीन जाधव ह्या कलाकारांनी बरी संगिताची साथ दिली. जाल्यार सिद्धेश नायक हांणी ध्वनी संयोजन केलें. गायन जाले उपरांत दिंडी सयत चित्ररथ मिरवणूक काडली. तशेंच पार पांचा वतीन वयलोवाडो श्रीसिद्धेश्वर देवळांच्या प्रांगणांतल्यान दिंडी मिरवणुकेन पालखीचे श्री भुमिका देवळांत आगमन जालें.
दुसऱ्या दिसा दनपारां श्रीसिद्धेश्वर देवळाच्या प्रांगणांतल्यान श्रींची पालखी मिरवणूक आयले उपरांत भजन जावन महाआरती जाली. उपरांत रिंगण सुवाळो जालो हातूंत देवळांत विठ्ठलाच्या भक्तगणांनी लाह्यो उधळ्ळ्यो. ताचे पयलीं पिंपळा पेडा खाला ल्हान भुरग्यांच्या हातांतल्यान नाल्ल काडून घेवपाची सर्त जाली. हातूंत भुरग्यांनी व्हड उमेदीन वांटो घेतलो. उपरांत धंयाहांडो फोडपाची कार्यावळ जाली. हातूंत शाबी दत्ताराम परब हांणी धंयाहांडो फोडलो.
हे कार्यावळी उपरांत विणारुपी विठ्ठलाक सैमीक उदका स्रोतांचेर पुरयत सदाशीव गाडगीळ हांचे वरवीं विसर्जन केलें. परतून देवळांत येवन विठ्ठल नामाच्या जयघोशांत प्रदक्षिणा घाल्यो आनी सभामंडपांत गांवच्या भल्या खातीर सामुहीक गाराणें घालें. उपरांत तिर्थप्रसादाचें वांटप केलें आनी वर्सुकी भजनाची सांगता जाली.
ह्या दोन दिसांच्या पुराय कार्यावळीक ग्रामस्थ, भावीक लोक व्हड संख्येन हाजीर आशिल्ले अशें देवस्थानाचे अध्यक्ष कालिदास रावत हांणी सांगलें. काल (बुधवारा) दनपारां दोन वरांच्या सुमाराक भजनी सप्ता उमेदीन पार पडलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
