भांगरभूंय | प्रतिनिधी
गरमागरम जेवण जेवपाक सगल्यांक आवडटा. कुडीचे उदरगती खातीर पुश्टीकआहार सामको गरजेचो. देखून शक्य तो गरम जेवपाक जाय. जेवण मागीर तें शिवराक जावं. धव्याफुल्ल शिताचेर हळडुवेंच वरण आनी ताचेर साजूक तुपाची धार. कुशीकआंबट, तीख लोणच्याची फोड, भाणां पोंदच्या रसरशीत इंगळ्यांचेर भाजिल्लो कुरकुरीत पापड म्हणजे गोंयकारां खातीर सर्गसुख. नुस्त्याच्या जेवणांत तर सुंगटांचें हुमण आनी बांगड्याचो तळिल्लो एक कुडको पुरो. गोंयकार सामको तृप्त.
घरांत आशिल्ले गरमागरम जेवणाचो आस्वाद घेतात. पूण, नोकरी करपी लोकांक गरम जेवण मेळटाच अशें ना. सकाळीं फुडें जेवणाचो डबो घेवन गेले काय दनपार मेरेन सगले पदार्थ थंड जातात. आतां भोवतेक आस्थापनांनी मायक्रोव्हेव ओवन नाजाल्यार इंडक्शन प्लेट आसताच.ताका लागून थंडगार जेवण गरम करूंक मेळटा. दुदाची तान ताकान भागोवं येता. गरम जेवण भलायकेक बरें. पदार्थ चड रुचीक लागतात. ते पचतातूय बी बेगीन. हुनहुनीत खाल्यार पोटाक कसलोच त्रास जायना. अजीर्ण जायना. उरफाटें थंडगार जेवण जेवपाक मन जायना. असले जिनस खाल्यार पोटदुखी जावं येता. जांकां शक्य ना तांणी सुटयेच्या दिसा, आयतारा तरी गरमागरम जेवण जेवचें. उदक पसून कडकडीत पियेवचें. सगल्यां वांगडा एकठांय बसून जेवचें. हुनहुनीत ताज्या जेवणांत जी मजा आसा, ती थंडगार जेवणांत ना.
सिद्धी तिळवे
9158200956
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
